Hapeu, ijije kö tro la itre atr a sipu nyinyine la itre jol ka thë la tingeting, me angazone la mele i angatr? Loi e troa pane atre la qaane la itre jol.

Hanawang la ketre ceitun. Hna wezipo hnei Tom, nge thupene lai, angeic a mec. Pine nemene matre meci pi angeic? Önine la droketre ka wai angeic qëmekene tro angeic a mec ka hape, “Ame la kola fetra la meci Tom, tha hna nyinyine hnyawane kö me thele la sipu kepine la meci angeic.” Hnene la itre droketre ka pane wai Tom hna hamë drösinöe matre tro angeic a egöcatr hmaca, ngo tha göi tro kö a nyinyine la mec ka eje thei angeic.

Celë hi hna kuca hnene la itre atr matre troa nyinyine la itre ejolene la fen. Itre musi a acili wathebo, me ami video ngöne la nöjei götran, me nyixane la itre xaa polis matre troa cil kowe la ihumuth. Celë hi matre kola nango uti la etrune la ihumuth, ngo tha eje kö a apatrene la nyipi jol. Kola mama ngöne la aqane ujë ne la itre atr, la mekun, me aliene hni, memine la hna ajan hnei angatr.

Daniel, la ketre atr ka mel e Amérique du Sud. Hnei angeic hna cile kowe la itre ejolene göi mani, matre puafala hë angeic. Öni angeic: “Ka loi la mele huni ekö. Tha mekune kö hun ka hape, troa hetre atrekënö. Ngo, ame enehila, pë hmaca kö tribu ka mele tingeting. Hnene laka, jole catre la mel ngöne la traon, alanyimu la itre ka pi hetreny, me ka pë metrötr kowe la mel, me kowe la itre ifekë ewekën.”

Hanawang la hna melën hnene la ketre atr hne së hna troa ati ëjen ka hape, Elias. Hnei angeic hna kötrene la ketre isi e Moyen-Orient, nge e thupen hnei angeic hna ini Tusi Hmitrötr. Öni angeic: “Alanyimu la itre thöth, qa ngöne la nöjeng, hna ukune hnene la itre fami angatr me itre mus me hmi troa tro troa isi, matre troa hlemu ngöne la nöj. Nge hna kuca tune fe hnene la itre ithupëjia. Mama cile hnyawa koi ni laka, maine tro sa mejiune kowe la itre ka cilëne la mus, tre, troa hetre pune ka ngazo koi së.”

Öni Tusi Hmitrötr:

• “Ngazo la aja ne la hni ate qan’ e nekönate nyën.”—Genese 8:21.

• “Ate nyipi iaö la hni hune la nöjei ewekë asëjëihë, nge nyipi ngazo ej ; dei la ate ate hmekun’ ej ?”—Ieremia 17:9.

• “Kola löpi qa kuhu hni la meku ngazo, me humu at, . . . me kuci ngazo, me ënö, me atë la thoi.”—Mataio 15:19.

Thatreine kö la itre atr troa apatrene la itre thiina ka ngazo ka ej e kuhu hni së, nge ka troa akötrë itre xan. Ngo, kolo jë pe hi ka hape, ngazo catre jë la itre thiina cili, tune la hne së hna ce wang ngöne la tane mekun ka ase hë. (2 Timoteo 3:1-5) Ngo eje hi laka, nyimutre la itre ithuemacany, nge nyimutre catre kö la itre jia ne huliwa nyine ithanata hune ekö! Hnauëne hö laka, thatreine kö la itre atr troa hamë tingeting kowe la fen? Hapeu, ijiji angatre kö? Ijije kö troa tingeting la fen elany?

Maine hetre aqane troa saze la itre atr ka ngazo, ngo thatreine jë kö së troa saze la fen, matre troa tingeting. Pine nemen? Pine laka, hetre ifego së.

 Hane hi la ketre nyipici, kola hape: “Tha qâ i ate kö . . . troa amekötine la ite hna feke ca hnei angeic.” (Ieremia 10:23) Eje hi laka, tha hna xupi së kö troa mel e kuhu hnagejë. Ketre tune mina fe, tha hna xupi së kö troa isa sipu mus, maine musinëne pena itre xan!

Hapeue la itre atr, angatre kö a kapa la kola qaja koi angatr la aqane troa mel, me upi angatr troa trongëne la itre trepene meköt? Nge tune kaa e qaja jë hnene la ketre la aqane troa waiewekë göi thi upune, maine aqane troa hiane la itre nekönatr? Itre xa jole lai ka aisane la itre atr. Haawe, ngacama jole troa kapa la hna qaja hnei Tusi Hmitrötr, ngo ka hetre alien. Thatreine kö së, nge tha meköti kö tro sa musinëne la itre xan. Ekaa la hnë tro sa thele ixatua?

Loi e tro sa thele ixatua thene la Atre Xupi së. Alanyimu la itre atr ka qaja ka hape, thëthëhmi së hë hnei Akötresie, ngo tha eje kö lai. Kola mama e hnine la Tusi Hmitrötr laka, Nyidrëti a wangatrunyi së. Ame la easa trotrohnine la aliene la Tusi Hmitrötr, easë fe hi lai a trotrohnine la pengö së. Ketre, easa trotrohnine la kepin matre ngazo catre la fen enehila. Easa öhne la kepin matre cinyihane jë hnene la ketre atre inamacane qaa Alema ka hape, “tha hnene kö la itre atr, me itre mus hna xomi ini qa ngöne la itre ewekë ka traqa ekö. Celë hi matre tha saze kö angatr.”

Öni Iesu, nekö i Akötresie ka hape, “hna qaja amekötine la inamacane hnene la nöjei huliwa ne ej,” maine thangane ej. (Luka 7:35) Kola mama la inamacane cili ngöne Isaia 2:22, kola hape: “Aseju nyipunie lapaune kowe la ate.” Tro la eamo celë a thupë së matre tha tro kö sa mejiune menun kowe la itre ewekë ka tha tro kö a eatr. Kenneth la ketre ka mel e Etazini, ngöne la ketre götrane gaa isi catr. Öni angeic: “Tha mano kö la itre hene ne politik qaja ka hape, ‘Atreine hi hun nyinyine la itre jol,’ ngo thatreine pe angatr. Kolo hi lai a amamane ka hape, ka nyipici me inamacane la Tusi Hmitrötr.”

Öni Daniel, lo hna qaja ha e caha, ka hape: “Kola tro la itre drai, nge kola mama trootro laka, thatreine kö la itre atr troa mus. . . . Tha hnene kö laka, hetre manie i epun ngöne baak, nge tro epuni a kapa la retraite elany, ke, tro ha tro loi la mele i epun. Nyimutre la itre atr ka hleuhleu pine lai.”

Tha Tusi Hmitrötr hmekuje kö a thupë së qa ngöne la itre mejiune ka thoi. Ej a hamë mejiune koi së. Celë hi hne së hna troa ce wang.