NEMEN ewekë cahu? Pane hane wange cahu itre sooc ne Isaraela. Angatr a sa watingöne ca troa iji tim. Kola cile ezi angatr, hnei Gideona. Nyidrëti a goeën la aqane iji angatr la tim.

Goeëne hnyawa ju cahu itre aqane iji timi ne la itre sooc. Itre xan a thil timi eë, matre troa thinethinemën la tim. Ngo ame cahu ketre, kola iji la tim hune la ihnatrapaime i angeic, matre atreine angeic troa hmekën la ithupëjia. Ka nyipi ewekë catr koi Gideona, pine laka, qa ngöne la aqane iji tim ne la atr, ijiji angeic troa iën hmekuje hi la itre ka hmek. Ame pë hë itre xan, tro angatr a bëeke hmaca pe kowe la isa hnalapa i angatr. Tro sa ce wang la kepine lai.

Jole hmaca ha la aqane trongen la angetre Isaraela. Ase mina ha angatr thaa drei Iehova. Matre waja huji angatre ju me akötrë angatr hnei angetre Midiana. Haawe, Isaraela hmaca ha a xëwe me kötre mel koi Iehova, nge Nyidrëti a drenge la xëwe i angatr.

Iehova a upi Gideona jë troa icasikeun la 32 000 lao sooc. Ngo, ame kowe la trongene isi ka traqa troa icilekeu me Isaraela, tre ala nyimu catre kö angatr, 135 000 la etrun. Ngo Iehova a qaja koi Gideona ka hape: ‘Ala nyimu catr pala ha epun.’ Pine nemen matre Iehova a qaja tune lai?

Wanga tro Isaraela a mekun ka hape, angatr a hun hnene la hnei angatr hna sipu catr. Nge thaa wanga atrune hë laka, kola hun hnene la ixatua qaathei Iehova. Haawe, Iehova a qaja koi Gideona ka hape: ‘Qaja jë kowe la nöjei atr ka xou ka hape, isa bëeke hmaca jë koi hnalapan.’ Celë hi hna kuca lai hnei Gideona, ene pe 22 000 lao ka bëeke hmaca kowe la isa hnalapa i angatr. Matre kösë 10 000 pe hi la ka lapa matre troa isi memine lo lai itre ithupëjia me angatr ka ala 135 000 lao sooc.

Ngo drenge ju! Iehova a ulatin ka hape: ‘Ala nyimu catre pala kö epun.’ Celë hi matre Nyidrëti a amekötin koi Gideona troa upe la itre sooce i angeic troa iji tim, nge troa abëekën asë la itre sooc ka thili wewë troa thinethinemën la tim. Iehova a iahnikeu ju me hape: ‘Tro ni a kuca matre tro nyipunie a ngaan jën la ala köni hadredre itretre hmek ngöne la angatr a iji tim.’

Traqa ha la ijin troa isi. Gideona a thawa könin lai ala 300 lao sooc. Isa caa trutru i angatr me isa caa gee ka pë alien, matre troa amë e kuhu hnin la itre lamepa. Ame hë la kola nyipine jidr, angatr a cile xötreith la hna lapa hnene la itre sooc, itre ithupëjia me angatr. Ame hë la kola traqa la ijin troa isi, ene pe angatr a ufe la itre trutru, me akaqan la itre gee i angatr, me sieje draië me hape: ‘Taua i Iehova me Gideona!’ Ame hna mejë hmo hnene la itre sooc, nge angatr a inyinyapekeu me xou atraqatr. Angatr a ikötreny, ene pe thapa pi la isi hnei angetre Isaraela.