Ame ngöne la ijine kola pane ngenu hnene la uma ne ini, hnene la itre xaa thöth hna angazone la ketre nekö trahmany. Ka ini asë hi angatr ngöne la ketre uma ne ini ka tru e Canada. Thupene lai, hnei Leonard Stern hna cinyihane ngöne la ketre zonal (Ottawa Citizen) ka hape: “Tha hnene kö laka, ka inamacan, nge ka ini aqeany, me trenamo la ketre thöth, ke, thatreine kö tro angeic a huliwa menu.”

Öni Stern: “Tha sihngödri kö koi së laka, ame la ka nyipiewekë kowe la itre keme me thin, tre, tro la itre nekönatr a atre la loi me ngazo. Ngo, kola mama laka, sisitria kö kowe la keme me thin, tro la itre nekönatr a ini aqeany, me trene mo.”

Nyipici laka, nyipiewekë troa ini. Ngo, tha itre ini ka tru kö la ka troa apatrene la itre thiina së ka ngazo. Nemene la ini ka troa xatua së troa thiina ka loi?

Ceitune hi la Tusi Hmitrötr memine la ithulu. Ame la easa ini Tusi Hmitrötr, easa öhne la itre ifego së, me itre aja së ka ngazo. (Iakobo 1:23-25) Ngo, tha ej hmekuje kö lai la aqane xatua së hnei Tusi Hmitrötr. Eje fe a xatua së troa saze, me xome la itre thiina ka troa hamë tingeting, me cas. Kola qaja la utipin, me menyik, me atreine xomihni, me atreine xomehnöth, me ihnim. Hna hëne fe la ihnim ka hape, “otene ka nyipi loi.” (Kolose 3:14) Pine nemene matre nyipiewekë troa ihnim? Hanawang la hna qaja hnei Tusi Hmitrötr göne la thiina cili.

• “Ihnimi la ate xome ahoeane me ka menyik ; tha ate ikucanyi kö la ihnim ; tha ate selëne kö la ihnim, nge tha ate pi tru kö, tha thina ka qali kö, tha ate thele ewekë i nyëne kö, tha ate canga elëhni kö, tha ate meku ngazo kö ; tha ate madine kö la thina ka tha meköti, ngo ate madine la nyipici ; ate juetëne la nöjei ewekë asë . . . ate xomi hnine la nöjei ewekë asë. Tha tro kö a ase la ihnim.”—1 Korinito 13:4-8.

• “Ame la ihnimi, tha ate angazone la ate easheny.”—Roma 13:10.

• “Nge hune la nöjei ewekë asëjëihë la tro nyipunie a ihnimikeu cat ; ke tro ha he la ite ngazo ka nyimute hnene la ihnim.”—1 Peteru 4:8.

Ame la easa ce lapa memine la itre atr ka hnimi së, tune kaa së? Tingeting? Ka lolo la mekune së? Eje hi. Atre hi së ka hape, tha tro kö angatr a akötrë së, maine qanangazo së pena. Angatr a ajane tro sa madrin.

Ijije hi troa saze la aqane mele ne la itre atr hnene la ihnim, matre hetre thangane ka loi koi itre xan. Hanawang la hna melën hnei George. Hna hnaho hnene la nekö i nyidrë jajiny, nge aja i nyidrë troa ce lapa memine la api nyidrë. Ngo, ka ufi sixa catre George, nge tha ajane kö la keme ne la nekönatr tro nyidrëti a ufi sixa ezine la medreng. Nemene ju hë la hna kuca hnei George? Ngacama 50 lao macatre ne ufi sixa nyidrë, ngo hnei nyidrëti hna triji sixa, matre ijije troa ce lapa memine la api nyidrë. Hetre emenene la ihnim!

Ka nyipiewekë la tro sa inine troa ihnim. Hnëqa i keme me thine troa inine la itre nekönatr troa  ihnim. Angatr a ithuan, me thupë nyudren. Nge ame la nyudreni a wezipo maine eatr, angatre a xatua nyudren. Itre keme me thin ka ihnim a ithanata memine la itre nekönatr, me hamë ini koi nyudren. Angatre fe a hajine la nekö i angatr, me ini nyudren la itre trepene meköt, matre tro nyudreni a atreine wangatrehmekune la loi qa ngöne la ngazo. Ketre, angatr a amamai tulu kowe la itre nekönatr.

Ngo, tha eatrëne pë hë itre xaa keme me thine la hnëqa i angatr. Hapeu, kolo kö lai a qaja ka hape, luzi hë la itre nekö i angatr? Ohea! Hetrenyi la itre xaa qatr ka saze, ngacama hna hetru angatr ngöne la itre fami ka jol. Ame enehila, itre atr ka lolo hë angatr. Ame ngöne la tane mekune ka troa xulu, easa troa wang la pengöne la itre atr, kola mekun ka hape, ka luzi pë hë angatr!