AME ngöne la ketre ijin, hnei Mose hna tro kowe la wetr e Horeba, matre troa fejan la itre mamoe i angeic. Ame ju hi e cili, mama pi hi koi angeic la ukahlokine la eë kola palulu ngöne la isinöe ka ithiny, ngo thaa ae kö.

Öni Mose ka hape: ‘Tro ni a pane easeny me wang la ewekë atraqatre celë.’ Ame hi la angeic a traqa ezin, ene pe angeic a dreng la kola ithanata qa hnine la isinöe, me hape: ‘The easenyine kö la. Una pi lai lue trepene hnatrapaca i eö, qa ngöne la lue waca i eö, ke hmitrötre la hnepa dro hnei eö hna cile ngön.’ Akötresieti hi lai a ithanata jëne la ketre angela, nge Mose a he ju la qëmeke i angeic.

Thupene lai, hnei Akötresieti hna qaja ka hape: ‘Öhnë hë ni la aqane angazon la nöjeng e Aigupito. Celë hi matre, eni a troa uti troa thepe angatr qa ngöne la ime i angetre Aigupito, nge eö la hnenge hna troa up, matre troa elemeken la nöjeng me thepe angatr qaa Aigupito.’ Iehova a troa eatrongën la nöje i Nyidrë, a tro Kanana, ketre nöj ka mingöming.

Ngo Mose a qaja ka hape: ‘Drei ni? Tro ni a kuca tune kaa? Nge maine tro ni a tro. Tro ha qaja koi ni hnei angetre Isaraela ka hape: “Drei la ka upi eö?” Nge nemen la nyine tro ni a qaja?’

Akötresieti a sa ka hape: ‘Hanawang la nyine tro eö a qaja, “Hnei IEHOVA Akötresi Aberahama, me Akötresi Isaaka, me Akötresi Iakobo hna upi ni koi nyipunie.” ’ Nge Iehova a qaja fe ka hape: ‘Celë hi ëjeng epine palua.’

Ame hna sa hnei Mose ka hape: ‘Maine jë thaa tro kö angatr a mejiun laka, hnei Cilieti hna upi ni.’

Akötresieti a hnyinge jë, ka hape: ‘Nemene lai hnei eö hna xolouth?’

Öni Mose e sa, ka hape: ‘Sine tö.’

Öni Akötresieti ka hape: ‘Kuiëne pi e cahu hnadro.’ Ame hna kuiën hnei Mose, ene pe nyi un pena pi hi lo lai sine tö. Thupene lai, Iehova a amaman pena koi Mose la ketre iamamanyikeu. Nyidrëti a qaja ka hape: ‘Liine ju la wanakoime i eö hnine la iheetre i eö.’ Mose hi lai a drenge ju, nge ame la angeic a hule hmaca, kola wië la wanakoime i angeic, kösë lo xaca! Kösë lo hna tithi Mose pena ha hnei lepera, ketre mec ka ngazo. Thupene lai, hnei Iehova hna hamën koi Mose la men, matre ijije troa kuca la hnaakönine iamamanyikeu. Ame hë la pun, öni Nyidrëti ka hape: ‘Ame la eö elanyi a kuca la itre iamamanyikeu celë, haawe, tro angetre Isaraela a mejiun laka, hnenge hna upi eö.’

Thupene hë lai, hnei Mose hna bëeke hmaca kowe la hnalapa me qaja koi Iethero ka hape: ‘Eni a sipo nyipëti matre troa pane nue ni troa waipengön la itre sineng e Aigupito.’ Haawe, ame hna iahni hnei Iethero me Mose, me nue angeic tro hmaca Aigupito eë.