TREPENE MEKÖT: “Loi la ate hmite troa elëhni hune la ate cat.”—Ite Edomë 16:32.

ENYIPIEWEKËN: Hetre thangane la troa atreine xomehnöth la itre aliene hni së. Ame itre xaa ijin, hetre nyipi kepin matre easa elëhni, ngo e tha xomihni kö së, troa hetre ethan. Önine la itre ka ithel ka hape, ame la kola elëhni hnene la atr, miti hë koilo, nge angeic a qaja maine kuca la itre ewekë hnei angeic hna troa hace fë e thupen.

NYINE TROA KUCA: Inine jë troa xomehnöthe la elëhni, wanga tro epuni a huliwa menu. Alanyimu la itre atr ka mekun ka hape, hni ne trahmanyi la atr ka elëhni, ngo tha eje kö. Kolo pe a amamane ka hape, ka puj angeic. Öni Tusi Hmitrötr, “Lapa hna kenithe nge pëkö thithë la ate ka tha xome hnöthe la hni angeice kö.” (Ite Edomë 25:28) Ame la ketre aqane troa xomehnöthe la elëhni, tre, ene la troa pane atre la ka traqa, qëmekene troa qaja maine kuca la ketre ewekë. “Ame la inamacane ne la ate, te, ate ahmitene la elëhni angeic.” (Ite Edomë 19:11) Nyipiewekë troa pane drenge la hna qaja hnene la lue götran, matre tro sa trotrohnin, nge e thupene tro ha lapa hnyawa la mekuna së.

TREPENE MEKÖT: “Amamane jë la hni ne ole i nyipunie.”—Kolose 3:15.

ENYIPIEWEKËN: Alanyimu la itre ka qaja ka hape, ka madrine la itre ka hetre hni ne ole. Kola jelenyipicine lai hnene la itre ka meci sineen, me itre atr ka apatrene la ketre ewekë ka tru thupen. Ame la ka xatua angatr troa xomihnine la akötr, tre, ene la troa madrine la hna hetreny, hune la troa mekun la ewekë ka patr.

 NYINE TROA KUCA: Ame e nöjei drai, cinyianyine ju la itre ewekë hnei epun hna madrin, nge nyine troa olen. Tha tro hmekuje kö a sija la itre ewekë ka tru. Pane lapa mekune ju fe la itre ewekë ka co. Epuni goeëne la emingömingöne la kola lö la jö, maine madrine troa porotrik memine la ketre sinee, maine pena madrine troa mel. Tro la itre ewekë cili a thue madrine koi epun, e tro epuni a xomi ijin troa mekun itre ej, me olen.

Tru catre la thangane hnei epun hna troa kapa, e tro epuni a pane mekun la kepine matre hetre hni ne ole i epun kowe la fami me itre sinee i epun. Maine hetre hnei epuni hna öhne thene la ketre atr, olene jë. Qaja mekötine jë koi angeic, maine jëne itus, maine mail, maine sms. Tro lai a acatrene la aqane imelekeu i epon, me amadrinë epun, ke, hetre hnei epuni hna hamëne koi ketre.—Itre Huliwa 20:35.

KÖTRENE PI LA IWESITRË.

“Ame la qāne la iwatratra, te, kola si jëne la tim ; hawe, tijepi la ikelikelë e tha kaca pete kö.”​—ITE EDOMË 17:14.

THE HNEHENGAZONE KÖ LA DRAI ELANY.

“The hnehengazone kö la drai elany, ke, qa i elanyi kö la drai elany. Eje hi, hetre itre sipu ejolene kö la drai.”​—MATAIO 6:34.

MEKUNE HNYAWA JU QËMEKENE TROA KUCA LA KETRE EWEKË.

“Troa thupë eö hnene la mekun, troa wai ’ö hnene la trotrohnin.”​—ITE EDOMË 2:11.