HANAWANG cahu angela, kola fe la qëhnelö ne la kalabus. Ame cahu itre trahmanyi hnei angeic hna nue jën qa hnine la kalabus, tre, itre aposetolo i Iesu. Tro sa ce wang la kepin matre umë angatre jë hnine la kalabus.

Thaa nyimu drai ju kö qa ngöne lo kola upe la uati hmitrötr kowe la itretre drei Iesu, nge traqa pi hi la ketre ewekë. Hna tro hnei Peteru me Ioane kowe la ēnē e Ierusalema ngöne la ketre hnaipajö. E cili ezine la qëhnelö, kola lapa la ketre trahmany ka geny qaane lo kola hnaho nyidrë. Hna xepi nyidrëti pala hi ngöne la nöjei drai kowe la götrane cili, matre tro nyidrëti a sipo manie kowe la itre ka tro kowe la ēnē. Ame la nyidrëti a öhnyi Peteru me Ioane, nyidrëti a sipo nyidroti troa hamën koi nyidrë la ketre ewekë. Nemen la hna troa kuca hnene la lue aposetolo?

Nyidroti a cil me goeën la atr ka puafala. Kola qaja hnei Peteru ka hape: ‘Pëkö manieng, ngo tro ni a hamë eö la hnenge hna hetreny. Ngöne la ëje i Iesu, cile jë nge tro jë!’ Kola ea hnei Peteru la ime hmaca ne lai atr, ene pe cile jë hi nyidrëti me nyiqaane tro. Ame la kola öhne lai hnene la itre atr, angatr a hai nge tru catr la madrine i angatr kowe la iamamanyikeu ka lolo cili.

Kola qaja hnei Peteru ka hape: ‘Hna amele Iesu hmaca qa hna meci hnene la mene i Akötresie, nge hna jëne mina fe la mene cili la eahuni a atrein troa kuca la itre iamamanyikeu.’ Nyidroti petre kö a ithanata, ene pe kola traqa hnene la itre xaa hene ne hmi. Angatr a elëhni pine laka, kola qaja hnei Peteru me Ioane kowe la itre atr, la mele hmaca i Iesu qa hna mec. Haawe, angatr a xolouthi nyidroti ju me akalabusi nyidro.

Elanyi hë, kola kuca la ketre icasikeu ka tru hnene la itre hene ne hmi. Hna traqa sai Peteru me Ioane, memine lo lai atr hna aloine mecin. Kola hnyinge hnene la itre hene ne hmi ka hape: ‘Hnene la mene ka ue hnei nyipunie hna kuca la iamamanyikeu celë?’

Kola qaja hnei Peteru koi angatr ka hape, hnene la mene i Akötresie, lo ka amele Iesu hmaca qa hna mec. Cile menu ju pe hi la itretre huuj, thatre hë la nyine troa kuca, nge ketre thatreine kö troa jele thoine lai ketre iamamanyikeu hna kuca. Haawe, angatre lai a wathebone ju pe la itre aposetolo troa qeje Iesu, nge thupene lai angatr a nue nyidroti pi.

Kola tro la itre drai, nge kolo pala hi a catre cainöjë Iesu hnene la itre aposetolo, me aloine la itre ka wezipo. Kola haöth la nöj hnene la itre iamamanyikeu cili. Haawe, traqa fë pi hi kowe la itre aposetolo la itre ka wezipo, hnene la itre atr ka ala nyimu ka traqa qa ngöne la itre traon ka lapa xötreith e Ierusalema, göi troa hane aloin la itre meci angatr. Haawe, tru catr la ikucany hnene la itre hene ne hmi, matre angatr a xolouth la itre aposetolo me akalabusi angatr. Ngo thaa qea ju kö la hna umë angatr hnine la kalabus.

Ame ngöne la jidr, kola fe hnene la angela la qëhnelö ne la kalabus, tune cahu aqane amaman ngöne la iatr. Kola qaja hnene la angela ka hape: ‘Tro jë me cile hnine la ēnē, nge catre pi troa ithanata kowe la itre atr.’ Elanyi hë e hmakany, kola iupi hnene la itre hene ne hmi troa thenge la itre aposetolo qa hnine la kalabus, ngo paatre hë nyidro. Thupene lai, kolo hmaca ha öhnyi nyidro hnene la itre atr e ini hnine la ēnē, ame hna tro sai nyidroti pi kowe la itretre isenyin.

Qaja jë hi hnene la itre hene ne hmi ka hape: ‘Ase hë huni lo wathebo nyipunie troa qeje Iesu. Ngo ase hë epuni haöthe la Ierusalema hnene la ini i nyipunie.’ Kola sa hnene la itre aposetolo ka hape: ‘Nyipi ewekë koi huni troa drengethenge Akötresie ceitu me atre mus, hune la troa drei atr.’ Haawe, angatr a catre troa inine la “maca ka loi.” Tune kaa la tulu ka loi cili, thaa nyine tro fe kö së lai a xötrethengen?