Kola qaja hnene la itre ka inamacan ka hape, tha ka aca traqa kö la akötr, ngo hetre itre ewekë ka traqa qëmeken. Eje hi laka, isapengöne kö la aqane mama the së la akötr. Hapeu, isapengöne kö la atr ka tha akötre menu kö memine la atr ka “xomehnöth” la itre aliene hni angeic? Waea. Pëkö hna amekötin göne la “aqane” troa mama la akötre së. Ame la easa akötr, isa aqane ujë së kö thenge la pengö së, me aqane mele së, me itre hne së hna melën, me aqane meci ne la atr hne së hna hnim. Ngo, eje hi laka, hetre eloin kowe la ngönetrei së la easa amamane la akötre së.

Pëkö ka atre la akötr hna troa melëne hnene la itre atr ka meci sineen. Ngo, ame itre xa ijin, ceitune hi la itre jol me itre akötr ka traqa kowe la itre atr. Hanawang la itre xa ewekë ka traqa:

Thatreine kö xomehnöth la akötr. Kola treij hleuhleu pine laka, kola ajane troa iöhnyi hmaca memine la atr ka mec. Hetre ijine loi me ijine ngazo, ke, kola mekune lo itre drai ne ce mel ekö. Maine jë troa puje lai ka mec. Ame ngöne la xötrei, maine jë tro sa sesëkötr me luelu. Mekune palahi Tiina la hnei eahlo hna qaja ngöne la kola meci hnei Timo, föi eahlo. Öni Tiina: “Ame lo xötrei eni pe hi a cil. Goi thatreine fe ni treij. Tru palaha la akötreng matre, ame itre xa ijin, thatreine kö ni mano. Tha mekune kö ni ka hape, troa traqa la ewekë cili.”

Kola xou, me elëhni, me sipu upezö së kö. Öni Ivan, “Hna meci hnei Eric, neköng ka 24 lao macatre. Thupene lai, tru catre pi hë la elëhning me Yolanda, föeng! Nge, tha hane fe kö traqa tune lai koi nyio. Ame koi nyio, zöi nyio hi la kola meci hnei nyën, ke, tha hnei nyio kö hna kuca asë la hnei nyio hna atrein matre xatua nyën.” Hna hane traqa fe la mekune cili koi Alejandro. Hna mecitriji angeic hnene la föi angeic thupene la itre macatre ne wezipo. Öni angeic: “Ame ngöne lo xötrei, eni a mekune ka hape, hnei Akötresie hna nue ni troa akötre tune lai, ke, eni la ketre atr ka ngazo. Ame hë e thupen, tha lapa hnyawa kö la mekunang, ke, kösë eni a upe koi Akötresieti la zön.” Nge öni Kostas, lo hna qaja ha ngöne lo tane mekun ka ase hë ka hape: “Ame itre xa ijin, eni a wesitr koi Sofia pine angeice mec. Ngo, hace catre ni e thupen, ke, tha zöi angeice kö.”

Tha lapa hnyawa kö la mekun. Ame itre xa ijine kola isazikeu la itre mekun. Tro la ka meci sineen a mekun laka, ka mele pala kö lai ka mec. Matre, kösë drei angeice hi së e ithanata, me öhnyi angeic, me drenge laka, angeice hi ezi së. Ketre, troa jole kowe la atr ka meci sineen troa mekune hmaca lo itre drai hnapan. Öni Tiina: “Ame itre xa ijin, eni hi a porotrik memine la ketre atr, ngo kösë ketre mekunange kö! Tru catre la itre ewekë nyine kuca ngöne la kola meci hnei Timo. Matre ame itre xa ijin, jole koi ni troa mekune la ca ewekë, ke, tiqa palaha la itre mekun ka ajolë ni. Celë hi matre hleuhleu catre ni.”

Hetre aja troa lapa cas. Jole kowe la ka meci sineen troa ce memine la itre xan. Öni Kostas: “Ka hace catre koi ni troa ce memine la itre ka faipoipo. Nge, tune fe la itre ka tha faipoipo kö.” Kola qaja hnei Yolanda, föi Ivan, ka hape: “Kösë jole koi ni troa ce tro memine la itre ka eetre lapa, nge ka co hi la itre akötre i angatr hune la akötre ka eje theng! Ketre, itre xan a qaja aloine la itre nekö i angatr. Madrine catre ni koi angatr, ngo ame ngöne la ketre götran, jole koi ni troa drei angatr. Trotrohnine hi ni me föeng laka, tha hna hmaca kö la mel e cili. Ngo, tha ajane kö nyio troa dreng la itre porotrik ka tune lai.”

Kola traqa la itre sine mec. Kola saze la aqane xen, me meköl. Hetre ethane kowe la ngönetrei. Mekune pala kö Aaron la macatre ne meci la keme  i angeic. Öni angeic: “Thatreine kö ni meköle hnyawa. Ame e jidr, casi palahi la hawa ne hlë ni, ke, tru catre la hnenge hna meku kaka.”

Mekune pala kö Alejandro la kola tithi angeic hnene la itre mec hna thatreine qejepengön. Öni angeic: “Anyimua wai droketre hë ni, ngo pëkö hna öhn. Ame koi ni, hnene laka, tru palaha la akötreng, matre kösë ka wezipo ni.” Ngo ame hë la kola patre trootro la akötr theng, mama pi ka hape, pëkö mecing. Eje hi laka, ka lolo la hnei Alejandro hna kuca, ene la troa wai droketre. Hetre thangane kowe la ngönetrei së la kola meci la atr hne së hna hnim: kola ngazo catr la itre sine meci së, maine kola fetra pena la itre xa mec.

Pëhë jole hna kuca. Thupene la meci Eric, mekune pala kö Ivan la ewekë ka traqa. Öni nyidrë: “Hnei nyio hna thuemacane la itre sinee me itre enehmu i Eric, memine fe la maseta i angeic, memine la atr hnei angeic hna lapa then. Nyimutre catr la itre pepa i mus nyine tro nyio a nyialien. Thupene lai, hnei nyio hna goeëne hmaca lo itre ewekë i Eric. Celë hi matre, nyipiewekë tro nyio a mekune hnyawa la hnei nyio hna troa kuca. Tha ka hmaloi kö, ke, kucakuca catre nyio, nge tha loi kö la mekuna i nyio.”

Ngo, ame la ewekë ka jole catr, tre, ene la troa kuca la itre ewekë hna majemine kuca ekö hnene lai ka mec. Celë hi hna melëne hnei Tiina. Öni eahlo: “Timo la ka goeën me huliwane la manie i nyio. Ame enehila, hnëqange pë hë, matre hace catre koi ni. Eni a ketre hnying, ka hape, ‘Tro kö ni a atreine troa eatrëne hnyawan?’ ”

Jëne la itre jol hna e wengëne e caha, kola mama la ejolene kowe la atr troa xomihnine la akötre i angeic. Eje hi laka, tru catre la hleuhleu ngöne la kola meci la ketre atr hne së hna hnim. Ngo, maine tro sa canga atre la itre ewekë ka troa traqa koi së, tro hë sa atreine xomihnine lai akötr. The thëthëhmine kö së laka, isa aqane tro kö la itre atr a melëne la nöjei akötr. Ketre, troa xatuane la atr ka meci sineen, e tro angeic a trotrohnine ka hape, hna melëne la akötr ka tune lai hnene la nöjei atr asë.

E meci pi la atr hne së hna hnim: Tha tro kö a cile huti la akötr, tro kö eje lai a patre trootro. Tha kolo kö lai a qaja, ka hape, tro hë sa thëthëhmine la atr ka mec. Ngacama tro ha nyiqaane patr lo itre akötr ka ej the së ngöne la xötrei, ngo tro kö a traqa la itre ijine tro hmaca itre ej a fetra. Hnene laka, easa mekune hmaca lo itre drai ekö, maine ngöne la itre ijine aniverser (drai ne faipoipo, drai ne mec, maine itre xa drai pena), haawe, itre ijine easë hmaca a akötr. Alanyimu la itre atr ka elë hune la jole cili. Jëne la ixatua hna kapa qaathene la itre sinee me itre enehmu, memine la itre sipu trengecatre i angatre kö, ijije hë kowe la itre ka meci sineen troa mele tun ekö.

Ije macatre ne troa akötr? Ame itre xan, thupene la itre treu, patre trootro hë la akötr. Ame thene la ka alanyim, troa cas maine lue macatre matre lolo hmaca jë la mele i angatr. Nge, ame pena itre xan, troa nyimu macatre qëmekene troa loi. * Öni Alejandro, “Köni macatre ne akötre ni.”

Loi e troa melëne la drai enehila, me kuca hi la ka ijij. The thëthëhmine kö laka, tha tro kö epuni a akötr utihë epine palua. Hapeu, hetre ewekë kö nyine tro epuni a kuca matre troa axapone la akötre i epun, maine apatrene pena?