Aqane Imelekeu Së: Fami Me Sinee
Alanyimu la itre atr ka mekun ka hape, jole catr troa imelekeu hnyawa memine la fami, me itre sinee. Hanawange la itre trepene meköt ne la Tusi Hmitrötr ka troa xatua së matre troa tro loi la aqane imelekeu së me itre xan.
THE MEKU EPUNI KÖ
TREPENE MEKÖT: “The thele ewekë thatraqai nyipunieti hmekuj, ngo thele jë fe la ka loi koi itre xan.”—Filipi 2:4.
ENYIPIEWEKËN: Tro sa imelekeu hnyawa memine la itre atr, e tro sa thele troa xatua angatr. Ngo, tha easë kö a thele matre tro hi angatr a xatua së. Maine tro epuni a sipu meku epuni kö, troa thë la aqane imelekeu i epun me itre xan. Maine tro la ketre ka faipoipo a meku angeice kö, me itre sipu aja i angeic, tro hë angeic elanyi a nyixetë. Ketre, tha easë kö a pi nyisineene la itre ka selëne la hna hetrenyi me kuca. Önine la ketre itus (The Road to Character), “ame la itre atr ka meku angatre kö, nge ka wangacone la itre xan, tro angatre lai a ixelë me itre jol ka tru.”
NYINE TROA KUCA:
-
Troa ixatua. Ame la itre nyipi sinee, angatr a ce mel me itö ixatua. Kola mama jëne la itre hna ithel ka hape, ame la itre atr ka ixatua, tha itre ka meci fë mekune kö (dépression), nge ka lolo la aqane sipu waipengöi angatr.
-
Troa utipi itre xan. Ame la easa utipi ketre, kösë easa dreng la akötre i angeic e kuhu hni së. Maine epuni a utipi ketre, tha tro kö epuni a qaja la itre trengewekë ka akötr, tune la itre xaa aqane iqenehnyima.
Maine ka hetre utipin epun, epuni a kapa la nöjei pengöne atr. Celë hi matre, tha epuni kö a iwangatrehmekunyi atr. Ngo epuni pe a nyi sineene la itre atr ka traqa qa ngöne la itre xaa nöj.
-
Troa thele ijin troa ce me itre xan. Maine tro epuni a thele ijine troa ce lapa memine la itre xan, tro epuni a atrepengöi angatre hnyawa. Nge, e aja i epun troa hetre nyipi sinee, nyipiewekë tro epuni a porotrikëne la itre ewekë hnei angatr hna pi ithanatan. Haawe, nyipiewekë troa drenge hnyawa. Amamane jë laka, ka tru koi epun la aliene hni angatr. Önine la ketre rapor, “E tro la itre atr a hetre nyipi porotrik, tro angatr a madrin.”
IËNE HNYAWANE JU LA ITRE SINEE I EPUN
TREPENE MEKÖT: “The amenu nyipunieti kö, itre sinatro ka ngazo a angazone la itre thiina ka loi.”—1 Korinito 15:33.
ENYIPIEWEKËN: Ame la itre atr hnei epuni hna ce tro memin, tro angatr a huli epun troa kuca la itre huliwa ka loi maine ka ngazo. Önine la itre sociologues (itre ka ithel göne la aqane ujë ne la atr) ka hape, ka hetre thangane la aqane ujë i angatr kowe la mele i epun. Önine hmaca la itre sociologues, maine tro sa majemine ce tro memine la itre ka ufi sixa maine ka seihnacil, tro fe së elanyi a tui angatr.
NYINE TROA KUCA: Nyi sineene jë la itre atr ka hetre thiina ka loi, maine itre trepene mel hnei epuni hna ajan. Thele jë la itre atr ka menyik, me ka metrötr, me ka ham, me ka ikep.
ITRE XAA TREPENE MEKÖT
Goeëne jë la itre video ka qeje Tusi Hmitrötr, nge ka troa xatuane la itre trefën, me itre thöth, me itre nekönatr matre troa lolo la mele ne la fami
THE ITHANATA AKÖKÖTRENYI KÖ.
‘Hetre trengewekë kösë hna thine hnei taua.’—ITE EDOMË 12:18.
TROA HAM.
“Troa atena mone la ate ihaban [maine, ka ham].”—ITE EDOMË 11:25.
KUCA JË KOI ITRE XAN LA HNEI EPUN HNA AJAN TROA KUCA KOI EPUN.
“Ame asë hi la nöjei ewekë hnei nyipunieti hna ajane tro la itre atr a kuca koi nyipunie, ketre kuca tune jë fe koi angatr.”—MATAIO 7:12.
