ONU a thuecatrene la itre atr asë troa ce huliwa, me metrötrëne la itre wathebo, me wangatrune la ihnadro. Pine nemen? Öni Maher Nasser ngöne la zonale i ONU (UN Chronicle) ka hape, “Kola saze la pengöne la drai, me elë la etrune la ihumuth, me itre jole ne la atr, me terrorisme, me itre mec ka ixötrekeu, me itre xa jole ju kö. Ketre, alanyimu la itre atr ka trotrij la nöje i angatr.” Hna ketr asë hi la itre atr hnene la itre jole cili.

Ame koi itre xan, loi e tro hi a caa mus kowe la fen asë. Celë hi mekuna i Albert Einstein (1879-1955) me Dante (1265-1321), ketre philosophe, poète, me atre mus. Öni Dante, thatreine kö troa tingeting la fen, e hna aisane palahi la itre atr hnene la politik. Hnei angeic hna amexeje la itre trengewekë i Iesu Keriso, hna hape, ‘Maine hetre isazikeu e hnine la ketre baselaia, tre, tro ej a pë wen.’—Luka 11:17.

Hna kuiëne la lue bombes atomiques, thupene lo Hnaaluene Isi Ka Tru. Hnei Albert Einstein hna cinyianyine la ketre tus hna fejane e hnine la ketre zonal. Hnei nyidrëti hna cinyiany kowe la Assemblée générale des Nations unies. Öni nyidrë, “Nyipiewekë troa enij hnei ONU, me acile la ketre mus kowe la fen asë, matre tingetinge pi.”

Ngo hapeue la itre hene ne politik ka cilëne la musi cili, ka huliwa nyipici palahi angatr, me catre huliwa, me hnim la itre atr? Atreine kö angatr troa mele tune lai? Kola amekunë së hnene la lue hnyinge celë, la trengewekë ne la ketre historien qa Agele. Öni nyidrë: ‘E musi hë la atr, canga tro hi angeic a qene atrekënö.’

Ngo, maine itre atr a ajane troa mele tingeting, loi e troa caas. Nemene la aqane tro sa caas? Ijiji së kö troa caas? Celë hi hna qaja hnei Tusi Hmitrötr. Tro lai a eatr jëne la musi hna troa acil hnei Akötresie. Ngo, tha hnene kö la musi ne la ketre atr, ka huliwa atrekënö. Troa amamane jëne la musi cili laka, meköt koi Akötresie troa musinëne la itre hnei Nyidrëti hna xup. Nemene la musi cili? Tusi Hmitrötr a qaja ka hape, “baselaia i Akötesie.”—Luka 4:43.

Iesu Keriso a mekune la Baselaia i Akötresie ngöne lo nyidrëti a qaja la tulu ne thith. Öni nyidrë: ‘Epi traqa pi la Baselaia i Cilie. Epi tro fe a eje la aja i Cilie e celë fen.’ (Mataio 6:9, 10) Eje hi laka, tro la Baselaia i Akötresie a eatrëne la aja i Akötresie e celë fen. Ngo, tha tro kö a eatr lo aja ne la itre ka isi pi mus, me ka sipu meku angatre kö.

Hna hane hëne fe la Baselaia i Akötresie ka hape, “baselaia ne hnengödrai.” (Mataio 5:3) Pine nemen? Pine laka, tro ej a mus kowe la fen qa koho hnengödrai, ngo tha eje kö a troa mus qa celë fen. Pane mekune jë la aliene lai. Tha tro kö la musi cili a thele mani, maine hle mani. Drei la ketre madrine ka tru kowe la itre atrene la Baselaia!

Iesu Keriso la Joxu ne la Baselaia i Akötresie. Hna ië Iesu hnei Akötresie. Öni Tusi Hmitrötr göi Iesu:

• ‘Troa eje hune la lue hnaiape i nyidrë la mus . . . Tha tro kö a nyipune la musi me tingetinge i nyidrë.’—Isaia 9:6, 7.

• “Hna hamë anganyidë la mus, me lolo, me baselaia, mate tro nöjei ate, me ite nöj, me isa qene hlapa asë a nyi hlue i anganyidë;  musi ka . . . tha tro kö a pate.” —Daniela 7:14.

• ‘Ame la baselaia ne la fen, tre, hna acile thatraqane la Joxu [Akötresie] së, memine la Keriso i nyidrë.’—Hna Amaman 11:15.

Tro la Baselaia i Akötresie a eatrëne la tulu ne thithi Iesu, memine la aja i Akötresieti kowe la fen. Nge, fene la musi ne la Baselaia cili, tro la itre atr asë a inine la aqane troa nyihnyawane la ihnadro, matre lolo me mele ka loi la itre atrene ej.

Ame la ka sisitria, tre, tro la Baselaia i Akötresie a inine la itre atr. Tro asë hi angatr a atre la itre hna amekötin. Tha tro hmaca kö la itre atr a icilekeu. Öni Isaia 11:9, ‘tha tro kö angatr a angazone me huliwa menu . . . ke troa tiqa la fene hnengödrai hnene la atrehmekune i Iehova, tune la hnagejë a hetrëne la trepene ej.’

Ame ngöne la ijine cili, tro la itre atr asë a cas me mele tingeting, kolo aja i ONU ekö. Öni Salamo 37:11, “Tro angat’ a madine la tingetinge atraqat.” Nge, tha tro hmaca kö sa dreng la itre hnëewekë hna hape, “ihumuth,” “angazone la ihnadro,” “pë ewekë,” me “isi.” Ngo, eue la ijine troa eatr la itre ewekë cili? Nge, eue la ijine troa traqa la Baselaia? Nemene la aqane tro la Baselaia i Akötresie a musi kowe la fen? Nge, nemene la nyine tro sa kuca matre tro sa mel? Celë hi hne së hna troa ce wang.