Aqane Troa Huliwane La Manie
Alanyimu la itre atr ka trongëne la itre trepene meköt, matre pëkö gufa ka tru i angatr.
TROA ATREINE WAIEWEKË
TREPENE MEKÖT: “Ame la ite mekune ne la ate cate huliwa, te, kola atena mon ; nge ite mekune ne la ate sasaqe kola apë ewekën.”—Ite Edomë 21:5.
ENYIPIEWEKËN: Nyipiewekë tro epuni a axeciëne la etrune la manie hnei epuni hna troa huliwan, me metrötrëne la hna axeciën. Pane mekune hnyawa jë qëmekene troa itö. The thëthëhmine kö laka, tha ijiji epuni kö troa itöne asë la itre aja i epun. Nyipiewekë troa atreine huliwane hnyawane la manie.
NYINE TROA KUCA:
-
Troa eköth la ketre budget. Cinyianyine jë la itre ewekë nyine tro epuni a nyithupen, tune la xen, me iheetr, maine uma. Thupene lai, cinyihane jë la etrune la manie hnei epuni hna mekun troa huliwane ngöne la itre götrane cili. Maine hna sasaith la etrune la manie hna amë ngöne la ketre götran, haawe, xome jë la manie ngöne la ketre götran. Maine ase hë epuni huliwan asë la manie göi troa xomi saas, haawe, xome jë la manie hnei epuni hna amë göi troa xeni restaurant.
-
The aluzi manie kö. Maine ijij, the xomi gufa kö. Thele jë pe troa ami manie. Maine ka trene carte bancaire epun, isine jë troa nyithupene la itre hnei epuni hna itön, matre tha tro kö epuni a nyithupei intérêts. Maine hetre gufa i epun, ngo tha ijiji epuni pala kö troa të la itre gufa cili, ami manie jë e nöjei treu göne lai, nge metrötrëne ju.
Önine la ketre rapor, ame la itre atr ka itö jëne carte de crédit, angatr a sasaithi tulu ngöne la angatr a itö. Haawe, maine epuni la ketre ka trene carte de crédit, thupëne hnyawa ju la aqane huliwan.
THUPËNE KÖ LA ITRE THIINA KA NGAZO
TREPENE MEKÖT: “Ame la ate witi [ka geny], te, tha hane kö uja dro ngöne la hnaihedö ; nge ngöne la ijine menue tro nyën’ a thel, ngo pëkö.”—Ite Edomë 20:4.
ENYIPIEWEKËN: Ame la atr ka geny, tro angeic a pë ewekë. Celë hi matre, catre jë huliwa, nge huliwane hnyawane ju la manie i epun. Tro kö epuni elanyi a hetrenyi la hnei epuni hna ajan.
NYINE TROA KUCA:
-
Catre jë huliwa. Maine tro epuni a huliwa hnyawa koi maseta, tro angatr a hnimi epun, me thele matre tro pala hi epuni a huliwa koi angatr.
-
The huliwa qene atrekënö kö. The atrekënö kö la maseta. Maine tro epuni a huliwa qene atrekënö, tro hë lai a atre hnei itre atr, nge tro ha jole koi epun troa öhnyi huliwa.
-
The hni kö koi manie. Maine tro epuni a thele manie atruny, tro lai a hetre ethan kowe la ngönetrei epun, me aqane imelekeu epun me itre atr. The thëthëhmine kö laka, hetre ewekë ka sisitria catre kö hune la manie.
ITRE XAA TREPENE MEKÖT
Ijiji epun troa e Tusi Hmitrötr ngöne la itre hadredre lao qene hlapa jëne jw.org
THE ALUZI TRAEME KÖ ME MANIE NGÖNE LA ITRE HNA MAJEMINE KA NGAZO.
“Troa pë ewekë la ate xömai waina me ulumi öni [maine, ka xeni atruny] ; nge tro la ate ka modrapa [maine, ka pinyi mek] a xetëne la ixete ka zezeny.”—ITE EDOMË 23:21.
THE HNEHENGAZO KÖ GÖI MANIE.
“Ea loi ju hë hna hnehengazone la mele i nyipunie, göi nyine xen, me nyine ij, me hnehengazone la ngönetrei nyipunie, me nyine tro nyipunieti a heetrën.”—MATAIO 6:25.
THE PIINE KÖ LA IFEKË EWEKËN.
“Ame la ate ngazo inemeke, te, kola nyenyape kowe la mo ; ngo tha ’te kö nyëne laka troa traqa koi nyëne la pë ewekë.”—ITE EDOMË 28:22.
