MAINE meci pi hi nyipunie, nge amele nyipunieti hmaca jë hi, tune kaa la aqane troa ujë la thine i nyipunie? Thatreine jë kö troa qejepengön la madrine i nyiidro! Ngo, hapeu, atreine kö tro la atr ka mec a mele hmaca? Hna traqa tune lai ekö?

Hanawange cahu trahmany ngöne la iatr, nge caa föe fe memin la ketre nekönatr trahmany. Ame lai qatre trahmany, tre, Elia perofeta. Nge ame lai föe ka haluth la nekö i nyiidro, tre, ketre sine föe ne la traon ne Sarepeta. Ame ngöne la ketre drai, hna wezipo hnene lai nekönatr. Ngazo catre jë hi la kucakuca i nyën, uti fe hë la meci nyën. Thupene lai, kola qaja hnei Elia kowe la föe ka hape: ‘Awe jë la nekönatr koi ni.’

Xome jë hi la nekönatr ka meci hnei Elia, me elë fë kowe la hnahag, me ameköle nyën hune la ibeetr. Öni nyidrëti jë hi e thith ka hape: ‘Iehova fe, epi amelene hmaca hnei Cilie la nekönatr.’ Ame hna nyiqaane troa mano hmaca la nekönatr! Elia hmaca hi lai a uti fë pi la nekönatr, me qaja kowe la föe ka hape: ‘Hanawang, mele kö la nekö i eö!’ Celë hi kepin matre, atraqatr la madrin ne la thin.

Elisaia fe la ketre perofeta i Iehova ka tru. Nyidrëti fe a hane xatua Elia. Hnei Iehova hna hane aijijë Elisaia, troa kuca la itre iamamanyikeu. Ame ngöne la ketre drai, kola tro hnei Elisaia kowe la ketre traon ne Sunema, me lapa thene la ketre föe ka lapaa kepe nyidrëti pala hi ngöne la hnalapa i nyiidro. Hna hnahon hnene lai föe, la ketre nekönatr trahmany.

Tru hë la nekönatr, nge nyën a tro jë troa wai keme i nyën e huliwa ngöne la hna eëny. Ene pe traqa ju hi la mec kowe la nekönatr, nge nyën a thë me hape: ‘Kola akötr la heng!’ Hna canga nyinyape sai nyën kowe la hnalapa, ngo meci pi kö nyën. Hleuhleu atraqatr kowe la thin! Ame hna canga tro nyimenyim hnene la thin, troa thei Elisaia.

Traqa ha Elisaia, nyidrëti a tro kowe la hnahag hna amekölen la nekönatr ka mec. Nyidrëti a thithi jë koi Iehova, me meköle hune la ka mec. Ame hna nyiqaane idreuthi hmaca la ngönetrei ne la nekönatr, nge nyën a asevene lao hatinyö. Ketre pengöne kö la madrin ne la thin, ngöne la nyiidro a traqa me öhne laka mele hmaca ha la nekö i nyiidro!

Nyimutre catr la itre atr ka meci hë. Celë hi kepin matre kola hleuhleu la itre lapa i angatr, memine la itre sinee i angatr. Pëkö mene së troa amelene hmaca, la itre ka meci hë. Ngo ame Iehova, atreine hi Nyidrë. Tro hmaca pë hë së a ce wang la aqane tro Akötresie a amelene hmaca la itre atr ka nyimutre, traqa koi itre milio la etrun.