KA SISITRIA LA IHNIM. Maine pëkö ihnim, thatreine kö troa lolo me cile huti la faipoipo. Ketre tune fe la aqane imelekeu së me itre xan. Celë hi kepine matre, maine easa ajane troa lolo me madrin la mele së, ka nyipiewekë catre la ihnim. Nemene “ihnim”?

Nyipici laka, ka nyipiewekë la ihnim thene la lue trefën. Ngo ame pe, tha kolo kö a qaja la ihnimi cili. Ka sisitria catre kö la ihnim hna qaja e celë. Kolo ihnim ka pë thoi ngön, ka upi së troa xatuane la itre xan me amë panëne la itre aja i angatr, nge pine pë hë la itre sipu aja së. Ame la ihnim cili, ka xulu qa ngöne la itre trepene meköti Akötresie. Ka keukawa hnin la ihnimi cili, nge ka qa kuhu hni.

Hanawang la aqane qejepengöne hnene la Tusi Hmitrötr la ihnim. Kola hape, “Ihnimi la ate xome ahoeane me ka menyik; tha ate ikucanyi kö la ihnim; tha ate selëne kö la ihnim, nge tha ate pi tru kö, tha thina ka qali kö, tha ate thele ewekë i nyëne kö, tha ate canga elëhni kö, tha ate meku ngazo kö; tha ate madine kö la thina ka tha meköti, ngo ate madine la nyipici; ate juetëne la nöjei ewekë asë, ate kapa la nöjei ewekë asë, ate mejiune la nöjei ewekë asë, ate xomi hnine la nöjei ewekë asë. Tha tro kö a ase la ihnim.”—1 Korinito 13:4-8.

“Tha tro kö a ase” la ihnimi cili ke, ka cile hut. Kola tro la itre macatre, nge ej a kökötre trootro. Ej a upi së troa xomihni ahoean me thiina ka menyik. Kolo fe a sewe së troa itëkeun. Ka lolo catr la ihnimi cili ke, “otene ka nyipi loi.” (Kolose 3:14) Ngacama itre atr ka tha pexeje kö së, ngo loi e tro sa eköthe  la aqane imelekeu së hune la ihnimi cili. Tro ha lolo me madrine la mele së. Tro sa ce wang la aqane troa melëne la ihnimi cili e hnine la faipoipo.

Hnei Iesu hna hamëne la itre trepene meköti ka lolo thatraqane la faipoipo. Öni nyidrë: “Tro la trahmanyi a nue la keme me thine i angeic, me fede kowe la fö’ i angeic; nge tro nyidoti a ca ngönetei . . . Qa ngöne lai, ame la hnei Akötesie hna isilekeun, the tro kö a shenge hnei ate.” (Mataio 19:5, 6) Lue mekune ka tru ka mama ngöne la trepene meköti celë.

“TRO NYIDOTI A CA NGÖNETEI.” Ka catrehnine catr la ihnimi ne la lue trefën, e hnine la faipoipo. Celë hi ihnimi lai ka troa sewe nyidroti troa nyixetë. Ngo maine “ca ngönetei” pena ha me ketre, kolo hi lai a nyixetë. (1 Korinito 6:16; Heberu 13:4) Maine tro ketre e nyidroti a nyixetë, haawe tro hë lai a thë la aqane imelekeu i nyidro, nge pëhë mejiune i ketre koi ketre. Ngo, ame la ka ngazo catr tre, troa hetre ethane kowe la itre nekönatr. Tro hë nyudreni lai a mekun ka hape, pëkö ka hnimi nyudren me thupë nyudren. Matre nyudreni a hleuhleu me akötr.

“HNEI AKÖTESIE HNA ISILEKEUN.” Akötresieti la ka acile la faipoipo. Celë hi matre, loi e troa hetre imetrötrekeu me ihnimikeu thene la lue trefën. Ketre, tha nyidroti kö a thele kepin matre troa sei hna cil maine isalapa, ngöne la kola traqa la itre jol. Hnene la ihnimi nyidro matre ka catr nge ka cile huti la faipoipo. Ihnimi lai ka “kapa la nöjei ewekë asë,” nge ka xatua nyidro troa atreine cile kowe la itre jol. Ketre, tro hë nyidroti a cas me tingeting e hnine la faipoipo.

Ketre ahnahna ka sisitria kowe la itre nekönatr, la nyudreni a öhne la aqane ihnimi ne la itre kem me thin. Öni Jessica, ketre thöthi ka 20 lao macatre: “Ka ihnimi catre Kaka me Nenë, nge ka imetrötrekeu nyidro. Ame la eni a öhne la aqane metrötrë Kaka hnei Nenë, eni fe a hane pi tui eahlo.”

Ihnim la pane thiina i Akötresie. Öni Tusi Hmitrötr: “Akötesieti la ihnim.” (1 Ioane 4:8) Celë hi matre, tha sesëkötre kö së la kola qeje Iehova ka hape, “Akötesie tene manathith.” (1 Timoteo 1:11) Ketre, maine tro sa nyitipune la Atre Xupi së ka ihnim, me xome la itre xa thiina i Nyidrë, haawe tro hë sa madrin. Kola qaja ngöne Efeso 5:1, 2: “Nyi tupu Akötesieti jë nyipunie, tune la ite nekö hnimina, me tro pala hi ngöne la ihnim.”