ATRE hi nyipunieti cahu itre atr sine ithanata i Iakobo? Itretre thupë mamoe. Thupen la itre drai ne trongën Iakobo la jë i angeic ka nanyi catr, traqa ju pe hi a öhnyi angatr. Matre Iakobo a hnying ka hape: ‘Qai nyipunieti kaa?’

Öni angatr ka hape: ‘Qa huni Harana.’

Nge öni angeic koi angatr ka hape: ‘Atre Labana hi nyipunie?’

Hnei angatr hna sa ka hape: ‘Atre hi hun. Hane lai e Rakela nekö i nyidrë jajiny, a calemi fë la hnënge mamoe.’ Öhnyi Rakela hi nyipunieti e alemi trootro?

Ame la kola öhnyi Rakela hnei Iakobo e engëne trongën la itre mamoe i Labana, mathine i angeic, haawe, angeice a uligötrëne pi la etë ka thinge la ulane la tim, me tha imen la itre öni. Thupene lai, hnei angeice hna idremi me Rakela, me qaja la pengö i angeic. Atraqatr la madrine i Rakela, ene pe nyinyape ju troa thuemacanyi Labana keme i angeic.

Ketre tru mina fe la madrine i Labana, troa kepe Iakobo hnine la hnalapa i nyidrë. Pëkö ejolen koi Labana troa kapa la sipo i Iakobo, troa xomi Rakela. Ngo hnei Labana hna sipon koi Iakobo troa pane huliwa i nyidrë, sevene lao macatre nyine nyi june hmala i Rakela. Pine la etrun la ihnimi angeice koi Rakela, haawe angeice a kapa jë. Ngo ame hë la kola troa eatren la drai ne faipoipo, atre fe hi nyipunieti la ewekë ka traqa?

Hnei Labana hna hamën la nekö i nyidrë jajinyi ka tru, Lea la ëjen, ngo thaa Rakela ju kö, matre isazikeu hë memine lo hna ce axeciën ekö. Nge thupene jë hi lai, Labana a hamë Rakela hmaca ju fe, pine laka, ase hë Iakobo kapa troa huliwa, ketre sevene hmaca lao macatre. Ame ngöne la hneijine cili, Hna nue petre kö hnei Akötresieti tro la itre trahmanyi a nyimu föe. Ngo ame enehila, Tusi Hmitrötr a amekötin, tro pe hi a caa föe.