Ame la atr ka hetre hni ne ipië, angeic a metrötrë itre xan. Tha ka pi tru kö angeic, nge tha angeice kö a thel troa wangatrunyi angeic hnei itre xan. Angeice pe a wangatrune la itre xan, nge aja i angeic troa xomi ini qaathei angatr.

Alanyimu la itre atr ka mekun ka hape, ka pë hnënyöngöne la atr ka hni ka ipië, ngo trenga thoi lai. Celë pe ka xatua angeice lai troa öhne la itre tria i angeic, me atre la itre ifego.

• Tro ha hetre sinee i nyën. Önine la ketre itus (The Narcissism Epidemic) ka hape, “Tha ka jole kö kowe la itre atr ka hetre hni ne ipië troa hetre sinee. Ketre, tha ka jole kö koi angatr troa ithanata, me easenyine la itre xan.”

• Troa tro loi la mele i nyën elany. Maine tro la nekönatr a inin enehila troa hni ne ipië, canga tro hi nyën a öhnyi huliwa elany. Öni Droketre Leonard Sax, “Ame la thöth ka wangatrunyi angeice pala ha, tha wangatrehmekune kö angeic la itre hnei angeic hna thatreine kuca. Nge, ame la angeic a troa thele huliwa, canga tro hi a wange angazonyi angeic hnene la itre maseta. Ngo, ame la thöth ka thele troa atre la hna ajan hnene la maseta, tro angeic a öhnyi huliwa.” *

Xatuane jë la nekönatr troa tuluth la aqane troa waipengöi nyën.

TREPENE MEKÖT: “Maine tro ketre a mekune ka hape, ka sisitria angeic ngo tha eje pe, angeice hi lai a amenu angeice kö.”—Galatia 6:3.

• The selë nyëne kö. Kösë epuni a ithuecatre kowe la nekönatr la epuni a qaja koi nyën ka hape, “Ame asë hi la hnei eö hna ajan, tre, troa hamë eö” maine “Ijiji eö hi troa traqa kowe la hnei eö hna ajan.” Ngo, tha nyipici kö lai. Tro la nekö i epun a traqa kowe la hnei nyën hna ajan, e tro nyën a atreine waiewekë hnyawa göne la itre mekun nyine tro nyën a eatrën, me catre huliwa.

• Troa qaja aloinyi nyën, e hetre ewekë hna kuca. Maine tro sa qaja kowe la nekönatr ka hape, “ka lolo catre” nyën, nge pë pe ewekë hna kuca, ke, tha tro kö nyëne lai a ipië. Loi e tro la keme me thine a qaja aloinyi nyën, e hetre ewekë ka lolo hnei nyën hna kuca.

• Troa tuluth la aqane huliwane la Ëternet. Ame ngöne la itre site Ëternet, tre, itre atr a sipu selën, me qaja atrune la hnei angatr hna kuca. Ka ifekethe lai memine la troa hni ka ipië.

•   Troa xatua nyën troa canga qeje menu. Ame la kola tria hnene la nekönatr, xatua nyëne jë troa kapa la tria i nyën, me qaja amaman.

Troa hetre hni ne ole.

TREPENE MEKÖT: “Amamane jë la hni ne ole i nyipunie.” —Kolose 3:15.

• Troa hetre hni ne ole kowe la itre hna xup. Loi e tro la itre nekönatr a hetre hni ne ole kowe la itre hna xup, me trotrohnine laka, nyipiewekë itre ej kowe la mel. Ka nyipiewekë la enyi nyine mano, me tim nyine ij, me xen. Maine tro epuni a xom la itre ewekë celë nyine hamë ini kowe la nekönatr, tro nyën a haine la itre huliwa hna kuca hnene la Atre Xup, me olene la itre ewekë ka mingöming hnei Nyidrëti hna xup.

• Troa olene kowe la itre atr. Xatuane jë la nekönatr matre tha tro kö nyën a zalu, ke, hetre ka atreine kö hui nyën. Ngo, amamane jë pe koi nyën la aqane troa xomi ini qaathei angatr.

• Troa qaja amamane la hni ne ole. Inine jë la nekönatr troa olen. Loi e troa qaja me amaman. Maine tro pala hi sa hetre hni ne ole, tro fe sa hetre hni ka ipië.

Inine jë la nekönatr laka, hetre eloine troa xatuane la itre xan.

TREPENE MEKÖT: “Ipië ju nge mekune ju ka hape, sisitria kö itre xane hui nyipunie. Haawe, the thele ewekë thatraqai nyipunieti hmekuj, ngo thele jë fe la ka loi koi itre xan.”—Filipi 2:3, 4.

• Troa thue jole i nyën. Maine tha thue jolene kö la nekönatr, tro nyën a mekune ka hape, ka nyipiewekë kö la itre ewekë hnei nyën hna pi kuca hune la itre jol. Loi e troa pane kuca la itre jol, nge thupene lai, kola elo. Amamane jë la enyipiewekëne la itre jol hna kuca koi itre xan. Tro angatr a olene koi nyën, me metrötrë nyën.

• Hetre eloine troa xatuane la itre xan. Maine tro la nekönatr a xatuane la itre xan, tro hë nyëne lai a canga macaj. Haawe, xatua nyëne jë troa thele la itre ka aja ixatua. Ce ithanatane jë la nyine tro nyën a kuca matre troa hamë ixatua. Qaja aloinyi nyëne jë, nge xatua nyëne jë.