MARIA cahu föe ka mingöming. Atre Isaraela nyiidro, nge ka lapa nyidroti ekö ngöne la traon e Nazareta. Ketre föe lai ka loi thiina, celë hi matre hna atre nyiidro hnei Akötresie. Drei lai kepin matre Nyidrëti a upe jë la angela, Gaberiela la ëjen, troa ithanata me nyiidro. Atre fe hi nyipunie la hnei Gaberiela hna qaja koi Maria?

Hnei Gaberiela hna qaja koi nyidroti ka hape: ‘Kölö eö hna hnim, ce Iehova me eö.’ Maria petre hi a hane xötrei öhne lai atr cili, thaa ketre atr menu kö ngo angela pe. Thaa loi kö la mekuna i Nyidroti, pine laka, thatre kö nyiidro la alien la mekune ne la angela. Ngo hna xatua Maria hnei Gaberiela, matre paatre pi hi la xou thei nyiidro.

Öni nyidrëti ka hape: ‘The xou kö Maria; ke hna hnime gufa eö hnei Iehova. Celë hi kepin matre, nyidrëti a troa kuca la ketre ewekë ka lolo catr koi nyipo. Tro hë nyipoti a hnahon la nekönatr. Nge tro nyipoti a ati ëje i nyën ka hape, Iesu.’

Kola qejepengöi nyën hnei Gaberiela, me hape: ‘Tro la nekönatr cili a atraqatr, nge troa ati ëje i nyën ka hape, Hupuna ne la Kasisitria. Tro Iehova a acili nyidrë troa joxu, tui Davita. Ngo ame pe Iesu, tre, joxu ka troa epine palua, nge thaa tro kö a nyipun la baselaia i nyidrë!’

Matre Maria a hnyinge jë me hape: ‘Troa eatrëne tune kaa lai, nge thaa ka faipoipo kö ni? Troa hetre nekönge tune kaa, nge thaa ka iatre petre kö ni me trahmany?’

Kola sa hnei Gaberiela ka hape: ‘Tro ha traqa la mene i Akötresie koi eö. Qa ngöne lai, tro ha hë nyën ka hape, Hupuna i Akötresie.’ Thupene lai kola qaja koi Maria ka hape: ‘Meku Elisabeth hi eö, sinee i eö. Hna qaja hnene la itre atr ka hape, thaa ijiji nyidroti hmaca kö troa hane hetre nekönatr, ke qatre catre hë nyiidro. Ngo easenyi hë matre, hnahone jë eahlo la nekö i eahlo trahmany. Haawe, öhne hi eö, pëkö hna thatreine kuca hnei Akötresie.’

Canga öni Maria jë hi ka hape: ‘Eni la hlue i Iehova! Eatrëne jë koi ni tune la trenge ewekë i nyipë.’ Thupene jë hi lai, nge nue nyidroti pi hi hnene la angela.

Ame hë thupene lai, kola canga tro hnei Maria troa wai Elisabeth. Ame la kola dreng hnei Elisabeth la nine ihehe i Maria, ene pe kola sesëkötr madrin la medreng e kuhu hni eahlo. Ka tiqa Elisabeth hnei uati hmitrötr, nge nyidroti a qaja koi Maria ka hape: ‘Manathithi hë nyipo hune la nöjei föe.’ Kola lapa hnei Maria thei Elisabeth köni treu, nge ase hë, eahlo a bëeke hmaca Nazareta eë.

Ka hnëkë hë Iosefa troa faipoipo me Maria. Ngo ame la angeic a atre, ka hape, hace hë Maria, hane hi lai kola saze la mekune i angeic, a thaa tro hmaca kö angeic a xomi Maria. Loi pe hna qaja koi angeic hnene la angela i Akötresie ka hape: ‘The xou kö troa xomi Maria troa föi eö. Ke hnei Akötresie hna aijijë nyiidro troa hnahone la ketre nekönatr trahmany.’ Haawe, faipoipo jë hi Maria me Iosefa, nge thupene lai, kola hnaho Iesu.