HAPEU, KA MADRINE KÖ NYIPUNIE? Maine eje hi, nemene la ka hamë madrine koi nyipunie? Hapeu, hnepe lapa, huliwa maine hmi? Maine jë nyipunieti a trengeneune la ketre ewekë ka troa hamë madrin koi nyipunie, tune la troa fenesi qa hna ini, maine öhnyi huliwa pena, maine pena nyipunieti a troa itö loto ka hnyipixe.

Ame itre xan, angatr a madrine la kola eatr la mekuna i angatr, me aejëne la aja i angatr. Ngo hapeue la madrine cili, ka cile huti kö? Ame itre xa ijin, tëtë hi la madrin, matre easa kucakuca.

Ame la madrin, tre, kola qaja la troa mele ka loi. Kolo fe a qaja la aliene hni së laka, kola kökötre trootro uti hë la elitrauj. Nge tha ajane kö së troa paatre the së la madrine cili.

Celë hi matre, ame la easa madrin tre, tha kolo kö a hape, eje hë lai, ngo canga tro hi a paatre la madrine cili. Ketre, ame la easa qaja ka hape, “Tro pë hë ni a madrin e . . .,” tre, kösë easë hi lai a trengeneune la madrine ka troa traqa.

Ceitune hi la easa madrin memine la easa egöcatr. Nemene la nyine tro sa kuca matre troa egöcatr? Easa thupëne la aqane tro sa xen, nge tro fe sa enij, me kuca la itre xa ewekë nyine loi thatraqane la mele së. Ketre tune mina fe, e tro sa thupëne hnyawa la mele së, me mele thenge la itre trepene meköti ka lolo ke, tro hë sa madrin.

Nemene la itre trepene meköt me itre thiina ka loi ka troa thue madrine së? Hetre itre xan ka nyipiewekë. Ngo ame la itre hne së hna troa ce wang, tre, celë hi jëne madrin me mele ka loi:

• MEJIHNIN ME HAM

• EGÖCATR ME XOMIHNI

• IHNIM

• QEJE MENU

• MEKUN NYINE TROA EATRËN

• MEJIUN

Öni Tusi Hmitrötr: “Manathithi ange ka pë ethane ngöne la gojeny.” (Salamo 119:1) Tro sa ce wang la itre mekune me itre thiina ka loi cili.