ATRE fe hi nyipunieti ka hape, drei la föe ngöne la iatr? Rebeka la ëje i nyiidro. Ame la trahmany hnei nyidroti hna tro qëmeke kow, tre Isaaka. Tro Rebeka a föi nyidrë. Hna tune kaa matre traqa pi tune lai?

Aja i Aberahama keme i Isaaka, troa thele föe loi thiina thatraqan la nekö i nyidrë trahmany. Thaa aja i nyidrëti kö tro Isaaka a faipoipo, memine la ketre jajiny ne Kanana ka hmi kowe la itre haze ka thoi. Celë hi matre hnei Aberahama hna qaja kowe la hlue i nyidrë ka hape: ‘Tro jë a tro Harana, nöje ne la lapang, nge tro eö a thele föi Isaaka neköng e cili.’

Ame hnene la hlue i Aberahama hna xome la treene lao kamela me tro, nge nanyi catr la hna tro kow. Traqa ha angeic easenyine la traon hna mele ngön hnene la lapa i Aberahama, nge angeic a pane mano ju ezin la ketre tim. Hnaipajö heji hë, ijine kola traqa itronyi la itre föe troa tha tim. Haawe hna thithi hnene la hlue i Aberahama koi Iehova, me qaja ka hape: ‘Epi troa nyi föi Isaaka la föe ka troa ithue imeng, me tha ime ne la itre kamela i eni!’

Haawe traqa pi hi Rebeka a jö tim. Ame hnene la hlue hna sipo ime i angeic kowe la föe, nyidroti a hamë angeice jë. Nge nyiidro hmaca fe a nyinyap, troa tha ime ne la itre öni i angeic. Thaa huliwa ka hmaloi kö la troa ithue ime ne la itre kamela, pine laka, itre ka tru hna iji timi nyudren.

Ase hë Rebeka tha ime ne la itre si ne la trahmany, nge nyidrëti a hnyingën la ëje ne la keme i nyiidro, me sipon maine ijije kö tro nyidrë a hane meköle pe, thene la lapa ne la föe. Öni nyidroti ka hape: ‘Bethuela la ëje ne la kemeng, nge hetre göhnë the hun.’ Atre hi la hlue laka, ame Bethuela, tre, nekö i Nahora, trejin me Aberahama. Celë hi matre angeic a sai watingöneca ju, me olen koi Iehova la hnei Nyidrëti hna eatrongë angeic kowe la itre sinee i Aberahama.

Ngöne la jidri cili, hnene la hlue hna thuemacanyi Bethuela me Labana trejin me Rebeka, la alien la tronge i angeic. Pëkö ejolene koi nyidro troa nue Rebeka, matre troa föi Isaaka. Nge tune kaa la mekuna i Rebeka? Ajane kö nyëne troa tro? Öni nyën ka hape: ‘Eje hi.’ Elanyi hë, kola hnëkëne la itre kamela, me nyiqaane trongën la gojenyi gaa nany kowe la nöje Kanana.

Traqa ha angatr nge jidrijidri hë. Kola öhne hnei Rebeka la ketre atr e tro ngöne la hlapa. Isaaka hi lai. Madri catre angeic la kola öhnyi Rebeka. Meci hë Sara thine i angeic, a köni macatre hë, nge tru pala kö la utipin thei angeic. Nge hanawang, traqa fë pi hi Rebeka la ihnimi ka tru, ene pe thue madrine i Isaaka hmaca jë.