GOEËNE cahu angetre Isaraela kola tro sasaith la Hneopegejë ne Ioridrano! Ngo hna tro ië ju kö lo timi ne la hneopegejë cili? Kolo itre hneijine manie lapa ngöne la macatre, matre ame la itre hnepe menetr qëmeken tro la angetre Isaraela a tro thupa la hneopegejë, eje petre kö a elitrauj. Ngo kösë ju hi lo kola ue, nge qaqacile hnyawa ha! kösë hnyawa pi hi lo ihunahmej la hnei angetre Isaraela hna trongën, tune ekö lo angatr a tro thupa lo Hnagejë Ka Palulu! Hna tro ië ju hë la timi ne lai hneopegejë? Tro sa ce wang.

Traqa ha la ijin troa uti hnei angetre Isaraela kowe la Hneopegejë Ne Ioridrano, öni Iosua jë hi e qaja la trenge ewekë i Iehova: ‘Tro la itretre huuj a xututh la puha ne isisinyikeu, me tro fë qëmeke së. Nge ame la kola ketr hnene la itre lue ca i angatr la timi ne la hneopegejë, ene pe thaa tro ha neni la tim.’

Haawe, kola xututh hnene la itretre huuj la pua ne isisinyikeu, me tro pa fë ej qëmekene la nöj. Traqa ha angatr ngöne la ezin la hneopegejë, angatr a canga uti meköti pi kowe la tim. Ka elë me ihul la tim hnei angatr hna troa uti kow. Ame ju petre hi la kola ketr la tim hnene la itre lue ca ne la itretre huuj, hane hi lai ej a uti trootro! Drei la ketre iamamanyikeu! Pëhë jëne la tim troa neni, ase hë thinge jëne ej hnei Iehova. Ene pe co trootro ju pë hë, uti hë la qaqacile hnyawa la hneopegejë!

Ame hna cil hnene la itretre huuj fë la puha ne isisinyikeu, nyipine la hneopegejë ka weliwele hnyawa ha. Öhnyi angatre hi hnei nyipunie, e cahu ngöne la iatr? Angatr a cile thaa enij e cili, nge kola tro thupa hnei angetre Isaraela la hneopegejë a ka qaqacile hnyawa ha!

Traqa asë hë angatr ngöne la kete götran, ame hnei Iehova hna upi Iosua troa qaja kowe la 12 lao thupëtresij ka hape: ‘Trootro jë kowe la hna cile hnene lo itretre huuj memine la puha ne isisinyikeu. Xome jë la 12 lao etë, nge ajöne jë kowe la götran hnei epuni hna troa meköl, ngöne la jidri celë. Maine tro la itre nekö i epuni elany a hnyingë kepin la itre etë celë, tro epuni a qaja koi angatr ka hape, hna cile la tim ngöne la kola tro thupa la Hneopegejë Ne Ioridrano, fë la puha ne isisinyikeu i Iehova. Nge itre etë lai ka troa amekunë nyipunieti fe la iamamanyikeu cili!’ Iosua a hane trane ju fe la 12 lao etë, ngöne lo hna cil hnene la angetre xututh lo puha.

Ame hë thupene lai, Iosua a qaja jë kowe la itretre xututh la puha ne isisinyikeu ka hape: ‘Elë jë qaa Ioridrano.’ Nge traqa ha angatr ngöne ketre götran la hneopegejë, ame hna kaca hmaca pi la timi ne Ioridrano.