Ame la kola sisinyi hnei trahmanyi me föe troa faipoipo, tre, kösë ketre ewekë lai ka troa cile hut epine palua, nge ka troa aijijë nyidro troa mele tingeting. Loi e troa xecie koi nyidro laka, tro nyidroti a inyipicikeu, ngacama traqa ju hë la itre jol.

Ame itre xa trefën, angatr a acatreihni troa ce lapa, ke xele kö la itre sinee me fami tro angatr a sei hna cil. Ngo, ame la ka troa nyitrepene la faipoipo, tre ihnimikeu me imetrötrekeu.

TREPENE MEKÖT NE LA TUSI HMITRÖTR: “The tro kö la trahmanyi a helëne la fö’ i angeic.”​—1 Korinito 7:11.

“Maine ka nyipiewekë koi epun la hnei epun hna sisiny, eje hi lai laka, tha tro kö epuni a canga dreng akötrën la hna qaja koi epun. Tro pe epuni a thel troa canga iloi, me saqe troa iqejemenukeu. Ka hetre nyin asë hi la itre jol, matre tha epuni fe kö a meku sei hna cil.—Micah

Ame la kola qëmeke hnene la lue trefën kowe la ketre jol, nge ka wangesixane nyidroti la hna sisiny, tre canga tro hi nyidroti a mekun ka hape, tha ijiji nyidroti kö troa ce mel. Nge e cili, canga tro hi nyidroti a thelejëne troa itrij.

“Alanyimu la itre trefën ka xötrei faipoipo ka mekun laka, e pëkö madrine i angatr e hnine la faipoipo ke, ijije hi tro angatr a sei hna cil. Nge, e cili, triane hë angatr lo hna isisinyikeu.”—Jane

ISA TUPATHE JË

Ame la epon a iwesitrë . . .

• Epuni kö a hace pine la hna faipoipo memine la föi epun?

• Epuni kö a piine la ketre atr?

• Epuni kö a qaja ka hape, “Tro hë nyiso a inu!” maine “Eni ha tro troa thele hna i eö”?

Maine itre ewekë la ka traqa koi epun ke, ijine tro hi la a acatrene la faipoipo i epon.

CE ITHANATANE JË MEMINE LA FÖI EPUN

• Kolo kö a ethitre trootro la faipoipo i nyiso? Maine eje hi, hnei nemen?

• Nemene la nyine tro nyiso a kuca matre troa acatrene hmaca la faipoipo i nyiso?

IXATUA

• Sija ju ngöne la sine pepa la itre mekun ka amamane la ihnimi epun kowe la föi epun

• Amë jë ngöne la biero, maine hnë huliwa i epun la ifoto ne la föi epun, nyine amamane laka, ka tru koi epun la faipoipo i epun

• Ame ngöne la nöjei drai, hëne jë la föi epun, ngacama epuni ju hë a huliwa maine kuca la itre xa jol

TREPENE MEKÖT NE LA TUSI HMITRÖTR: “Ame la hnei Akötesie hna isilekeun, the tro kö a shenge hnei ate.”​—Mataio 19:6.