HANAWANG cahu, kola nei wakacu maine oel hnei Samuela hune la he ne la trahmany. Aqane kuca lai nyine amaman ka hape, hna iën la atr troa joxu. Samuela a trongën la hna amekötine hnei Iehova, ene la troa fi Saulo. Kola nenge la ketre oel ka ketre pengön, nge ka pui lolo catr.

Thaa mekune kö Saulo ka hape, ijiji nyidrë troa hane joxu. Ene pe öni nyidrë koi Samuela ka hape: ‘Ka xulu ni qa ngöne la tribu i Beniamina, celë pe hi tribu ka co catr ngöne la nöjei tribu e Isaraela. Pine nemen matre nyipëti a qaja ka hape, tro hë ni a joxu?’ Iehova la ka aja Saulo, pine laka, ka pë mejen nge ka thaa nyi tru kö. Celë hi kepin matre, Nyidrëti a ië angeic troa joxu.

Thaa ka puafala kö Saulo, ketre thupëtresiji pe ka fetra etin. Ka xulu angeic qa ngöne la ketre hnepe lapa ka trena mo, nge ka mingöming me ka tru matran. Ketre atr ka hoea hmae hune la nöjei atr asë e Isaraela! Pëkö atrein wajan e troa nyinyap, nge i tru trenge catr pena. Kola madrin hnene la nöj, laka, hna ië Saulo hnei Iehova troa joxu. Ame hnei angatr asë hna sue ka hape: ‘Epi mele aqeany la joxu!’

Catre catr pala hi la itre ithupëjia me Isaraela. Thaa mano kö angatr iakötrë. Kolo petre hi a cile hnei Saulo troa joxu, nge traqa pi hi angetre Amona troa isi me angetre Isaraela. Ame hnei Saulo hna hnëkën la ketre itrongene isi ka tru, nge angatr a thapa pi la isi. Hane hi lai ketre kepin matre madrin la nöj, laka, Saulo la joxu i angatr.

Kola tro la itre macatre, nge Saulo la ka elemeken la trongene isi angetre Isaraela, nge angatr a thapa la itre isi ka nyimutre. Hetrenyi la ketre nekö i Saulo, Ionathana la ëjen, ketre thupëtresij ka catr. Nge Ionathana a xatua Isaraela, troa thapa la itre isi ka nyimutre. Angetre Filisiti pala hi la ithupëjia me angetre Isaraela, lue ka imethinë catr. Ame ngöne la ketre drai, hnei angatr hna traqa troa isi me Isaraela, itre thauzan la etrun la itrongene isi angatr.

Hna ahni maca koi Saulo hnei Samuela troa itreqe, matre tro nyidrë a pane hamën la ketre ahnahna, me huuj koi Iehova. Ngo hna nango hmitr hnei Samuela. Ene pe xou i Saulo ju hi, kola mekune ka hape, wanga nyiqaane ju la isi hnei angetre Filisiti, haawe, hnei angeic hna ketre sipu hamëne ju la huuj koi Iehova. Traqa ha Samuela nge ase hë hamën la huuj hnei Saulo, thaa madrine kö nyidrë, pine la hna thaa idrei hnei Saulo. Kola qaja hnei Samuela ka hape: ‘Tro Iehova a iën la ketre atr matre troa joxu hui Isaraela.’

Nge thupene hmaca jë hi lai, Saulo hmaca a thaa idrei. Haawe öni Samuela jë koi angeic ka hape: ‘Sisitria kö e troa drengethenge Iehova, hune la troa hujën koi Nyidrë la itre mamoe ka lolo. Pine laka, hnei eö hna thaa drengethenge, tro Iehova a xome qaathei eö la götrane qa ne joxu ne Isaraela.’

Loi e tro sa xomi ini qa ngön la ewekë celë. Kola amaman koi së ka hape, nyipi ewekë catre kö la troa drengethenge Iehova o drai. Ketre, kola amamane fe ka hape, maine ka loi la qaan, tui Saulo, ngo atreine hi troa ujë matre ngazo la pun. Epi thaa tro kö së a hane tune lai!