Ame la atr ka atreine wangatrehmekune la loi qa ngöne la ngazo, atre hnyawa hi angeic la loi me ngazo. Tha ka saze kö thenge la itre aliene hni angeic. Angeice pe a nue la itre trepene meköt troa amekötine la hnei angeic hna kuca, ene mina fe ngöne la itre götrane laka, pëkö ka öhnyi angeic.

Itre nekönatr a dreng la nöjei pengöne mekun göi loi me ngazo, jëne la itre atr ngöne la hna ini, jëne miuzik, maine film, maine itre ka mama ngöne tele. Tro itre ej a upi nyudreni troa waipengöne hmaca la itre ini hnei nyudreni hna kapa göi loi me ngazo.

Ketre jol ka tru kowe la itre thöth. Önine la ketre itus (Beyond the Big Talk), ame ngöne la ijine cili, “nyipiewekë tro la itre thöth a trotrohnine ka hape, nyimutre la itre atr ka troa iaö angatr troa xome la ketre aqane ujë matre troa kepe angatr. Ketre, nyipiewekë tro angatr a inine troa axecië mekune hnyawa, ngacama tha kapa kö hnene la itre enehmu i angatr.” Haawe, nyipiewekë tro la itre keme me thin a inine la itre nekönatr qëmekene tro nyudreni a thöth.

Inine jë koi nyëne la loi me ngazo.

TREPENE MEKÖT: “Itre ka macaj . . . atreine i angatr troa wangatrehmekune la loi me ngazo.”—Heberu 5:14.

• Qaja jë la itre trengewekë ka amamane la loi me ngazo. E nöjei drai, qaja jë la itre trengewekë ka amamane la eisapengönene la ewekë ka loi me ka ngazo. Tune la kola hape: “Celë hi aqane ujë ne la atr ka kuca hnyawane la huliwa; aqane ujë ne la atr ka kuca angazone la huliwa.” “Ka mele nyipici la atre celë; ka mele hnihni la atre celë.” “Ka lolo lai; ka ngazo lai.” Ame e cili, tro hë la nekönatr a atre la nyine troa kuca, me tha nyine kuca.

• Qaja jë la kepine matre ka loi la ketre ewekë, maine ka ngazo. Hnyinge jë koi nyën ka hape: Pine nemene matre loi e troa kuca hnyawa la huliwa? Nemene la aqane troa thë la aqane imelekeu ne la lue sinee hnene la thoi? Pine nemene matre ngazo troa atrekënö? Xatuane jë la nekönatr troa atreine wangatrehmekune la loi qa ngöne la ngazo.

• Amamane jë la enyipiewekëne troa hetre trepene mele ka loi. Qaja jë ka hape: “Maine tro eö a huliwa hnyawa, tro hë la itre xan a mejiune koi eö” maine “Maine tro eö a menyik, tro hë la itre atr a epe koi eö.”

Thele jë tro la itre atrene la hnepe lapa a mel thenge la itre trepene mele cili.

TREPENE MEKÖT: “Catre jë isa waipengöi nyipunie.”—2 Korinito 13:5.

•   Loi e tro la itre atrene la hnepe lapa a mele thenge la itre trepene mele cili, matre ijiji epun troa qaja ka hape:

  • “Ame ngöne la hnepe lapa hun, pëkö ka thoi.”

  • “Tha eahuni kö a isi, maine icatrë.”

  • “Tha eahuni kö a ithanata akökötreny, maine iqaqa.”

Tro la nekönatr a öhne ka hape, tha itre hna amekötine hmekuje kö. Ngo, aja ne la hnepe lapa tro la itre atr a atre ka hape, angatr a mele thenge la itre trepene meköt cili.

• Ithanatane lapane jë la itre trepene mele cili memine la itre nekönatr. Ame e nöjei drai, hamë ini jë, jëne la itre ewekë ka traqa. Waipengöne jë la itre trepene mel hnei epon hna ini nyën, memine la itre ka mama ngöne televizio, maine ngöne la hna ini. Hnyinge jë kowe la nekönatr ka hape: “Nemene la nyine tro eö a kuca?” “Nemene la nyine tro la fami së a kuca?”

Acatrene jë la aja i nyën troa kuca la loi.

TREPENE MEKÖT: “Isine jë matre tro pala hi a wië la itre mekuthetheu i nyipunie.”—1 Peteru 3:16.

• Qaja aloinyi nyëne jë, e hna kuca la ketre ewekë ka loi. Ame la kola kuca la ketre ewekë ka loi hnene la nekönatr, qaja jë koi la kepin koi nyëne me hape, ka lolo la hnei nyën hna kuca. Qaja jë ka hape: “Ka lolo la aqane huliwa i eö. Madrine catr eni koi eö.” Maine tro la nekönatr a qaja koi epun la ketre ewekë ka ngazo hnei angeic hna kuca, qaja aloinyi angeice jë, ke, hnei angeic hna qaja asë koi epun. Thupene lai, haji angeice jë.

• Amekötine jë la ewekë ka ngazo hna kuca. Xatuane jë la nekönatr troa qëmeke kowe la itre tria i nyën. Loi e tro la nekönatr a atre la ewekë ka ngazo hnei nyën hna kuca, memine la eisapengönene la aqane ujë i nyën memine la itre ini hna trongëne hnene la fami. Alanyimu la itre keme me thine ka cil troa qaja kowe la nekönatr ka hape, ka ngazo la hnei nyën hna kuca, wanga kucakuca pi nyën. Ngo, ame la kola qejepengöne hnene la keme me thin la kepin matre ka ngazo la hnei nyën hna kuca, nyidroti hi lai a xatuane la nekönatr troa inine la mekuthetheu i nyën. Celë hi matre tha tro hmaca kö nyën a kuca elanyi la huliwa ka ngazo.