KOLA ue jë cahu? Kola xeni imadri hnene la itre atr. Hnene la joxu ne Babulona hna könën la itre atr ka tru ne la nöj, traqa koi itre thauzan la etrun. Angatr a iji ngöne la itre inege gool me sileva, hna thöeën qa hnine lo ēnē i Iehova e Ierusalema. Ngo, angatr a xeni madrin, nge mama pi hi la uke hene wanakoime i atr, a kola cinyanyin la ngöne uma. Ame hna xou atraqatr la itre atr.

Kola joxu ngöne la ijine cili hnei Belesaza, api Nebukaneza. Nyidrëti a suen ka hape, troa canga theng la itre atre i nyidrë ka inamacan. Öni nyidrë ka hape: ‘Ame la atr ka atrein troa e la hna cinyihan me qaja koi ni la aliene ej, tro ni a hamën koi angeic la itre ahnahna ka nyimutre, nge tro angeic a cilën la hnaakönine göhnë ne la musi ngöne la Baselaia.’ Ngo pë pi kö ala caasi e angetre inamacan, ka atrein troa qaja la alien la hna cinyanyin.

Kola dreng hnene la thine ne la joxu la mejene ilu ilu, nge nyidroti a tro pi kowe la hnë xen. Öni nyidroti kowe la joxu ka hape: ‘The xou kö. Hetrenyi la ketre atr hnine la baselaia i eö ka atre la itre haze ka hmitrötr. Ame ngöne lo ijine musi Nebukaneza qaaqai eö, hnei nyidrëti hna acili angeic troa hen ne la itre atr ka inamacan asë. Daniela la ëje i angeic. Iupi jë troa thei angeic, nge tro hë angeic a qaja koi eö la alien la itre hna cinyihane cili.’

Traqa ha Daniela. Thupen la hnei Daniela hna thipën la itre ahnahna, angeic a nyiqaan troa qaja la kepin matre, Iehova a ukapië Nebukaneza qa ngöne la theron ne la baselaia i Nyidrë. Öni Daniela ka hape: ‘Ka pi tru catre nyidrë. Nge hnei Iehova hna hamën la pune koi nyidrë.’

Kola qaja hnei Daniela koi Belesaza ka hape: ‘Ngo atre asë hi nyipë la itre ewekë ka traqa koi nyidrë, nge nyipëti hmaca kö a pi tru tune la qaaqa i nyipë. Hnei nyipë hna xom la itre inege memin la itre kap qa hnine la ēnē i Iehova, nge hnei nyipë hna ij hnin itre ej. Hnei nyipë hna atrun la itre haze sinöe memine la itre haze etë, nge thaa hane kö nyipë atrun la Atre Ixup Ka Tru. Celë hi kepin matre, hnei Akötresie hna iupi troa cinyanyin la itre trenge ewekë celë.’

Öni Daniela ka hape: ‘Hane hi la alien la trenge ewekë ka hape: MENĒ, MENĒ, TEKEL, UFARESIN.’

‘Ame la MENĒ, tre kola hape, ase hë Akötresie e drain la baselaia i nyipë me nyipune ej. Ame TEKEL, tre kola hape, ase hë tuluthi nyipë ngöne la tulu, nge hna öhnyi nyipë a thaa ka loi kö. Ame UFARESIN, tre kola hape, ase hë kuie la baselaia i nyipë, me hamën koi angetre Madai me Peresi.’

Kolo petre kö a ithanata hnei Daniela, nge kolo ha nyiqaan troa utin me thapa la traon e Babulona hnei angetre Madai me Peresi. Angatr a thapa pi la traon, me humuthi Belesaza. Eatre ju fe kö lo lai hna cinyihan, ngöne la jidri cili! Ngo nemen la ka troa traqa koi angetre Isaraela e thupene lai? Tro pë hë së a ce wange hmaca pe, ngo ame la hnapan, tro sa pane ce wang la ewekë ka traqa koi Daniela.