BËEKE hmaca ha la angetre Filisiti troa isi me angetre Isaraela. Köni trejin me Davita ka hane sin la trongene isi i Saulo. Matre, ame ngöne la ketre drai, kola qaja hnei Iese koi Davita ka hape: ‘Xome jë la itre xaa qiitr me itre falawa kowe la itre trejin me eö. Nge pane wange ju la pengö i angatr.’

Ame la kola traqa hnei Davita ngöne la hna lapa hnene la trongene isi i Saulo, angeice hi lai a nyinyape thele jë la itre trejine me angeic, ngöne la hna isi. Nge e cili, kola tro koi angetre Isaraela hnene la ketre atre Filisiti, ketre atr atraqatr nge ka qea hmae, Goliatha la ëje i angeic, nge angeic a nyiisi angatr. Thiina i angeice lai e nöjei drai, hmakanyi me hej, 40 hë lao drai ne hë isi. Tro pala hi angeic a sue, me hape: ‘Iëne jë thei nyipunie la ketre atr matre troa isi me eni. Maine tro angeic a hun me humuthi ni, tro hë huni a itre hlue i nyipunie. Ngo maine tro ni a hun, me humuthi angeic, tro epuni a itre hlue hun. Upe pi la ketre qaathei epun matre troa isi me eni.’

Davita a hnyinge kowe la itre xaa sooc, me hape: ‘Nemen la hna troa kuca kowe la atr ka troa humuthe la atre Filisiti celë, nge ka troa apaatren la hmahma ka ej thene la angetre Isaraela?’

Önine jë hi la itre soc, ‘Tro Saulo a hamën la itre trenga mo ka tru. Nge tro fe angeic a hamën la nekö i angeic jajiny.’

Ngo kola xoue Goliatha hnene la angetre Isaraela asë, hnene la hmae i angeic, ketre atr ka qea dridri nge ka fetra etin. Troa traqa koi 3 met la eqea i angeic, nge hetre ketre sooci kö atre kapa trongën la nyine petre i angeic.

Ame hna tro hnene la itre xaa sooc troa qaja koi Saulo ka hape, Davita a ajan troa isi me Goliatha. Ngo Saulo a qaja koi Davita ka hape: ‘Thatreine kö eö troa isi memine la atre Filisiti celë. Nekönatre eö, nge ame Goliatha, tre, ketre sooc angeic ngöne la mele i angeic.’ Ene pe Davita a sa ju me hape: ‘Hnenge hna humuth la ketre bea memin la ketre liona ka thapa la ketre mamoe i kaka. Nge tro ni a humuth la atre Filisiti celë, tune la aqane kuca ni kowe lo lai itre öni cili. Tro Iehova a xatua ni.’ Haawe, Saulo a qaja ka hape: ‘Tro jë, nge epi tro Iehova a ce me eö.’

Ame hnei Davita hna tro pi kowe la ketre hneopegejë, me iën la faifi lao wene etë ka jijia, me qatreng hnine la watrenge i angeic. Thupene lai, angeic a tro xom la trehle i angeic, me tro meköti troa ixelë me Goliatha. Ame ngöne la kola öhnyi angeic hnei Goliatha, hane hi lai kola iwangesixa. Angeic a mekun ka hape, pëkö pengön e troa humuthi Davita.

Öni Goliatha ka hape: ‘Alemi jë, matre tro eö a nyi öni ne la itre waco me itre xaa öni ju kö.’ Ngo Davita a qaja ka hape: ‘Eö a traqa koi ni memin la taua, me ixoza me jo, ngo ame ni, tre, eni a traqa koi eö, cememin la ëje i Iehova. Enehila tro Iehova a nue eö koi ni, nge tro ni a lepe ameci eö.’

Haawe Davita a nyinyape pi koi Goliatha. Hnei angeic hna xom la caa wene etë qa hnine la watrenge i angeic, me hnaan la trehle i angeic, me xomi trenge catr troa than ej koi Goliatha me nue asë la trenge catre i angeic. Tro meköti jë hi la wene etë a lapa nyipin me lö hnine la göpadri Goliatha, ene pe kei ju hi angeic a meci ju kö! Ame la kola öhn hnei angetre Filisiti ka hape, kei hë lo atr hnei angatr hna mejiune kow, hane hi lai angatr a ikötreny. Nge kola iweje huzu hnene la angetre Isaraela, nge hunë hë angatr ngöne la isi.