LUE macatre hë la, nge Iosefa pala hi e hnin la kalabus. Hna thëthëhmi angeic, hnene lo atre kepe trepe ime i Farao. Nge hanawang ngöne la ketre jidr, hna pu hnei Farao, lue pu, a kola ceitu me ewekë hna meköle goeën, nemen jë la alien la lue pu cili? Öhnyi Farao hi hnei epun, hane hi cahu kola meköl e hune la ibeetr. Hmakanyi hë, hnei Farao hna hën la itre atre i nyidrë asë ka inamacan, me qaja koi angatr la itre pu i nyidrë. Ngo pë pi kö ala caas e angatr ka atrein troa qejepengön itre ej.

Ene pe meku Iosefa jë hi, hnene la atre kepe trepe ime i Farao. Öni angeic koi Farao ka hape: ‘Ame ngöne lo eni e hnin la kalabus, hetrenyi la ketre atr ka atrein troa qaja la alien la itre pu.’ Farao a canga alö Iosefa pi, qa hnin la kalabus.

Öni Farao koi Iosefa ka hape: ‘Ame ngöne la pane pu i eni, hnenge hna öhne la seven lao kau ka pipixenyë, nge seven lao kau ka wahla nge ka wegeju. Nge hna öni lai seven lao ka pipixenyë, hnene lai seven lao ka wegeju.

‘Ame ngöne la hnaaluene pung, hneng hna öhn la seven lao iwene qitr ka themu me ka loi, kola cia ngöne la ene ka cas. Thupene lai, eni pena ha a öhne la seven lao iwene qitr ka ngazo me ka wahla. Ame hnene la itre iwene qitr ka ngazo, hna xeni ju lai seven lao iwene qitr ka themu me ka kökötr.’

Iosefa a qaja koi Farao ka hape: ‘Ame la lue pu i Farao tre, caasi hi la aliene lue ej. Ame lai seven lao kau ka pipixenyë memine lai seven lao qitr ka themu, tre, kola qaja la seven lao macatre. Nge ame lai seven lao kau ka wegeju memine lai seven lao iwene qitr ka wahla, tre, kola qaja la itre xaa macatre ka seven. Nge hanawang, kola traqa pi la seven lao macatre ne atraqatr la meledrai e Aigupito, thupene lai troa traqa la seven lao macatre ne troa jiin la nöj.’

Iosefa a qaja koi Farao ka hape: ‘Iëne jë la ketre atr ka atreine waiewekë me ka inamacan, nge upi angeice jë troa icasinekeun, me umën la nöjei xeni ngöne la itre macatre ne meledrai ka seven. Haawe, thaa tro kö a meci la itre atr ngöne lo sevene lao macatre ne troa jiin.’

Kola kapa hnei Farao la mekuna i Iosefa. Ame hnei nyidrë hna upi Iosefa troa hleme trongën la xen me xeen. Haawe, Iosefa ha la atr ka sisitria e Aigupito thupe i Farao.

Thupene hë la eitr lao macatre, ngöne la ijine jiin, hnei Iosefa hna öhn la kola traqa la itre trahmany e Aigupito. Atre angatre fe hi hnei nyipunie? Celë hi itre mama i angeic ka ala treen! Hna upi angatr Aigupito eë hnei Iakobo keme i angatr, pine laka, kolo ha nyiqaane simana la xeni e Kanana. Wanga atrehmekune ju hi Iosefa la itre trejin me angeic, ngo thaa wanga atrehmekunyi angeice kö hnei angatr. Atre fe hi epuni la kepin? Thupëtresiji ka tru hë Iosefa, nge ketre pengöne pena ha la aqane heetre i angeic.

Ene pe mekune hmaca jë hi Iosefa lo angeic ekö a co, lo angeic a puj la kola thil koi angeic, hnene la itre trejin me angeic. Mekune pala hi nyipunie lo pu cili? Kola trotrohnine hnyawa hnei Iosefa, laka, hetre kepin la Akötresie a upi angeic a tro Aigupito. Nemen la hna troa kuca hnei Iosefa kowe la itre trejin me angeic? Tro hmaca fe së a ce wang.