“Thötre naene lao macatre ne faipoipo ni me Sofia *. Hna tithi Sofia hnene la ketre mec ka tru, ene pe, meci pi hi angeic. Tru catr la ixatua hnenge hna kapa qaathene la itre sineeng, nge ketre, hnenge palahi hna thele troa hetre nyine troa kuca. Ngo ame ngöne la macatre ka pexej, tha patre kö theng la akötr. Thatreine kö ni hnöth la itre aja ne la hning. Ame enehila, köni macatre thupene la meci Sofia, hetre ijine eni a hleuhleu atraqatr.”—Kostas.

Hapeu, hna mecitriji epuni kö hnene la ketre atr hnei epuni hna hnim? Maine eje hi, casi hi la aqane akötre i epun me Kostas. Ketre ewekë ka akötrë catr la troa mecitriji së hnene la föe së, maine ketre atrene la fami së, maine ketre enehmu së pena. Celë hi mekuna ne la itre ka inamacan, itre ka qejepengöne la akötr. Kola qaja hnene la ketre zonal (The American Journal of Psychiatry) ka hape, “ame la kola meci la ketre atr hne së hna hnim, alanyimu la ka mekune ka hape, tha tro hmaca kö sa iöhnyi me angeic, matre hace catre së.” Ame la kola akötr hnene la atr ka meci sineen, angeic a hnying, ka hape: ‘Tro ni a akötr utihë eu? Tro hmaca kö ni a madrin? Ekaa la hnë tro ni a öhnyi ixatua?’

Tro la zonale Hmeke Jë! a sa la itre hnyinge celë. Tro la tane mekune ka troa xulu a amamane la nyine tro epuni a kuca, e hna mecitriji epun hnene la atre hnei epuni hna hnim. Tro la itre xa tane mekun a amamane la itre aqane troa axapone la akötre i epun.

Aja hun tro la zonale celë a xatuane la itre ka xomiakötr troa öhnyi ixatua, me keukawa.