THUPENE la hna tro trije la hua hna ami Iesu ngön hnei Peteru me Ioane, lapa caasi ju pe hi Maria. Eahlo a nyiqaan troa treij. Ame ngöne lo ketre iatr hnapan, kola amaman la eahlo a tuën la hnine la hua. Öhne pe hi eahlo la lue angela! Nyidroti a hnyinge koi eahlo ka hape: ‘Pine nemen matre nyipoti a treij?’

Ame hna sa hnei Maria ka hape: ‘Hnei angatr hna xome la Joxung, nge thatre kö ni la hnei angatr hna ami nyidrëti ngön.’ Thupene lai kola ujë hnei Maria me öhne la ketre trahmany. Nyidrëti a hnyinge koi eahlo ka hape: ‘Drei la hnei nyipoti hna thel?’

Ame la mekuna i Maria, tre, ketre trahmany ka nyihnyawa hnagatran, nge maine jë celë hi atre xome la ngönalë i Iesu. Haawe, öni eahlo jë kowe lai atr ka hape: ‘Maine hnei nyipëti hna xomi nyidrë, epi qaja jë koi ni la göhnë hnei nyipëti hna ami nyidrëti ngön.’ Ngo Iesu hi lai trahmany. Hnei nyidrëti hna xome pena ha la ketre ngönetrei, matre kösë thaa wanga atrehmekunyi nyidrëti kö hnei Maria. Ngo ame la nyidrëti a hë nyiidro ngöne la ëje i nyiidro, ene pe Maria hi a wanga atrehmekun laka, Iesu hi lo lai trahmany. Eahlo a nyinyape pi me qaja kowe la itretre dreng ka hape: ‘Hnenge hna öhne la Joxu!’

Hejiheji hë, kola tro Emao hnene la luetre drei Iesu, ene pe e nyidroti ju e kuhu gojenyi hnene la ketre atr, me hane ce tro me nyidro. Tru catr la hace ne la itretre dreng, pine laka hna humuthi Iesu. Ngöne la gojeny, kola qejepengöne trongën hnene lai atr la itre ewekë ka nyimutre qa hnine la Tusi Hmitrötr, matre kösë kola nango thue egöcatre i nyidroti hmaca. Ame hë la angatr a pane cil me mano matre troa xen, nyidroti hi a wanga atrehmekun e cili laka, Iesu hi lo lai trahmany. Thupene lai, paatre pi hi Iesu, nge nyidroti a canga bëeke hmaca jë pe Ierusalema eë, troa qaja kowe la itre aposetolo la aqane öhnyi Iesu hnei nyidro.

Thaa qea ju kö thupene lai, nge Iesu a amamanyi koi Peteru. Ame la kola atre la ewekë celë hnene la itre xan, angatre hi lai a madrin atraqatr. Thupene jë hi lai, ame lo luetre drei Iesu, traqa ha nyidroti e Ierusalema nge nyidroti a tro ju troa iöhnyi me anga aposetolo. Nyidroti fe a qejepengön koi angatr, la aqane amamanyi Iesu koi nyidro ngöne la gojeny. Nyidroti pala kö a porotrikëne lai, ene pe mama pi hi la ketre pengön ewekë; nemene la ewekë cili?

Goeëne cahu ngöne iatr. Kola cil hnei Iesu e nyipine la hnahag, ngo hna kinacatrene pe qa koho hnin la uma, la itre qëhnelö hnene la angetre dreng. Hane hi lai kola pane madrin hnene la itretre dreng! Hapeu, thaa ketre drai ka thue madrine kö lai? Atre fe kö nyipunie ka hape, aija amamanyi Iesu kowe la itretre drei nyidrë? Ma afaifi jë kö lao amamanyi nyidrë?

Paatre fe kö Toma ngöne la kola amamanyi hnei Iesu kowe lo lai itretre drei nyidrë. Celë hi matre, ame la kola qaja hnene la itretre drenge koi angeic ka hape: ‘Hne huni hna öhne la Joxu!’ Öni Toma jë pe ka hape, hane jë kö angeic jele nyipicin elanyi lai, e ketre sipu öhnyi Iesu jë kö hnei angeic. Ame hë ngöne la eitr lao drai thupene lai, kola icasikeu hmaca hnene la itretre dreng hnine la uma. Hnei angatr hna kiin qa koho hnin la qëhnelö, nge ame hë ngöne la ijine cili, ce angatre hë me Toma. Hane hmaca hi lai Iesu a amamany, e nyipine la hnahag. Haawe, ene pe mejiune jë fe hë Toma.