“KA NYIPIEWEKË CATR LA MEJIUN,  . . . GÖNE LA AQANE IMELEKEU SË ME AKÖTRESIE.” Celë hi hna qaja hnene la ketre itusi qene papale. Eje fe a qaja ka hape, “Mejiun la nyin la itre mekun ka akötr. Ketre ixatua fe ngöne la easa lapa cas me xou.”

Tusi Hmitrötr a amamane la enyipiewekëne troa mejiun. Kolo fe a hmekë së matre tha tro kö sa mejiune kowe la itre ewekë ka gufa kowe la mele së. Kola qaja ngöne Salamo 146:3 ka hape, “The qale kö nyipunie koi ite joxu, kowe la nekö i ate, lo ka pëkö iamele thei angat.” Haawe, tha tro pi kö sa mejiune koi atr, ngo loi pe tro sa inamacan me mejiune kowe la Atre Xupi së. Nyidrëti hmekuje hi la ka ijij troa eatrën asë la nöjei ewekë hnei Nyidrëti hna thingehnaean. Nemene la itre hnei Nyidrëti hna thingehnaean? Tro sa ce wang la itre xan.

PËHË IAKÖTRË, NGE TRO LA ANGE KA MEKÖT A HETRENYI LA TINGETING KA EPINE PALUA: Kola qaja ngöne Salamo 37:10, 11 ka hape: “Ke panacas, ame hna patepi la ate ka ngazo; . . . Nge tro la ange ka menyike a hetenyi la nöj, nge tro angat’ a madine la tingetinge atraqat.” Ketre, kola qaja ngöne xötre 29 ka hape, “Tro ha la ange ka meköti a . . . lapa palua kö” e celë fen.

PËHË ISI: “Iehova . . . a nyi pune la ite ishi uti hë la cane la fene hnengödrai; tro nyidëti a hutra la tane pehna, me axeciëne la jo, me deuthe tije la ite ikariota hnei eë.”—Salamo 46:8, 9.

PËHË TREIJ ME HACE ME MEC: “Thei nöjei ate la uma ne heta i Akötesie . . . tro nyidëti a köle tije la nöjei tenge timida asëjëihë qa ngöne la ite lue meke i angat; nge pa hmaca kö mec; me hace hni me teij, me aköt.”—Hna Amamane 21:3, 4.

TROA MANA LA XEN: “Loi e eje la qite ka nyimute ngöne la nöj, hune la hene la ite wet.”—Salamo 72:16.

MEKÖT LA AQANE MUSI NE LA BASELAIA I KERISO E CAILO FEN: “Hna hamë [Iesu Keriso] la mus, me lolo, me baselaia, mate tro nöjei ate, me ite nöj, me isa qene hlapa asë a nyi hlue i anganyidë; musi ka cile huti la musi anganyidë, nge tha tro kö a pate; nge tha tro kö a ase la baselaia i anganyidë.”—Daniela 7:14.

Pine nemene matre ijije hi tro sa mejiune kowe la itre hna thingehnaeane celë? Ame lo Iesu e celë fen, hnei nyidrëti hna amamane laka, nyidrëti hi la Joxu hna acil. Hnei nyidrëti hna aloine la itre mec, me xatuane la itre puafala, me amelene la itre ka mec. Ngo ka sisitria catre kö la itre ini hnei nyidrëti hna hamën. Hnei nyidrëti hna hamëne la itre trepene meköti ka aijijëne la itre atr troa ce mel me ihnim me cas, epin epine palua. Ketre, hnei Iesu fe hna perofetan la itre ewekë ka troa traqa elany, tune la itre ewekë ka troa nyihatrene la itre drai ne la pune la fen celë.

Hnei Iesu hna perofetan ka hape, ame ngöne la itre drai hnapin, troa ngazo catre la fen me paatre la tingeting! Celë hi itre ewekë lai ka nyihatrene la itre drai ne “la pune la fene hnengödrai.” Ketre tune fe la itre ewekë ka traqa e cailo fen, tune la itre isi, me jiin, me itre sine mec me itre sa ka tru. (Mataio 24:3, 7; Luka 21:10, 11; Hna Amamane 6:3-8) Öni Iesu mina fe: “Tro ha nanazije la ihnimi ne la ka ala nyimu ngöne laka troa mana la ngazo.”—Mataio 24:12.

Kola mama hnyawa lai thene la itre atr enehila. Celë fe hna qaja hnene la ketre atre cinyihane la Tusi Hmitrötr. Kola qaja ngöne 2 Timoteo 3:1-5 ka hape, ame ngöne la “ite drai hnapin,” tro la itre atr a hnimi angatre kö, me meciu mani, me ajane la itre nyine iamadrinë. Tro fe angatr a pi mama me calogitr. Nge pëhë ihnim e hnine la hnepe lapa. Tha drei kem me thine hë la itre nekönatr. Nge tha sihngödri hmaca kö la aqane mele thoi ne la hmi.

Kola mama hnyawa jëne la itre ewekë cili ka ngazo laka, traqa ha la itre drai hnapin. Ketre, itre eje fe a anyipicine laka, easenyi hë matre tingetinge pi la mele ne la atr, fene la musi ne la Baselaia. Celë hi lai hna qaja hnei Iesu, ngöne lo nyidrëti a perofetan göne la itre drai hnapin ka hape, “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj; ame hna traqa pi la pun.”—Mataio 24:14.

Ame la maca ka lolo celë tre, kola hmekëne la itre atr ka ngazo, me hamë mejiune kowe la itre atr ka thiina ka meköt. Ketre, eje fe a akeukawanyi së laka, easenyi hë matre kapa jë së la itre manathith hna thingehnaean. Hapeu, aja i nyipunieti kö troa atre la itre xa manathithi cili? Maine eje hi, tro jë kowe la götrane tixenuë ne la zonal celë.