THUPENE la hna meci hnei Ieroboama joxu, pë hmaca ju kö ketre joxu ka loi e angatr, angetre musi hune la baselaia ne la 10 lao tribu ne Isaraela, itre ka ngazo asë hi angatr. Ahaba hi la ka ngazo catr. Atre fe hi nyipunieti la kepin? Ame nyidrë, hna musinën hnei isola, ene Iezebela.

Thaa föe ne Isaraela kö Iezebela. Joxu ne Zidona la keme i nyiidro. Ka hmi nyidroti kowe la ketre haze, Baala la ejen, nge asë hë nyidroti huli Ahaba memin la itretre Isaraela ka nyimutre, troa hane thili kowe la haze i nyiidro. Ka methinë Iehova catr lae Iezebela, matre hnei nyiidro hna humuth la itre perofeta i Nyidrë ka nyimutre. Hnene pë hë la itre xaa perofeta, hna zae hnine la itre hnaop, matre mele ju pe kö angatr. Maine kola piin hnei Iezebela la ketre ewekë, nyidroti a humuthe pi lai atrekë ewekën, matre troa xom la mo i angeic.

Ame ngöne la ketre drai, hleuhleu la qemëke i Ahaba. Matre hna hnying hnei Iezebela koi nyidrë ka hape: ‘Pine nemen matre eö a hleuhleu enehila?’

Kola sa hnei Ahaba ka hape: ‘Pine la ewekë hna qaja koi ni hnei Nabotha. Hnenge hna ajan troa itön la hnënge vine i angeic. Ngo öni angeic ka hape, thatreine kö troa hamën hnei angeic koi ni.’

Öni Iezebela jë hi koi Ahaba ka hape: ‘The seseue kö. Tro ni a xom ej koi eö.’

Thupene jë hi lai, Iezebela a cinyanyi pi kowe la itre xaa tixene lapa ne la traon, hna mele ngön hnei Nabotha. Öni nyidroti koi angatr ka hape: ‘Xome jë la itre xaa atr ka pë hnënyöngön me upi angatr troa qaja ka hape, hnei Nabotha hna jele ngazo Akötresie memine la joxu. Thupene lai, alö Nabotha pi a tro trön la traon, me tranyi angeic hnei etë uti hë mec.’

Atre hë Iezebela laka meci hë Nabotha, ame hnei nyidroti hna qaja koi Ahaba ka hape: ‘Enehila, tro jë hë troa xom la hnënge vine i angeic.’ Hane petre hi la ketre föe hmo, ijijë hë troa nyithupen koi Iezebela thenge la ngazo i angeic, tune ka fe la mekun i nyipunie?

Haawe, traqa ha la ijin, ame hnei Iehova hna upi Iehu troa nyithupene koi Iezebela la ngazo i nyiidro. Drengë hë Iezebela ka hape, Iehu hë cahmijë, ame hnei nyiidro hna nyihan la lue ezine meke i nyiidro, me kuci lolo, matre amingömingön la ngönetrei i nyidro. Ngo ame la kola öhnyi Iezebela e tue ngöne la mamalama hnei Iehu, angeic a sue kowe la lue trahmany hnine la uma me hape: ‘Kuië angeice pi!’ Angatre hi lai a drengethenge ju, tune la aqane amaman hnene cahu hna siji iatr. Ame hnei angatr hna kuië nyiidro, a meci ju kö. Hane hi lai pune koi Iezebela, ketre isola nge joxu ka ngazo catr.