HMEKE JË! Na. 2 2018 | 12 Lao Jëne Madrine Kowe La Fami
12 Lao Jëne Madrine Kowe La Fami
Hne së hna dreng la itre ewekë ka thë la mele ne la itre fami. Ngo, pine nemene matre ka loi pe kö la itre xa fami?
Ame ngöne la itre macatre 1990 koi 2015, kola alua elë la etrune la itre ka seihnacil e Etazini, itre ka 50 lao macatre, nge akönia elë la etrune la itre ka seihnacil nge 65 lao macatre i angatr.
Thatreine hë la itre keme me thin la nyine tro angatr a kuca. Hetre itre ka inamacane ka mekun ka hape, loi e tro palahi a qaja aloine la itre nekönatr. Ngo, öni itre xan, nyipici troa ihnim, ngo loi e tro fe a catrehnine la aqane troa xatua nyudren.
Ame la itre xa thöth, itre ka tru hë ngo, thatreine pala kö troa ketre mel cas.
Ngo ame pe kola mama hnyawa laka, . . .
Ijije hi troa cile huti la faipoipo, me kepe madrin la lue trefën.
Ijije hi tro la keme me thin a hajine la nekö i nyidro cememine la ihnim.
Ijije hi troa kapa hnene la itre thöth la itre ini ka troa xatua nyudreni elanyi ngöne la mele i nyudren.
Hna tune kaa? Tro la zonale celë hna hape, Hmeke Jë! a ithanatane la 12 lao jëne madrine kowe la fami.
1: Troa Inyipicikeu
Köni eamo ka troa xatuane la itre trefën troa mele tingeting.
2: Ce Huliwa Jë
Hapeu, ceitune hi la föi epun memine la ketre atr ka ce thawa la uma me epun?
3: Metrötr
Nyipiewekë troa atre la nyine qaja me kuca matre tro la föi epun a dreng laka, epuni a metrötrë angeic.
4: Nue La Ngazo
Nemene la ka troa xatua epuni troa elë hun la itre tria ne la föi epun?
5: Ce Ithanata
Köni götrane ka troa xatua epun troa easenyi memine la itre neköi i epun.
6: Ihaji
Hapeu, e tro a hajin la nekönatr tro kö nyën a mekune ka hape, ka pë hnënyöngöne nyën?
7: Trepene Mel
Nemene la itre trepene meköt hnei epuni hna troa inine kowe la itre nekö i epun?
8: Amamai Tulu
Loi e troa ce tro la itre ithanata me huliwa i epun, matre troa ketr la hni ne la nekö i epun.
9: Sipu Pengöi Eö
Tro la itre thöth a isigöline tune kaa la itre hnei angatr hna mejiune kow?
10: Atr Hna Mejiune Kow
Maine tro sa isine tro la kem me thine së a mejiune koi së, tro hë së lai a macaje trootro.
11: Huliwa Catr
Inine jë troa catre huliwa ngöne la epuni a thöth, ke celë hi ka troa xatua epuni elany.
12: Nyine Eatrën
Maine hetre mekune i eö fe, tro hë lai a acatrene la sipu mejiune i eö, memine la aqane imelekeu i eö me itre xan, nge tro fe ha tru la madrine i eö.
Ixatua Kowe La Fami
Tro la itre eamo qa hnine la Tusi Hmitrötr a xatua epun, matre tro loi la faipoipo i epun me mele madrin e hnine la fami.
