ATRE fe hi nyipunie la hna kuca hnei Noa, ngöne lo angeic a uti pi qa hnine la aka? Hnei angeic hna pane kuca la ketre huuj koi Akötresie. Kola amaman hnene cahu iatr, la Noa a kuca la huuje i angeic. Nyimu öni hnei angeic hna huujën, matre troa olen koi Akötresie la hnei Nyidrëti hna amele angeic me hnepe lapa i angeic, qa ngöne la iwë ka tru.

Matre hapeu, hnei Iehova kö hna kapa la huuje i angeic? Eje hi. Nge ketre mina, hnei Nyidrëti fe hna ahnith koi angeic, ka hape, thaa tro hmaca kö Nyidrëti a apaatren la fen hnei iwë.

Weliwele hnyawa ha la ihnadro, nge Noa hmaca ha me hnepe lapa i angeic a nyiqaane mel e tröne la aka. Akötresieti a amanathithi angatr me qaja, ka hape: ‘Mana pi me hatr, me atiqane la fene hnengödrai.’

Ngo e drenge jë la itre atr elany la kola qeje iwë atraqatr, maine jë tro angatre lai a xouen e traqa hmaca pi la ewekë hnamecine cili. Celë hi la kepin matre, hnei Akötresieti hna hamën la ketre hatren, nyine troa amekunë angatr la hnei Nyidrëti hna thingehnaean, lo ka hape, thaa tro hmaca kö a traqa la ketre iwë atraqatr troa atuth la fen asë. Matre hapeu, atre fe hi nyipunie la hatren hnei Nyidrëti hna hamën? Ame la hatren hnei Nyidrëti hna hamën, tre, lewen.

E thupene la hna mani nge kola nyiqaane ciciny la jö, ene pe kola mama la lewen. Öhne fe kö nyipunie la emingömingön la nojei pengöne hane ne ej? Pane goeën ju caha iatr.

Drei la hna thingehnaean hnei Akötresie, kola hape: ‘Thaa tro hmaca kö a apaatren hnei iwë la nöjei atr asë me itre öni. Tro ha eje la lewen ngöne la iaw. Ame ngöne la ijin ej a mama, tre, mekune hmaca ju lo hnenge hna thingehnaean.’

Haawe, nemene la hna amekunë së hnene la lewen? Nyine troa amekunë së lo hna thingehnaean hnei Akötresie ka hape, thaa tro hmaca kö Nyidrëti a apaatren la fen hnei iwë.