NYIMU traon ne Kanana ka nyiqaane cil troa isi me Isaraela. Itre ka mekun ka hape, atreine hi tro angatr a hun. Ngo thigaje pi pe hi la itretre Gibeona, angetre lapa ezin e Isaraela. Atre hnyawa hi angatr, ka hape, Akötresieti la xöle i angetre Isaraela, celë hi matre, thaa ajane kö angatr troa isi me Akötresie. Haawe, atre fe hi nyipunie la hna kuca hnene la itretre Gibeona?

Hetre aqane nyinyithina i angatr, ketre aqane ujë matre troa wanga atrehmekunyi angatr, kösë itre atr ka traqa qaa gaa nany. Hnene la itre xan e angatr hna heetrën la itre iheetr ka zezeny, me itre ibuutr ka aeae hë nge hna ijelekeun pë hë la itre sine götran. Hnei angatr hna ati ehnefën la itre boliko i angatr hnei itre ibëek ka hnyiqetr, me xomi kemej, falawa ka qiaqia ha. Thupene lai, hnei angatr hna tro koi Iosua me qaja ka hape: ‘Eahuni la a traqa qa ngöne la ketre nöj gaa nanyi catr, pine laka, drenge hë huni la pengö i Iehova Akötresi nyipunie ka pucatin asë. Drenge hë huni lo nöjei ewekë asë, hnei Nyidrëti hna kuca koi nyipunie e Aigupito. Qa ngöne lai, hnene la itre qatre huni hna upi huni troa xomi kemeji hun, me tro koi nyipunie me qaja ka hape: “Itre hlue i nyipunieti eahun. Isisinyikeu ju me eahun, laka thaa tro kö epuni a thele isi me eahun.” Nyipunie a öhne la itre iheetre hun laka, hnyiqetre menu hë, qa ngöne laka nanyi la nöje hun, nge tune mina fe la itre kemeji hun, catre hë me qiaqia.’

Hna kapa la hna qaja hnei angetre Gibeona hnei Iosua memin la itre qatr. Haawe, angatr a isisinyikeu ju matre hetre nyine enyipicin, laka, thaa tro jë kö angatr elanyi a isi me angetre Gibeona. Ngo köni drai hë e thupen, angatr a atre ka hape, ame angetre Gibeona, tre, thaa itre ka traqa kö qaa gaa nany.

Ene pe hnyingë angatre jë hnei Iosua ka hape: ‘Pine nemen matre nyipunieti a qaja koi hun ka hape, nyipunie a traqa qaa gaa nany?’

Öni angetre Gibeona ka hape: ‘Hne huni hna kuca la ewekë celë, ke, hne huni hna drenge laka hnei Iehova Akötresi nyipunie, hna ahnith troa hamën asë la nöje Kanana koi nyipunie. Celë hi matre, hne huni hna xouen e traqa pi nyipunie troa humuthi hun.’ Ngo kola metrötrën hnei angetre Isaraela lo hnei angatr hna isisinyikeu, matre thaa humuthe ju kö angatr lo lai angetre Gibeona. Ngo ame la sipu thupen, tro pë hë angatr a nyihlue i angetre Isaraela.

Ame la kola atre hnene la joxu ne Ierusalema ka hape, iloi hë angetre Gibeona me Isaraela, elë jë hi la hni angeic. Haawe, upe jë hi angeic la maca kowe la foa lao joxu, troa qaja ka hape: ‘Trohemi matre tro sa isi me Gibeona.’ Haawe ce xöle jë hi lai faifi lao joxu cili troa isi. Hapeu, ka inamacane kö la aqane ujë ne la angetre Gibeona, ene la hnei angatr hna thele troa ce mele tingeting me angetre Isaraela, ngacama troa thele isi me angatr hnene la itre joxu celë? Troa mama koi së la pengön e tro së a sisedrën.