KOLA thele jën hnei Saulo troa xölehuji Davita. Hnei nyidrë hna iën la 3 000 ngöne la itre sooce i nyidrë ka catr, matre weji Davita. Atrepengöne hë Davita, ame hnei angeic hna upe la itretre tro juetrë, matre troa alamekën la hnei Saulo me itre sooce i nyidrë hna troa mano ngöne la jidr. Thupene lai Davita a hnying kowe la lue sine ce tro i angeic, me hape: ‘Drei la ka pi ce tro me eni kowe la hna mano hnei Saulo?’

Kola sa hnei Abisai ka hape: ‘Tro ni.’ Ame Abisai, tre, neköne la xa i Davita, Zeruia la ëjen. Traqa ha Davita me Abisai, nge kola iwatramekölenyi hnei Saulo me itre sooce i angeic. Ame hnei nyidroti hna tro thaup, uti hë la traqa nyidro ezi Saulo. Nyidroti a xome jë la jo me ge i nyidrë, hna amë ngöne la tane la he i Saulo. Pë pi kö caa ka öhn maine drenge pena la nyidroti a tro, pine laka, itre ka hmulizië asë hi angatr.

Hane hi caha e Davita me Abisai. Lue ka kötr matre traqa ha nyidroti troa zae hune la ketre sasala. Haawe, Davita a sue koi Abinera tan la trongene isi Isaraela, me hape: ‘Abinera, pine nemen matre thaa thupën hnyawa kö nyipë la tixe i nyipë ene la joxu? Goeëne ju! Ekaa ha la jo me ge i nyidrë?’

Hlë hë Saulo. Nyidrëti a wanga atrehmekun la nin aqane ithanata i Davita, me hnying ka hape: ‘Davita, eö kö lai?’ Hane hi cahu e Saulo me Abinera, öhne fe hi nyipunie?

Davita a sa koi Saulo ka hape: ‘Eje hi, joxu tixeng.’ Nge Davita a hnying ka hape: ‘Pine nemen matre nyipëti a thel troa xölehuji ni? Nemen la ewekë ka ngazo hnenge hna kuca? Hanawang la jo i nyipë, joxu. Upe jë la ketre sooce i nyipë matre troa xome ej.’

Traqa ha la wanga atrehmekune koi Saulo, öni nyidrëti jë hi, ‘Ngazo la thiinang. Tria la aqane ujëng.’ Thupene lai, Davita a xötrëne jë la gojenyi angeic, nge Saulo a bëeke hmaca jë kowe la hnalapa i angeic. Ngo Davita a qaja e kuhu hni angeic ka hape: ‘Tro petre kö a traqa elany la ketre ijin tro Saulo a humuthi ni. Loi e tro ni a kötr kowe la nöje i angetre Filisiti.’ Nge hnei angeice hna trongën lai mekune cili. Hna nyinyithina hnei Davita, me iaön la itretre Filisiti, matre ame la mekune i angatr ka hape, ce angatre hë me Davita.

Matre ame ngöne la ketre ijin, hna elë hnei angetre Filisiti troa isi me Isaraela. Hna humuthi Saulo me Ionathana ngöne la isi cili. Tru la hleuhleu koi Davita, matre sile jë pë hë angeic la ketre nyima ka lolo catr; önine la itre trenge ewekën, ka hape: ‘Eni a hleuhleu pi eö, Ionathana trejin me ini. Ka tru catre eö koi ni!’

Thupene hë lai, Davita a bëeke hmaca Isaraela eë, me lapa e Heberona. Kola isi hnene la itre ka aja Iseboseth nekö i Saulo troa joxu, memin la itre xan ka ajan tro Davita a joxu. Ngo hna hun hnene la itre atre i Davita. Thötre hë lao macatre i Davita, qa ngöne lo kola acili nyidrë troa joxu. Hnei nyidrë hna joxu e Heberona, seven lao macatre nge sin. Hna hnahon e cili la itre xaa nekö i nyidrë trahmany, ene Aminona me Abasaloma, me Adonia.

Traqa ha la ijin kola tro hnei Davita memin la itre atre i nyidrë, troa thapa e Ierusalema, ketre traon ka lolo. Ame la ka elemeken la isi tre, Ioaba, utha e Davita nge ketre nekö i Zeruia xa i Davita. Hnei Davita hna nyi june koi Ioaba, a hna acili angeic troa tane la trongene isi nyidrë. Enehila, Davita hë a musi hune la traon e Ierusalema.