HANAWAI Mose, angeic a kötr qaa Aigupito. Öhne fe hi nyipunieti cahu itre trahmany ka weji angeic? Atre hi nyipunie la kepin matre angatr a ajan troa humuthi Mose? Pane ce wange jë së la ewekë ka traqa koi Mose.

Hnei Mose hna tru hnin la uma i Farao, joxu ne Aigupito. Ketre atr ka mama, hnene la inamacane i angeic. Atre hi Mose laka, thaa atre Aigupito kö angeic, ngo ame la sipu kem me thine i angeic, tre, itre hna thahluën, itretre Isaraela.

Traqa ha kowe la 40 lao macatre i Mose; ame ju hi la ketre ijin, angeic a mekune ju troa wange la pengön la nöje i angeic. Jole catre pi hë la aqane qanangazo angatr. Hnei angeic hna öhn la kola lep la ketre atre Isaraela, hnene la ketre atre Aigupito. Mose a goeëne ju xötreithi angeic, haawe pëkö atr, ene pe angeic a lep amecine ju lai atre Aigupito. Thupene jë hi lai, Mose a keleme ju lai atr ngöne la hnangöni.

Elanyi hë, hnei Mose hna lö hmaca pi troa wang la itre atr ne la nöje i angeic. Hnei angeic hna mekun ka hape, ijiji angeic troa xatua angatr, matre lö pi angatr qa hnine la ithahluë. Ngo ngazo pe, öhne jë hi angeic la lue thupëtresiji ne Isaraela e ifaitrë, ame hnei angeic hna qaja kowe la ka axulun la zön ka hape: ‘Pine nemen matre eö a lep la trejin me eö?’

Ame hna qaja hnene la trahmany ka hape: ‘Drei la ka acili eö troa musinë hun me ameköti hun? Hapeu, eö a mekun troa hane humuthi ni tun lo aqane humuthe eö lo atre Aigupito?’

Traqa ha la xou enehila koi Mose. Wanga atrehmekune hë angeic, laka, hetre ka atre hë la hnei angeic hna kuca kowe la atre Aigupito. Ketre, drei hnangenyëne fe hë Farao, ame hnei nyidrë hna athipi qan la itre trahmany troa humuthi Mose. Hane hi lai kepin matre kötre pi Mose qaa Aigupito.

Nanyi hë Mose qaa Aigupito, angeic a tro kowe la hnepe götran e Midiana. E cili hnei angeic hna iöhnyi memine la lapa i Iethero, nge hnei angeic hna ixom memine la ketre nekö i nyidrë jajiny, Zipora la ëjen. Hnei Mose hna thupën la itre mamoe i Iethero. Traqa koi 40 lao macatre ne mele angeic, ngöne la nöj e Midiana. Ame la ijine cili, kolo ha troa 80 lao macatre i angeic. Ame ngöne la ketre drai ne thupën angeic la itre mamoe i Iethero, öhne jë pe hi angeic la ketre ewekë ka ketre pengön, ketre ewekë ka troa saze la mele i Mose. Tro së a wang ej ngöne la götrane thupen, ene la ewekë ka ketre pengön ka traqa koi Mose.