Hnauëne Laka Pëhë Metrötre Ne La Itre Atr?

AMELEN

PINE NEMENE MATRE LOI E TRO SA IMETRÖTRË?

Ke kola apëne la itre iwesitrë.

Önine la ketre edromë: “Kola apujene la elëhni hnene la aqane sa ka menyik, ngo kola aciane la wesitr la kola ithanata akökötreny.” (Itre Edromë 15:1) Ame la itre aqane ithanata, me ujë ka pë metrötr, ke kösë kola fi sasine la eë ka mel, nge tru catre la itre thangane ka ngazo.
Öni Iesu: “Kola ewekë la që qa kuhu hni.” (Mataio 12:34) Ame la atr ka ithanata nge ka pë metrötr, ke kolo hi lai a amamane ka hape, hetre imethinë e kuhu hni i angeic. Maine jë angeic a xele ma wange la itre ka isa hane ngönetrei kö me angeic, ka isa nöje kö, maine itre ka trene mani maine ka pë mani hui angeic.

Hna hnyinge kowe la 32 000 lao atr ka mel ngöne la 28 lao nöj, nge 65% thei angatr ka qaja ka hape, kola haine la aqane pë metrötr me pë ihnim la itre atr enehila.

NYINE TRO EPUNI A KUCA

Ngacama tha ceitu kö la aqane waiewekë i epun me itre sine huliwa me sine ini epun, ngo metrötrë angatre ju. Thele jë la itre mekuna i angeic ka ihmeku me eö. Tro lai a xatua epun matre tha tro kö a mekuhni, maine qeje gele itre xan.

“Ea loi ju hë hna iwaigele, matre tha tro kö Akötresieti a hane waigele nyipunie.”—Mataio 7:1.

Kuca jë koi itre xan la hnei epuni hna ajan troa kuca koi epun. Maine tro epuni a thiina ka loi me hnime ceitu la itre atr, tro lai a uku angatre troa hane ujë tune koi epun.

“Ame la hnei nyipunieti hna ajane tro la itre atr a kuca koi nyipunie, ketre kuca tune jë fe koi angatr.”—Luka 6:31.

Nue pi la ngazo i itre xan. Maine tro ketre a ujë maine ithanata angazonyi koi epun, the mekune kö ka hape, hnei angeic hna thë, nge canga thëthëhmine ju la hna kuca.

“Ame la atreine thelewekë ne la atr, ke ka ahmitrëne la elëhni i angeic, nge tro ha qaja aloinyi angeic, ke tha nyipiewekëne kö angeic la hna tria koi angeic.”—Itre Edromë 19:11.

ITRE HNE HUNI HNA KUCA

Itre Temoë Iehova a isine troa metrötrë itre xan.

Eahuni a thel troa tro fë la itre ini qa hnine la Tusi Hmitrötr koi itre xan. Ngo tha eahuni kö a musinë angatr troa kapa la itre ini cili, maine itre mekuna i eahun. Eahuni pe a trongëne la hna qaja hnei Tusi Hmitrötr ka hape, troa tro fë la maca ka loi “cememine la menyike me metrötr atraqatr.”—1 Peteru 3:15; 2 Timoteo 2:24.

Tha eahuni kö a iwangatrehmekunyi atr. Eahuni a kapa ngöne la itre icasikeu hun la itre atr ka traqa qa ngöne la itre xaa nöj, nge ka ajan troa trotrohnine la Tusi Hmitrötr. Ketre, eahuni a hnime la nöjei pengöne atr, me isine troa “metrötrëne la nöjei atr asë.”—1 Peteru 2:17.

Eahuni a isa metrötrëne la musi ne la nöje hun. (Roma 13:1) Eahuni a metrötrëne la itre wathebo, me nyithupei impôts. Ngacama tha eahuni kö a hane kuci politik, ngo eahuni a metrötrëne la mekuna i itre xan göi politik.

HMEKE JË!