ATRE fe hi nyipunie la ëjene cahu nekö i medrimadra? Iesu la ëje i anganyidrë. Kolo petre hi a ase hnaho anganyidrë, hnine la uma i öni. Ame la uma cili, tre hnë umën la itre öni. Kola amekölen la medrimadra hnine la trepene a i öni, trepene an la itre boliko me itre xaa öni ju kö. Ngo pine nemen matre ce Maria me Iosefa e celë memine la itre öni? Hapeu, a pë pala ha uma ne mala upune gaa loi?

Ohea. Hanawange pe la sipu kepine lai matre angatr e cili: Hnei Kaisara Auguso, joxu ne Roma, hna acil la ketre wathebo me upe la itre atr asë troa isa bëek kowe la itre nöj hna hnaho angatre ngön, matre troa cinyihane la itre ëje i angatr hnine la itre itus ne nöj. Haawe, hna hnaho Iosefa e Betheleema. Ngo ame la kola traqa hnei Maria me Iosefa, pë hnyawa ha caa göhnë. Haawe, nyidroti a tro jë pe kowe lai uma i öni. Nge ijine cili hi, la kola hnaho Iesu hnei Maria! Ngo tune la aqane öhne nyipunie cahu, egöcatre catr la medrimadra.

Öhne fe hi nyipunieti cahu itretre thup, ka traqa ne iöhnyi me Iesu? Angatre a thupën la itre mamoe e jidr ngöne la itre hnehlapa, nge hudrume pi hi la lai xötreithi angatr. Celë hi ketre angela! Atraqatr la xou kowe la itretre thupë mamoe. Ngo hna qaja hnene la angela ka hape: ‘The xou kö! Hetrenyi ni la ketre maca ka loi koi nyipunie. Enehila, ase hë hnahon e Betheleema la Keriso Joxu. Tro nyidrëti a amelen la itre atr! Tro nyipunieti a öhnyi nyidrë hna atuth hnei maano, nge kola meköl ngöne la trepene a i öni.’ Ame hna traqa la itre angela ka nyimutre, me atrunyi Akötresie. Haawe, kola nyimenyime hnene la itretre thupë mamoe troa thele Iesu, nge enehila öhnyi Iesu hë hnei angatr.

Atre fe hi nyipunie la kepin matre ketre pengöi Iesu kö? Atre nyidrëti hnyawa fe kö hnei nyipunie? Mekune hi nyipunie lo easë a ce wang lo pane ewekë hna qejepengön hnene la itusi celë, hne së lo hna ce ithanatan la pengöne la pane Hupuna i Akötresie. Kolo hi lo Hupuna i Iehova la ka ce huliwa me Nyidrë, matre xup la hnengödrai me fen memine fe la itre xaa ewekë ju kö. Iesu hi lo lai!

Eje hi laka, hnei Iehova hna xom la mele ne la Nekö i Nyidrë qaa hnengödrai, matre amë e kuhu hni Maria. Haawe tune lo itre xaa medreng hnine la hni ne la itre thine i nyudren, kolo fe a kökötre trootro e kuhu hni Maria la nekönatr. Traqa ha la ijin, ene pe hnaho Iesu pi hnine la uma i öni e Betheleema. Ame pe la isa pengöi Iesu memine la itre xaa nekönatr, tre Hupuna i Akötresie nyidrë. Trotrohnine hë nyipunie enehila la kepin matre, kola madrin la itre angela troa qaja trongën la maca ka loi, ene laka, ase hë hnaho Iesu?