AME LA KOLA QEJE MADRIN ME HLEMU LOI, HAPEU EASA MEKU MANIE ME MO? Kola mama lai thene la itre atr ka nyimutre, ka huliwa mec matre troa tru hnei manie hna kapa. Ngo hapeu, manie me mo la ka troa hamë madrin ka cile hut? Nyipici kö lai?

Kola qaja hnene la ketre zonal ka hape, tru ju hë hnei manie së, ngo tha celë kö la ka troa hamë madrin me mele ka loi koi së. Eje hi lai laka, pëkö engazone la troa hetre manie. Ngo ame pe, kola qaja ngöne la ketre zonal ka hape, maine “tro sa huliwa mec troa thele manie, tre, hleuhleu la pune koi së.” Hna anyipicine lai hnene la hna qaja hnei Tusi Hmitrötr ekö, lo kola hape: “Ame la aja manie, celë hi ine la nöjei ngazo asëjëihë; Lo hnei ite xane hna meciun . . . me umajo angate hnei angate kö hnene la ite aköte ka kösau.” (1 Timoteo 6:9, 10) Nemene la itre akötre cili?

HNA HNEHENGAZONE LA MANIE MATRE THA MEKÖLE HNYAWA HA. “Loi la meköle kowe la ate huliwa maine co maine tru la hnei angeice hna xen; ngo qa ngöne la tenge nyi ne la ate tene ewekë tha ’teine kö angeice troa meköl.”—Ate Cainöj 5:12.

HLEUHLEU KE THA TRAQA KÖ KOWE LA HNA MEKUN. Kola hleuhleu pine laka, hna aja manie, ngo thatreine pe troa aejëne la aja cili ke, tha meji kö. “Ame la ate aja sileva, te, tha meji kö hnei sileva, nge ame la ate aja mo, te tha meji kö hnei ite ewekë ka nyimute.” (Ate Cainöj 5:10) Ame la atr ka hni koi manie ke, co pë hë koi angeic la itre ewekë ka troa hetre thangane kowe la mele i angeic, nge ka troa hamë madrin koi angeic. Tune la troa pane nue la traeme i angeic kowe la hnepe lapa me kowe la itre sinee, maine pena göi troa huliwa i Akötresie.

KUCAKUCA ME AKÖTR NGÖNE LA KOLA JOLE GÖI MANIE. “The huliwa troa tena mo; tijepi la trotrohnine i ’ö kö. Tro eö a goeë tiline la ka pa ’lien? ke tro ej’ a nyi lue iape ne ej, me sheshë hnengödrai ’ë tune la aeto.”—Ite Edomë 23:4, 5.

MEJIHNIN. “Tha hne shë kö hna xome kowe la fene la kete ewekë, nge tha’teine kö shë troa xome kete ewekë qa ngön; nge e hetenyi hë shë la xeni me ixete,  ea mejihnineju hë lai.” (1 Timoteo 6:7, 8) Tha itre ka eetre kö maine wepel la itre atr ka mejihnin la hna hetreny. Ketre, ame la kola mejihnin tre, kola xatua angatr matre tha tro kö angatr a piine la aqane mele itre xan. Nge tha hnehengazo menu kö angatr.

HAM. “Sisitia la manathithi e troa hame hune la troa kapa.” (Ite Huliwa 20:35) Ka madrin la itre atr ka ham pine laka, angatr a ajane troa amadrinë itre xan. Ame itre xa ijin, madrine catr angatr troa nue la traem me trengecatre i angatr, ngacama co hi. Ngo ame pe, atraqatr la thangane hnei angatr hna kapa hune la itre ka trene manie ke, thatreine kö la manie itöne la ihnim me metrötr, me itre sinee ka hane ham!—Luka 6:38.

WANGATRUNE LA ITRE ATR HUNE LA ITRE EWEKË. “Loi la edö tepe sili ce memine la ihnim, hune la bolok e koho hnuma ce me imethinë.” (Ite Edomë 15:17) Nemene la aliene la xötre celë? Kola hape, ka sisitria catre kö e loi la aqane imelekeu së me itre xan hune la itre mo. Nge tune la hne së hna troa ce wang, ihnim la sipu qaane la madrin.

Sabina la ketre föe ka mele ngöne la götrane ahuë ne Amerika. Hnei eahlo hna inine la itre trepene meköti qa hnine la Tusi Hmitrötr. Hna trotriji Sabina hnene la föi eahlo. Celë hi matre, eahlo pë hë a catre huliwa göi troa hetrenyi la itre ka nyipiewekë kowe la mele i eahlo, memine la lue neköi eahlo jajiny. Lue huliwa hnei eahlo hna xom, matre eahlo a canga ilë e sine hmakany e 4h. Ngacama tru catre hnei huliwa i Sabina, ngo ame pe hnei eahlo hna mekune troa inine la Tusi Hmitrötr. Nemene hë la thangane lai?

Ngacama co hi la manie hna kapa hnei Sabina, ngo ame pe saze hë la aqane goeën eahlo la mel! Hetrenyi la ketre manathithi ka tru hna kapa hnei Sabina, ene la troa nyihlue i Akötresie. (Mataio 5:3) Ketre, hetrenyi fe hë Sabina la itre nyipi sinee, thene la itre hlue i Akötresie. Atraqatre fe la madrine i Sabina troa ce thawa memine la itre xa atr, la itre hnei eahlo hna inin.

Öni Tusi Hmitrötr, “Hna qaja amekötine la inamacane hnene la nöjei huliwa ne ej.” (Mataio 11:19) Tune la hna qaja ngöne la xötr, loi e tro sa amë panëne la itre thiina celë, ene la mejihnin me ham, nge pine pë hë la itre mo. E cili, tro hë sa ketre atr ka meköt!