HANAWAI Iesu e lapa. Nyidrëti hune la ketre wetr ne Galilaia, kola inin la nöjei atr. Ame cahu itre atr ka lapa ezi nyidrë, tre, itretre drei nyidrëti hi lai. Hnei nyidrëti hna iën la ala 12 e angatr, matre itre aposetolo i nyidrë. Ame la itre aposetolo, tre, itretre drei Iesu ngo ketre pengöi angatre kö. Atre hi nyipunie la itre ëje i angatr?

Simona Peteru memin la trejine me angeic, ene Anederea. Thupene lai, Iakobo me Ioane, lue trejine nyidro. Hetrenyi fe la lue xan, Iakobo, me Simona. Luetre la lue aposetolo hna hën ka hape, Iuda. Iuda Isakariota, nge ame la ketre Iuda, tre, hna hë angeic fe ka hape, Thadaio. Ame la itre xan, tre, Filipo, me Nathaniela (hna hëne mina fe ka hape Batolomaio), me Mataio, me Toma.

Ame la Iesu a bëeke qaa Samaria, tre, nyidrëti hi a nyiqaan troa cainöj me hape: ‘Easenyi hë la Baselaia ne hnengödrai.’ Atre fe hi nyipunie la pengöne la baselaia cilli? Celë hi nyipi musi Akötresie. Iesu la joxu ne la musi cili. Nyidrëti a troa musi qaa hnengödrai, me axulun la tingeting kowe la fen. Jëne la baselaia i Akötresie, tro hmaca ha a paradraiso ka mingöminge catr la fen.

Iesu hi la a inin la itre atr la pengön la baselaia. Nyidrëti a qejepengöne ka hape: ‘Drei la aqane tro nyipunieti a thith. Tretretro i anganyihunieti e kohoti hnengödrai, jiniati e hmitrötr la atresiwa i enëtilai. Jiniati e hlepëti pi la baselaia i enëtilai. Longëtine jë la hanengë i enëtiai e celë fewatine axajanëti e kohoti hnengödrai.’ Nyimutre la itre atr ka hën la thithi celë ka hape: ‘Thithi Ne La Joxu.’ Itre xan pena a qaja ka hape: ‘Tretretro hun.’ Atreine kö nyipunie troa e gufan asë la thithi celë?

Iesu la a inine la itre atr la aqane tro angatr a ce mele memine la itre xan. Öni nyidrëti ka hape: ‘Ame la nöjei eweke asëjëihë hnei nyipunie hna ajan troa kuca koi nyipunie hnei itre atr, kuca jë fe tune lai koi angatr.’ Hapeu, ajane kö nyipunie troa lolo la thiina ne la itre xaa atr koi nyipunie? Haawe, Iesu a qaja ka hape, loi e tro fe së a tune koi itre xan. Drei jë kö elany la mel hnine la paradraiso, e xötrethenge jë hnene la nöjei atr asë la hna amekötine celë!