KÖSË lo ka troa ngazo hnei Daniela. Ngo thaa heji angeice pi kö hnene la itre liona! Atre fe hi nyipunieti la kepine lai? Drei la ka umë Daniela e cili hnine la ope liona? Tro pe së a ce wang.

Dariu la joxu ne Babulona ngöne la ijine cili. Hna pane kepe Daniela hnei Dariu pine la eloin la thiina i angeic, nge ketre, ka inamacane catre angeic. Dariu a ië Daniela troa hane cilëne fe la baselaia i nyidrë. Ngo tru catr la itre atr ne la baselaia ka zalu koi Daniela, ene pe angatr a ami thethi angeice ju.

Hnei angatr hna tro koi Dariu, me qaja ka hape: ‘Caasi hë hun, eahuni a mekun ka hape, loi e tro nyipë a acil la ketre wathebo, göi troa thinge kowe la nöjei atr, matre ame ngöne la 30 lao drai, thaa tro kö la ketre a thith kowe la ketre haze, maine ketre atr, ngo koi nyipëti hmekuje hi. Ame la atr ka thaa drengethenge la hna amekötine cili, tro ha kuië angeic hnine la ope liona.’ Thatre kö Dariu la alien la acili wathebo ne la itre atr cili. Matre nyidrëti pena kö a mekun ka hape, ketre mekune ka loi, ame hnei nyidrëti hna iupi jë troa cinyihane lai wathebo. Haawe, cilë hë la wathebo nge pë hmaca kö ka atreine troa saze ej.

Drenge fe hë Daniela la pengöne lai wathebo ka hnyipixe, angeic a tro pi kowe la uma i angeic, me thithi tune lo hnei angeic hna majemin. Atre hnyawa hi lo lai itre atr ka imethinë me angeic ka hape, thaa tro jë kö Daniela a hmaca qa ngöne la hnei angeic hna majemin ka loi, ene la troa thith koi Iehova. Madrine catr angatr, pine laka, kösë kolo ha ie lo mekuna i angatr.

Ame la kola atre hnei Dariu la kepin matre kola ajan hnene lo lai itre atr troa acil la wathebo, hane hi lai kola hace la hni nyidrë. Ngo thatreine hmaca kö nyidrë troa saze la wathebo, ame hnei nyidrëti hna iupi jë troa kuië Daniela hnine la ope liona. Ngo kola qaja hnene la joxu koi Daniela ka hape: ‘Epi tro la Akötresie hnei eö hna nyihluen a amele eö.’

Thaa meköle kö Dariu ngöne la jidr, ke nyidrëti a hleuhleu. Traqa ha e hmakany, ame hnei nyidrëti hna canga nyinyap kowe la ope liona. Nyipunie a öhnyi nyidrë e celë. Nyidrëti a ewekë catr me qaja ka hape: ‘Daniela, hlue ne la Akötresie ka mel! Hapeu, atreine ju kö la Akötresi eö amele eö qaathene la itre liona?’

Öni Daniela e sa ka hape: ‘Hnei Akötresie hna upe la angela i Nyidrë, me ahumun la që ne la itre liona, matre thaa heji ni ju kö hnene itre ej.’

Atraqatr la madrin ne la joxu. Ame hnei nyidrëti hna iup troa huli Daniela qa hnine la hnaop, me kuiën hmaca pena ha lo itre atr ka upe zö Daniela. Nanyi petre kö angatr kowe la trepen la hnaop, nge ase fe hë trapuja angatr me hutr amudromudron la itre ijune i angatr hnene la itre liona.

Thupene lai, Dariu joxu a cinyanyi kowe la itre atr asë ngöne la baselaia i nyidrë, me hape: ‘Ini a acil la wathebo ka hape, tro asë hi la nöjei atr a metrötrën la Akötresi Daniela. Nyidrëti a kuca la itre iamamanyikeu. Hnei Nyidrëti hna amele Daniela me thepe angeic qa ngöne la që ne la itre liona.’