TRO KÖ A PATR LA IHNADRO?
Enyi Ne Mano
KA NYIPIEWEKË la enyi ne mano, ngo tha goi mano hmekuje kö. Eje fe a thupëne la ihnadro qa ngöne la ecatrene la jö. E patre ju la enyi cili, tru la lepany ngöne la ihnadro, uti hë la tro ej a catr tune la wene glas.
Itre Jol Ka Traqa
Ame la easa manone la enyi ka ngazo, ke tro lai a hetre ethan kowe la mele së. Önine la Organisation mondiale de la santé (OMS), ame thene la 100 lao atr, ala casi hi la ka manone la enyi ka lolo.
Hnene laka, hna apoizinëne la eny, matre kola tith la itre atr hnene la itre sine mec, tune la hmanono, me AVC, me cancer ne pumo. Hnene lai matre, e nöjei macatre kola mec la ala 7 000 000 lao atr, nge jeune palakö.
Hna Xup La Ihnadro Troa Cile Palua
Hna xup la ihnadro matre tro palahi a hamë enyi ne mano ka lolo kowe la itre ka mel. Tro hi a lolo la enyi cili, e tro la atr a tuluth la aqane tro angeic a huliwan la itre poizin. Troa tune kaa?
-
Atre hi easë ka hape, itre hnaxulu a xom la enyi ka ngazo, ene la dioxyde de carbone. Ngo atre hi epun ka hape, ka tru catre kö la huliwa ne la itre paletuvie? Nyine hain la huliwa ne la itre paletuvie! Tru catre kö la dioxyde de carbone hnene ej hna xometrij qa ngöne la eny, hune la itre hnaxulu.
-
Önine la itre ka ithel, ame lo itre algue ka tru, tune lo itre mëmio (algues brunes), ke itre ej a xometrij la dioxyde de carbone qa ngöne la enyi ne mano. Itre ej a manij jëne la itre bulles d’air. Ame hë la itre ej a traqa nyipine la hnagejë, kola kaqa la itre bulles d’air. Matre kolo pë hë a lö hnine la hnagejë la itre algue ka trene dioxyde de carbone, me lapa e kuhu trepene koi itre macatre.
-
Ame lo easa confinement pine la COVID-19, hne së hna öhne laka, atreine hi la enyi ne mano troa sipu aporopëne ej. Ame lo 2020, ngöne la fen asë, hna pane thing la itre usine me cile la itre loto, matre hne së hna öhne laka, porop hmaca la eny. Önine la “Rapport 2020 sur la qualité de l’air dans le monde,” alanyim la itre nöj ka qaja ka hape, thupene la confinement, lolo catr hmaca ha la enyi ne mano.
Kola Thel Troa Nyinyine La Jol
Kola acone la poizin ngöne la enyi la easa ti velo
Hnene la itre mus hna up la itre usine troa acone la itre poizin hnei angatr hna nuetrij. Nge ame pena la itre ka ithel, angatr a thel la itre aqane troa apatrene la itre enyi ka poizin. Ame la ketre aqan, angatr a huliwan la itre microbe matre troa saze la poizin kowe la ketre ewekë ka lolo. Ketre, angatr a upe la itre atr troa trongë ihnadro maine ti velo, nge troa huliwan wang la tirisite e kuhu hnalapa.
Itre mus a hamë ifureno kowe la itre atr, matre co hi la poizine ngöne la enyi ne mano. Ngo alanyim palakö la itre atr ngöne la fen ka pë ifureno
Ngo ijije kö lai? Waea! Celë hi hna qaja ngöne la ketre rapor ne 2022 qaathene la OMS me Banque Mondial.
Önine lai rapor, ame lo 2020, alanyimu catr la itre atr ngöne la fen asë ka xom la itre ewekë ka apoizinëne la eny troa atronyi xen. Ngo ame ngöne la fen, tha tru kö hnei atr ka trene mani, matre itöne la itre ifureno. Nge alaxalaithe hi la itre götrane gaa hetre sinöe nyine athi eë.
The Xou Kö—Mekuna i Tusi Hmitrötr
“Hane hi la hna qaja hnene la nyipi Akötresie, Iehova lo Atre Xupe la hnengödrai me . . . atre kuca la ihnadro memine la itre ewekë ngön ej, nge atre hamëne la hnamano kowe la nöjei atr memine la mel kowe la itre ka tro ngöne ej.”—Isaia 42:5, NWT.
Akötresie la ka xup la enyi ne mano memine la itre ewekë ka aporopëne ej. Ketre, ka tru trenge mene Nyidrë, nge ka hnim la nöjei atr. Haawe, tro kö Nyidrë a nue la itre atr troa apoizinëne la enyi ne mano? Wange ju la tane mekun “Ase Hë Akötresie Qaja Ka Hape Tha Tro Kö a Patr La Ihnadro.”
