HANAWANG cahu neköi medreng, nyen a treije xom la hene wanakoime ne la ketre föe hmae. Mose la ëje i nyën. Nge drei kö cahu föe hmae ka mingöming? Celë hi ketre isola ne Aigupito, nekö i Farao nyidroti.

Kola traqa kowe la köni treu i Mose, nge thine pala hi a juetrë nyën, pine laka, thaa ajane kö nyiidro tro angetre Aigupito a humuthi nyën. Ngo atre hi nyiidro, laka, thaa ijije kö troa ami Mose palua ngöne la gaa sihngödr, celë hi matre, thele jë eahlo la aqane troa amele nyën.

Hnei eahlo hna sile la ketre trengemel me pelethe axetin ej, matre thaa tro kö a lö tim. Thupene lai, hnei eahlo hna qatrei Mose me nue la trengemel ngöne la gaa hmu, nyipin la itre tilö ka cia xötreith la hneopegejë, Nil la ëjen. Ketre mina, hna upi Miriama xa i Mose troa hmekën ej, me wange la ewekë ka troa traqa.

Ame nekö i Farao jajiny, ka uti troa si. Ene pe öhne ju pe hi nyidroti la trengemel nyipin la itre tilö. Ame hnei nyidroti hna up la ketre hlue i nyiidro jajiny, me hape: ‘Tro jë troa xom la treng koi ni.’ Ame la kola fe la treng, öhne ju hi hnene la isola la ketre medreng ka mingöming! Kola treij hnei Mose, traqa ju hi la utipin kowe la joxu föe. Haawe xele ju kö la isola ma nue troa humuthi nyën.

Xulu jë hi Miriama. Hane hi cahu angeic ezine treng, ngöne la iatr. Hnei Miriama hna hnyinge kowe la nekö i Farao jajiny ka hape: ‘Aja i nyipoti kö tro ni a thele koi nyipo la ketre ifë medreng atre Isaraela, matre troa iji thin la medreng?’

Önine jë hi la joxu föe ka hape: ‘Ka loi.’

Ene pe hna nyinyap nyimenyim hnei Miriama troa thuemacan la thine i angeic. Traqa ha la thine i Mose, kola qaja hnene la joxu föe ka hape: ‘Xome jë la medreng celë nge hia nyëne ju thatraqai ni, nge tro ni a nyi thupene koi nyipo.’

Celë hi matre, hna ketre hia Mose kö hnene la sipu thine i angeic. Ame hë la kola tru hnei Mose, nyidroti pë hë a tro sai nyëne jë kowe la nekö i Farao jajiny, ene pe hna xome ju hë hnene la isola, matre nyine nekö i nyiidro. Celë hi matre, hna hetru Mose ngöne la uma i Farao.