AME cahu nekö trahmanyi ka ce cil me Paulo aposetolo, tre, Timoteo. Timoteo a ce mele memine la hnepe lapa i angeic e Lusetara. Eunike la thine i angeic, nge Lois la qaaqa i angeic.

Hnaakönine Paulo hë lai a traqa e Lusetara. Ame lo pane traqa nyidrë, tre, ene lo macatre hnapan, a ce nyidrëti me Banaba nyidroti a cainöje trootro. Nge ame enehila, tre Paulo hmaca pena ha a bëeke me Sila.

Atre fe hi nyipunie la hnei Paulo hna qaja koi Timoteo? Nyidrëti a hnying ka hape: ‘Ajane kö eö troa hane ce tro me eni me Sila? Tro eö a xatua nyiho troa hane cainöj, kowe la itre atr ka mele ngöne la itre götran gaa nanyi qaa la.’

Hnei Timoteo hna sa me hape: ‘Ka loi, eni a ajan troa hane ce tro me epon.’ Haawe, ame hë thupen, kola nue hnei Timoteo la hnepe lapa i angeic matre troa ce tro me Sila me Paulo. Ngo qëmekene tro sa ithanatan la tronge i angatr, tro sa pane ce wange lo itre ewekë ka traqa koi Paulo. Easenyi hë matre traqa pi kowe la 17 lao macatre, thupene lo hna mama hnei Iesu koi angeic ngöne la gojenyi ne tro Damaseko.

Mekune hi së lo kola traqa hnei Paulo e Damaseko troa akötrën lo itretre drei Iesu, ngo ame hë enehila, angeice hë la ketre atre dreng! Thupene lai, kola thele hnene la itre xaa ithupëjia troa humuthi Paulo, pine laka, thaa ajane kö angatr tro angeice a qeje Iesu. Ngo hna xatua Paulo hnene la itretre dreng troa kötr. Hnei angatr hna ami angeic hnine la ketre iwatreng, nge angatr a eu nyidrëti pi e tröne la itre hna xupi etë ne la traon.

Thupene lai, Paulo a tro pi Anetioka eë troa cainöj. E cili hi la kola nyiqaane hën la itretre drei Iesu ka hape, itre Keresiano. Thupene lai, hna upi Paulo pena ha me Banaba qaa Anetioka troa cainöje ngöne la itre götran gaa nany. Ame la ketre traon hnei nyidroti hna wang, tre Lusetara, ene la nöj hna tru hnei Timoteo ngön.

Caa macatre e thupen, kola bëeke hmaca hnei Paulo Lusetara eë, ngöne la hnaaluene tronge i nyidrë. Ame ngöne la Timoteo a ce tro me Paulo me Sila, tre angatre a tro ju hë ië? Hanawange cahu itre nöj hna sija ngöne i pepa, ceitune lai me ketre map ka troa köjan trongën la itre gojenyi angatr. Tro sa ce wange la ite ëjen la itre xaa götran.

Ame la xötrei, hnei angatr hna pane tro Ikonio eë, ketre traon gaa easeny, thupene lai, angatr a tro Anetioka eë, hnaaluene traon. Thupene lai, angatr a tro Troas eë, matre Filipi, matre Thesalonika, matre Berea. Öhne hi nyipunie ngöne cahu ipepa hna siji nöjen, la traon e Athenai? Hna cainöje fe e cili hnei Paulo. Thupene lai, hnei angatr hna cainöj e Korinito, caa macatre nge sin. Hnei angatr hna pane cile e Efeso, thaa qea ju kö la hna lapa. Thupene lai, angatr a bëeke hmaca hune bootr a tro Kaisaria, nge qaa lai angatr a elë e Anetioka; hna lapa hi e cili hnei Paulo.

Haawe, Timoteo a trongën la itre kilomet ka nyimutre catr, matre troa xatua Paulo troa cainöjën la “maca ka loi” me troa acile la itre ekalesia i Keresiano. Itre nekönatre fe, e tru jë nyipunie elany, hapeu, tro fe kö nyipunie a hane nyihlue nyipici koi Akötresie tui Timoteo?