HANAWANG cahu ketre nekönatr, kola ithanata kowe la itre qatr. Itre ka hamë ini angatr hnine la ēnē i Akötresie e Ierusalema. Nge ame la nekö trahmany, tre, Iesu. Nyidrëti pala hi a tru trootro. Traqa ha kowe la 12 lao macatre i nyidrë.

Kola hain hnene la itretre ini, la aqane atre pengöi Akötresie hnei Iesu, memine fe la etrun la aqan trotrohnine i nyidrë la itre hna cinyihan hnine la Tusi Hmitrötr. Ngo pine nemen matre isa tro pi nyidrë me Iosefa me Maria? Ekaa nyidro? Tro sa ce wange lai.

Ame ngöne la nöjei macatre, Iosefa a ce tro Ierusalema eë memine la hnepe lapa i nyidrë, matre tro pala hi a sine la ketre feet nyine atrun, ene la paseka. Nanyi catre Ierusalema qaa Nazareta. Pë pala kö loto, nge ketre pëkö tërë. Itre ewekë lai ka pë petre kö ngöne la itre ijine cili. Kolo hi a trongë ihnadro hnene la nöjei atr ka ala nyim, kösë traqa koi köni drai ne troa tro uti hë Ierusalema.

Kolo pala hi a tru trootro la hnepe lapa i Iosefa. Matre tru la itre nyine troa thupën, ene la itre xaa trejin me Iesu trahmany me jajiny. Haawe, kola hmaca qaa Ierusalama me bëeke Nazareta eë hnei Iosefa me Maria me haa nekö i nyidro. Nyidroti a mekun ka hape, Iesu fe e hnin la itronge i angatr. Ene pe hejiheji hë, nyidroti a pane mano, ngo thaa öhnyi Iesu pi kö hnei nyidro. Nyidroti a thele nyidrëti jë thene la itre sinatro me itre enehmu i nyidro, ngo paatre fe kö nyidrë! Hane hmaca hi lai Nyidroti a ithel Ierusalema eë.

Hnei nyidroti hë hna ce öhnyi Iesu memine lo itretre ini. Nyidrë a drei angatr, me hane hnying. Nge angatr asë hi a sesëkötr me hain la inamacane i Iesu. Ame hnei Maria hna qaja ka hape: ‘Neköng, hna uë eö laka tune lai koi nyiho? Hanawang qange hë me keme i eö hna thele treijë eö.’

Öni Iesu e sa ka hape: ‘Hnauëne laka thele ni hnei nyipo? Thatre kö nyipo laka, qange troa lapan la uma i Kaka?’

Nyipici, aja i Iesu troa lapa ngöne la hnë troa inin la itre ewekë göi Akötresie. Hapeu, thaa celë jë fe kö la aja së lai? Ame hë la angatr e Nazareta, pëkö hnei Iesu hna hane paatr ngöne la nöjei icasikeu e nöjei wiik. Haawe, qa ngöne la aqane nyipiewekën nyidrë la hmi koi Akötresie, ene pe atre hnyawa jë hi nyidrëti la itre ewekë ka nyimutre hnine la Tusi Hmitrötr. Loi e tro sa tui Iesu me xötrethenge la tulu i nyidrë.