INI 1
Troa Xomihni
NEMENE LA ALIENE LA TROA XOMIHNI?
Ame la atr ka xomihni, tre,
-
ka atreine itreqe
-
ka hmitr troa elëhni
-
tha ka momoiasene kö la huliwa
-
ka amë panëne la aja ne la itre xan
NYIPIEWEKË LA XOMIHNI
Canga tro hi a thipëne la ewekë ka ngazo hnene la nekönatr ka atreine xomihni, ngacama hetre loi hnei angeic hna troa kapa qa ngön. Ngo, ame la nekönatr ka thatreine xomihni, tro angeic a
-
pi isi
-
meci fë mekun (dépression)
-
ufi sixa, me iji gorok, maine xomi dorog
-
ngazo la aqane xen
Kola mama ngöne la itre hna ithel ka hape, ame la itre nekönatr ka atreine xomihni, tha tro kö a canga tithi nyudren hnei mec, maine hetre jol göi mani, maine hetre jol me mus, e tru hë nyudren. Porofesör Angela Duckworth (Université de Pennsylvanie) la ka ithel. Öni eahlo: “Ka hetre eloine pala hi la troa xomihni.”
TROA ININE TROA XOMIHNI
The xoue kö troa qaja ka hape, ‘Waea.’
TREPENE MEKÖT: “E öni eö jë ka hape, ‘Ö,’ loi e troa ö, nge e ‘Waea,’ waea.”—Mataio 5:37.
Ame itre xaa ijin, tro la nekönatr a treij me jipa ngöne la gaa tru atr, matre tro keme me thin a hamëne la hnei nyën hna ajan. Maine tro nyidroti a kei thenge la aja i nyën, tro pala pë hë nyëne lai a ujë tun matre troa kapa la hna ajan.
Ketre, maine tha cile kö keme me thin troa thipëne la ketre ewekë kowe la nekönatr, tro hë nyën a trotrohnine la ketre ini ka sisitria. Tha tro kö sa mekun ka hape, tro pala hi a kapa la nöjei aja së. Öni David Walsh, ketre psychologue, ka hape, “Easa mekun ka hape, ame la atr ka kapa pala hi la hnei angeic hna ajan, tre, ka madrin, ngo tha ka nyipici kö. Ka madrine catre kö la atr ka atreine xomihni. Tha epuni kö a hnim la nekö i epun, e tro epuni a nue nyëne troa mekun ka hape, tro pala hi la itre atr a hamë nyëne la itre hnei nyën hna ajan.” *
Maine tro epuni a thipëne la itre xaa ewekë hna ajan hnene la nekö i epun, troa hmaloi koi nyën elanyi troa xomihni. Ame la kola iaö nyën troa xomi dorog, maine kuci ngazo, maine kuca la itre hna majemin ka ngazo koi nyën me koi itre xan, canga tro hi nyëne lai a thipën.
Loi e troa trotrohnine hnene nekönatr laka, maine tro nyën a kuca la loi maine ngazo, ka hetre thangane pala hi.
TREPENE MEKÖT: “Ame asë hi la hna tran hnei atr, celë hi hnei angeic hna troa menuën.”—Galatia 6:7.
Loi e troa trotrohnine hnene la nekönatr laka, ame la hnei nyën hna kuca, tro kö nyën a xeni pun elany. Nge, e thatreine kö nyën xomihni, haawe, troa hetre ethane kowe la mele i nyën. Maine ka canga elëhni nyën, troa xele ma wai nyën hnene la itre atr. Ngo, maine ka atreine xomihni nyën ngöne la kola inyisi, nge ka metrötr ngöne la kola ithanata hnene la ketre, tro hë la itre atr a thel troa easenyi nyën. Xatua nyëne jë troa trotrohnin ka hape, troa lolo la mele i nyën, e tro nyën a xomihni.
Inine jë la nekönatr troa atreine tulu ewekë.
TREPENE MEKÖT: “Atreine jë nyipunieti tuluthe la ka nyipiewekë.”—Filipi 1:10.
Maine tro sa xomihni, tro hë lai a sewe së troa kuca la itre ewekë ka ngazo. Ketre, troa xatua së troa kuca la itre ewekë ka nyipiewekë, ngacama tha aja së kö. Ka nyipiewekë catr troa trotrohnine hnene la nekönatr laka, hetre ewekë nyine troa kuca panën. Loi e tro nyën a pane ini qa qëmekene troa elo.
Amamai tulu jë.
TREPENE MEKÖT: “Eni hi lai a amamai tulu koi nyipunie, matre ame la hnenge hna kuca koi nyipunie, hane jë fe kuca tun.”—Ioane 13:15.
Öhne hnyawa hi la nekönatr la aqane ujë i epun ngöne la epuni a elëhni. Amamane jë koi nyën laka, troa tro loi la mele i epun, e tro epuni a xomihni. Ame la kola huliwa menu hnene la nekönatr, nemene la aqane ujë i epun? Epuni kö a canga elëhni maine xomihni?
^ par. 20 Qa ngöne la itus (qene Papale) hna hape, Waea—Ka Nyipiewekë Tro La Itre Keme Me Thin a Qaja Kowe La Nekönatr.