ATRE hi nyipunie la ëjen cahu föe memine lai lue trahmany? Ame la föe tre, Maria Magadalena, ketre sinee i Iesu. Nge lue angela la lue trahmany ka hetrë ka wië. Ame la hna meköl hna tuën hnei Maria, tre e cili hi lo hna ami Iesu ngön thupene lo hna meci hnei nyidrë. Hna hëne lai ka hape, hua. Ngo ame la, tre, paatre hë la ngönalë i nyidrë! Drei jë la ka xome ej? Tro hö sa ce wang.

Thupene la hna meci hnei Iesu, hna qaja hnene la itretre huj koi Pilato ka hape: ‘Ame ngöne lo mele petre kö Iesu, hnei nyidrëti lo hna qaja ka hape, troa amele nyidrëti hmaca thupene la köni drai. Haawe, loi e troa thupën la hua, matre thaa ijij kowe la itretre drei nyidrë troa atrekënö la ngönetrei i nyidrë, nge thupene lai, angatr a qaja jë pe ka hape, ase hë amele nyidrëti hmaca qa hna mec!’ Kola upe hnei Pilato la itretre huj, troa upe la itre sooc matre troa thupën la hua.

Ngo ame hë ngöne la hnaakönine drai, kola mama e sine hmakanyi la angela i Iehova. Angeic a ukun la ietë ka thinge la ulane la hua. Atraqatr la xou kowe la itre sooc, matre thatreine hë angatr troa enij. Haawe, ame hë la angatr a goeën e hnine la hua, paatre hë la ngönalë i Iesu! Ame hnene la itre xaa sooc hna tro kowe la lapa, me thuemacan la itretre huuj. Atre hi nyipunie la hna kuca hnene la itretre huuj ka ngazo? Hnei angatr hna nyithupen la itre sooc, matre troa thoi. Haawe, önine jë hi la itre sooc kowe la itretre huuj: ‘Qaja jë ka hape, hnene la itretre dreng hna traqa e hnenyipajidr, ngöne la eahuni a meköl, nge angatr a atrekënö pi la ngönalë i Iesu.’

Ame ngöne la ijine cili, kola tro hnene la itre xaa föe, itre xaa sinee i Iesu, troa wang la hua. Angatr a hai, ngöne la angatr a öhne la hua a pëhë alien! Ene pe mama pi hi la lue angela, kösë ka palulu la hnaheetre i nyidro. Nyidroti a hnyinge ka hape: ‘Pine nemen matre nyipunie a thele Iesu e celë? Mele hmaca ha nyidrë. Canga tro jë pe troa thuemacane la itretre drei nyidrë.’ Ene pe nyenyape pi hi la itre föe! Haawe, angatre hë e kuhu gojeny, ame hna acilë angatr hnene la ketre atr. Atre hi nyipunie la ëje ne lai atr? Iesu hi lai trahmany! Öni nyidrëti ka hape: ‘Tro jë troa thuemacane la itretre drei ni.’

Jole pi hë kowe la itretre dreng troa mejiun kowe la hna qaja hnene la itre föe, ene laka, mele hmaca ha Iesu nge hnei angatr hna öhnyi nyidrë. Nyinyape pi hi Peteru me Ioane kowe la hua, matre tro kö nyidroti a isa wang, ngo pëhë aliene ej! Ame ngöne la kola bëeke hmaca hnei Peteru me Ioane, tre hna lapa pë hë hnei Maria Magadalena. Haawe, eahlo a nango tuën la hnine la hua me öhne la lue angela.

Atre hi nyipunie la ka traqa kowe la ngönalë i Iesu? Hnei Akötresie hna apaatrene ej. Thaa hnei Akötresieti kö hna amele Iesu hmaca cememine la ngönalë i atr, ene lo ngönalë hna meci fë. Hnei Nyidrëti pe hna hamë Iesu la ketre ngönetrei ngöne la ua, tune la itre angela e koho hnengödrai. Tune la hne së hna ce wange hë, Iesu pe a amaman kowe la itretre drei nyidrë laka mele kö nyidrë, matre nyidrëti a xome la ngönetrei ka aijijën la itre atr troa öhnyi nyidrë.