IXATUA KOWE LA ITRE KA MECI SINEEN
Ixatua Ka Tru Kowe La Itre Ka Meci Sineen
ALANYIMU ENEHILA LA ITRE KA THELE TROA TROTROHNINE LA AKÖTR KA EJ THENE LA ATR KA MECI SINEEN. Tune la hne së hna ce wange hë, ka ihmeku la itre eamo qaathene la itre ka inamacan memine la hna qaja hnei Tusi Hmitrötr. Kola amamane laka, ka nyipiewekë palahi la Tusi Hmitrötr enehila. Ngo, tha celë hmekuje kö la aliene ej. Eje fe a hamëne la itre ithuemacanyi hna tha öhne kö ngöne la itre xa itus, nge itre ka troa aupune la itre ka treij.
-
Pëhë akötre thene la itre ka mec
Öni Tusi Hmitrötr ngöne Ate Cainöj 9:5 ka hape, “Tha ’te kö la kete ewekë hnei ite ka meci hë.” Nge, “patë hë la ite mekune i angeic.” (Salamo 146:4) Celë hi mekuna i Tusi Hmitrötr, ej a aceitunëne la mec memine la kola meköl.—Ioane 11:11.
-
Mejiune kowe la Akötresie Atre Akeukawan
Öni Salamo 34:15: “Eje la lue xajawa i Iehova * hui ange ka meköt, nge ame la lue [hnangenyë] i nyidë, te, kola [dreng] la nine hë i angat.” Ame la easa fe la aliene hni së koi Akötresie jëne la thith, tha göi porotrike kö, maine tro hi a xomihnin la itre mekuna së. Ngo, jëne tro pe sa hetre imelekeu memine la Atre Xupi së, ke, Nyidrëti la ka ijij troa akeukawanyi së.
-
Hetre mejiune kowe la itre drai elany
Pane mekune jë la ijine troa amelene hmaca la itre atr ka mec! Anyimua amexeje hnei Tusi Hmitrötr la ijine cili, memine la aqane trongene la mele cili elany. Öni Tusi Hmitrötr, tro Akötresie “a köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec ; me hace hni me teij, me aköt.”—Hna Amamane 21:3, 4.
Alanyimu la itre ka mejiune koi Iehova, Akötresieti ne la Tusi Hmitrötr. Angatr a mejiune laka, tro hmaca angatr a iöhnyi memine la itre sinee i angatr ka mec, nge celë hi ka hamë trengecatre koi angatr matre troa xomihnine lai akötr. Hna meci la föi Ann, nge 65 lao macatre i nyidrë. Öni eahlo: “Eni a mejiune kowe la hna qaja hnei Tusi Hmitrötr laka, pëkö akötr thene la itre sinee së ka mec, nge tha hna thëthëhmi angatre kö hnei Akötresie. Tro Nyidrëti a amele angatr hmaca. Tha patre kö la mekune cili theng, matre celë hi ka aijijë ni troa elë hun la ketre akötr ka tru!”
Öni Tiina, lo trejine hna qaja ha ngöne lo qaan ka hape: “Qaane lo kola meci hnei Timo, tha hnei Akötresieti kö hna nue ni. Hnenge palahi hna öhne la ixatua i Nyidrë ngöne la itre ijine jol. Ka mele koi ni la hna thingehnaeane hnei Tusi Hmitrötr laka, troa hetre mele hmaca. Celë hi ka xatua ni troa cile catr, utihë la drai ne tro ni a iöhnyi hmaca me Timo.”
Celë hi aqane mekune ne la itre atr ka alanyim e cailo fen, itre ka mejiune kowe la Tusi Hmitrötr. Maine ame koi epun, tha ka nyipici kö la itre hna qaja hnei Tusi Hmitrötr, loi e tro epuni a isa thel la enyipicine la itre eamo me itre hna thingehnaean. Tro hë epuni a jelenyipicine laka, Tusi Hmitrötre hi la nyipi ixatua kowe la itre ka akötr.
ITRE XA ITHUEMACANYI GÖNE LA MELEHMACA
Wange ju la itre video ngöne la site së, jw.org
Hnei Tusi Hmitrötr hna thingehnaeane ka hape, tro sa iöhnyi hmaca memine la itre sinee së ka mec
NEMENE LA PENGÖNE LA ITRE KA MEC?
Nemene la pengö së la easa mec? Kola akeukawane la itre hni së hnene la hna qaja hnei Tusi Hmitrötr
Tro jë kowe la hna hape ITRE ITUS > ITRE VIDEO (Video Ngöne La Götran: Tusi Hmitrötr > Itre Ini Ne La Tusi Hmitrötr)
EPUNI KÖ A AJA ITRE MACA KA LOLO?
Itre maca ka ngazo a hlemu, matre ekaa la hnë tro sa öhnyi maca ka loi? Tro la video celë a qejepengöne la boroshür, Itre Maca Ka Lolo Qaathei Akötresie!
Tro jë kowe la hna hape ITRE ITUS > ITRE VIDEO (Video Ngöne La Götran: Itre Icasikeu me Cainöj >Thatraqane La Huliwa Ne Cainöj)
^ par. 7 Iehova la ëje i Akötresie, tune la aqane amamane e hnine la Tusi Hmitrötr.