MELEXÖNË hi troa mec hnene cahu itre atr. Loi e tro angatr a kötr, matre thaa tro kö a humuthi angatr. Itretre Isaraela angatr, hna upi angatr troa alamekën la nöj, nge ame cahu föe ka ixatua, tre, Rahaba. Ka lapa nyiidro ngöne la hna xupi hagene la lapa, e Ieriko. Tro pe së a ce wang la kepin, matre melexönë hi cahu itre atr.

Angetre Isaraela hë a troa tro sasaith la Hneopegejë Ne Ioridrano, matre lö jë ngöne la nöje Kanana. Ngo qëmekene lai, hnei Iosua hna pane upe la lue atr troa waipengön la nöj. Hnei angeic hna qaja koi nyidroti ka hape: ‘Tro jë troa alamekën la nöj memin la traon e Ieriko.’

Traqa ha nyidroti e Ieriko, ame hnei nyidro hna tro kowe la hnalapa i Rahaba. Ngo hna qejeqeje nyidro hnene la ketre atr kowe la joxu ne Ieriko me hape: ‘Hna traqa e kula jidr hnene la lue atre Isaraela troa alamekën la nöj.’ Ame hnene la joxu hna upe la itre atr troa wai Rahaba me qaja koi eahlo ka hape: ‘Lue atr ka lö kowe la hnalapa i eö, alö nyidroti pi!’ Ngo hnei Rahaba hna juetrë nyidro e koho hune la uma. Haawe, öni eahlo ka hape: ‘Hetrenyi la itre atr ka traqa koi ni, ngo thatre kö ni ka hape, itre ka xulu angatr qaa kaa. Tro angatr nge heji lapa, hmekune la kola thinge la iqanahage ne la traon. Maine tro nyipunie a nyinyape thenge angatr, atreine hi troa e angatr!’ Ene pe kola iweji thenge pi la itre hna upe hnene la joxu.

Koilo hë la itre hna upe hnene la joxu, ame hnei Rahaba hna tro nyimenyime kowe lo hune la uma, matre troa wange la luetre tro juetrë troa waipengön la nöj. Öni eahlo koi nyidro ka hape: ‘Atre hi ni laka tro Iehova a hamën la nöje celë koi nyipunie. Drenge hë huni la aqane aweliwelen Nyidrë la Hnagejë Ka Palulu, ngöne lo epuni a kötre qaa Aigupito, tune mina fe lo aqane humuthe Nyidrë lo lue joxu ne Sihona me Oga. Hnenge hna loi thiina koi nyipunie, haawe, epi isisinyikeu nyipunieti me eni, me thiina ka loi nyipunieti koi ni. Amele kaka me nenë, me itre xang, me itre trejine me eni.’

Ame hna isisinyikeu hnei nyidroti koi Rahaba, laka, troa eje la mekune i eahlo, ngo ame pe, tre hetre nyine tro Rahaba a kuca. Kola qaja hnene la lue ka tro juetrë troa alamekën la nöj ka hape: ‘Xome jë la eno ka paluluxötre celë me sile ej ngöne la mamala, me icasikeune asë ngöne la hnalapa i eö la itre sinee i eö asë. Nge ame la eahuni a bëeke hmaca troa thapa e Ieriko, tro huni a öhne la sine eno celë ngöne la mamala i eö, nge thaa tro kö huni a humuth la ketre e angetre lapa hnine la uma i eö.’ Bëeke hmaca ha la lue ka waipengön la nöj koi Iosua, ame hnei nyidro hna ithuemacanyin la ewekë ka traqa koi nyidro.