KOLA mano hnei Iesu ezin la ketre ani ne Samaria. Itretre drei nyidrëti hë ngöne la traon troa itö xen. Ame la föe hnei Iesu hna ithanata memin, tre eahlo a traqa troa tha tim. Öni nyidrëti koi nyiidro ka hape: ‘Thue imeng.’

Kola sesëkötr hnene la föe. Atre hi nyipunie la kepin? Atre Iudra Iesu, nge föe ne Samaria eahlo. Nge itre treme imethinën la angetre Iudra, me angetre Samaria. Matre ewekë ka jol la tro angatr a hane ce porotrik! Ngo ketre pengöi Iesu kö, ceitun asë hi la aqan hnime i nyidrë la nöjei pengön atr. Haawe, nyidrëti a qaja ju me hape: ‘Maine atre hi nyipo la atr ka sipo timi koi nyipo, tre, tro pena ha nyipoti a sipo timi koi angeic, nge tro angeic a hamën koi nyipo la timi ne mel.’

Kola qaja hnene la föe ka hape: ‘Thupëtresiji fe pëkö baketre i nyipë, nge jui la an. Nge qaa kö ka la timi ne mele i nyipë?’

Öni Iesu e qejepengöne ka hape: ‘Tro ha pi iji hmaca la angetre troa iji la timi celë; ngo ame la atre iji la tim hnenge hna troa hamë angeic, tre, tro angeic a mele epine palua.’

Önine la föe ka hape: ‘Thupëtresij hamë ni pi la timi cili, matre tha tro hmaca kö ni a pi ij. Nge tha tro hmaca kö ni a traqa troa tha tim e celë.’

Kola mekun hnene la föe ka hape, Iesu a qaja la nyipi tim. Ngo nyidrëti pe a qaja la nyipici göi Akötresie memine la baselaia i Nyidrë. Ceitune la nyipici cili memine la timi ne mel. Kola aijijën kowe la ketre atr troa hetrenyi la mele ka thaa ase palua kö.

Öni Iesu kowe la föe ka hape: ‘Tro jë troa theng la föi nyipo, nge bëeke hmaca jë.’

Öni eahlo e sa ka hape: ‘Pëkö föeng.’

Kola qaja hnei Iesu ka hape: ‘Nyipici nyipoti hi lai. Ke qa i nyipoti hna hetrenyi la ala faifi la itre trahmanyi nyipo, nge ame la hnei nyipoti hna ce lapa memin enehila, tre, ketre thaa föi nyipoti kö.’

Ame hna hai hnene la föe, pine laka, ame la itre hna qaja göi nyiidro tre itre trenge nyipici hi. Hna tune kaa matre atre jë Iesu la itre ewekë cili? Hnene hi laka, Iesu hi lo Hna Thingehnaean nge hna upe hnei Akötresie, matre ame la itre pengöne cili, kösë itre hna amamane lai ka xulu qaathei Nyidrë. Ene pe traqa pi hi itretre drei Iesu kola bëeke qaa hna itö, nge angatr a sesëkötr la kola ithanata hnei Iesu memine la föe ne Samaria.

Nemen la ini hne së hna xome qa ngöne cahu itre hne së hna ce ithanatan? Kola amaman laka, hnei Iesu hna hnime asë la nöjei atr. Nge loi e tro mina fe së a hane xötrethenge la tulu i nyidrë. Thaa tro kö së a mekun ka hape, ka ngazo la itre xaa atr, hnene laka, ketre pengöne kö la hane ikupeine i angatr. Ame la aja i Iesu, tre, tro asë hi la nöjei atr a atre la nyipici, matre troa eatrongë angatr kowe la mele ka thaa ase palua kö. Epi tro fe së a hane xatuan la itre atr troa atre la nyipici.