Hna hnaho ni e Québec e Canada, ngöne la ketre götrane ka qene Wiwi. Louis la ëje i kaka, nge Zélia la ëje i nenë. Hnei nyidroti hna hetru ni ngöne la ihnim. Ame kaka ke, tha ka lapa ithanata kö nyidrë, ngo ka catre e tusi nyidrë. Ajane catre ni troa cinyiany, ke eni ekö a ajane troa journaliste.

Ame lo kola 12 lao macatreng, hnei Rodolphe Soucy, ketre sine huliwa i kaka, me sine tronge i nyidrë hna traqa kowe la hnalapa. Lue Temoë Iehova nyidro. Thatre kö ni la hmi ne la itre Temoë, nge ketre pëkö ajang troa hane atre la hmi angatr. Ngo, hnenge hna haine la aqane sa angatre la itre hnyinge hun, jëne la Tusi Hmitrötr. Ketre tui kaka me nenë, matre hnei huni hna nyiqane ini Tusi Hmitrötr.

Ame ngöne lo ijine cili, eni a ini ngöne la ketre uma ne ini katolik. Ame itre xaa ijin, eni a qaja kowe la itre sine ining, la hnenge hna inin e hnine la Tusi Hmitrötr. Hnene la itre porofesör ka drikona hna drenge la itre porotrike hun. Tha hnei angatre kö hna xome la Tusi Hmitrötr matre troa jelethoine la hnenge hna qaja. Ame la ketre, hnei nyidrëti hna upezö ni qëmekene la kalas ka hape, eni a icilekeu! Eje hi laka, hnenge hna xou, ngo hetre thangane ka lolo hnenge hna kapa. Celë hi ka xatua ni troa öhn laka, ka isazikeu la itre ini hna hamëne ngöne la itre uma ne ini ka kuci hmi memine la Tusi Hmitrötr. Mama ha koi ni laka, tha tro hmaca kö ni a tro kowe la uma ne ini cili. Hnenge hna pane sipo kaka me nenë, qëmekene troa saze uma ne ini.

Hnenge hna catre ini Tusi Hmitrötr, ngo tha canga kökötre kö ni ke, eni palahi a xou troa  cainöj ngöne la itre hnalapa trootro. Tru catre la mene ne la hmi Katolik nge xele catre angatr ma wang la huliwa ne cainöj. Ame lo atre musi e Québec, tre, Maurice Duplessis, nge ka hmi catre nyidrë. Hnei nyidrëti hna nue la itre atr troa akötrëne me axösisine la itre Temoë. Nyipiewekë tro la itre trejin a hetre trengecatr troa cainöje trootro.

John Rae la ketre trejin ka xatua ni troa xomihnine la itre hnenge hna xouen. Hnei nyidrëti hna hane sine lo naene lao kalas ne la Ini Ne Gileada. Ka macaje catre John, nge ka menyike thiina nyidrë, me hetre hni ne ipië. Hnei nyidrëti palahi hna hamë eamo koi ni. Ngo tru catre kö la itre ini hnenge hna kapa qa ngöne la tulu i nyidrë. Jole catre koi John troa qene Wiwi. Celë hi matre, ame itre xaa ijin, nyio a ce cainöj nge eni a xatua nyidrë troa qene Wiwi. Celë hi ka xatua ni troa mekune troa hane xomi bapataiso. Treen lao macatre thupene lo pane ini tusing, hnenge hna xomi bapataiso lo 26 Mei 1951.

Alanyimu catr la itre pionie ngöne la ekalesia huni e Québec. Hnene la itre tulu i angatr, matre eni ha ajane troa hane pionie. Ame ngöne lo ijine cili, eahuni a cainöj ngöne la itre hnalapa trootro jëne hi la Tusi Hmitrötr, ngo pëkö itus. Celë hi matre, nyipiewekë troa huliwane hnyawa la Tusi Hmitrötr. E cili, hnenge hna thele troa hnehene la itre xötr ka troa xatua ni troa cilëgöline la nyipici. Ngo alanyimu la itre atr ka xele ma e Tusi Hmitrötr ke, tha hna kuca kö hnene la hmi Katolik.

Ame lo 1952, hnenge hna faipoipo me Simone Patry, ketre trejine föe ka mele nyipici. Hnei nyio hna fek a tro Montréal, nge ame ngöne la macatre cili, hnei nyio hna hnaho Lise, nekö i nyio jajiny. Qëmekene tro nyio a faipoipo, hnenge hna pane nue la huliwa ne pionie. Ngo hnenge palahi me Simone hna thel troa ahmaloeëne la mele i nyio, matre catre huliwa me ixatua ngöne la ekalesia.

Thupene la treen lao macatre, hnenge hmaca hna mekun troa xom la huliwa ne pionie. Ame lo 1962, hnenge hna sine lo ini thatraqane la itre qatre thup ngöne la Bethela ne Canada. Hnenge hna ce hnahag me Camille Ouellette, ketre trejin trahmany. Eni a haine la aqane catre cainöje i Camille ke, ka faipoipo nyidrë nge ca neköi nyidrë. Ame ngöne la ijine cili e Québec, ala xalaithe hi la itre kem maine itre thin ka xome la huliwa ne pionie me hetrune la itre  nekö i angatr; ngo celë hi la hnei Camille hna ajane troa kuca. Ame ngöne lo ijine ce nyio, hnei nyidrëti hna ithuecatre koi ni troa mekun la meleng. Itre treu thupen, eni ha öhne laka, ijijinge hi troa xome hmaca la huliwa ne pionie. Ame koi itre xan, tha aqane ujë ne ka inamacane kö lai. Ngo hnenge hna mejiune laka, tro kö Iehova a amanathithine la itre trengecatreng.

Ame lo 1964, hna sipo ni me Simone troa xome la huliwa ne pionie hut e Québec, ngöne la traone nyio. Nyimutre la itre macatre ne nyio a lapa e cili. Ame ngöne lo ijine cili, hmaloi hë troa cainöje trootro, ngo hetre itre xan palahi ka icilekeu me easë.

Ame lo ketre hnaipajö ne Mecixen, hna othi ni hnei polis e Sainte-Marie, ketre neköi traon ezin e Québec. Hna tro sai ni koi polis me akalabusi ni ke, hnenge hna cainöj ngöne la itre hnalapa trootro ngo tha hna pane sipone kö. Thupene lai, hna utisai ni qëmeke i Baillargeon, ketre atre amekötin hna xouen. Hnei nyidrëti hna hnyingëne la ka troa cilëgöli ni ngöne la hnakootr. Ame la eni a qeje Glen How, * ketre avocat hna atre hnyawa nge ka hlemu, öni nyidrë: “Ohea! The qeje angeice kö lai!” Alanyimu la itre ka atre laka, atreine catre Glen How troa cilëgöline la itre Temoë. Tha hmitre ju kö nge kola hë hnene la hnakootr me qaja ka hape, ase hë të la gufang.

Hnene laka, tru catre hnei ka icilekeu me easë e Québec, matre jole troa öhnyi hnë icasikeu. Hnene la neköi ekalesia hun hna öhne la ketre garage ngo gaa hnötre catre pe. Ame ngöne la itre ijine hnötre catr, hnei itre trejin hna xome la itre ka idreuth hna ami oelen. Ame itre xaa ijin, eahuni a lapa xötreithe la gaa idreuth me ithuecatrekeu qëmekene la icasikeu.

Ketre manathith ka tru troa öhne la aqane kökötre la huliwa ne cainöj. Ame ngöne lo itre macatre 1960, ala xalaithe hi la itre neköi ekalesia e Québec, e Côte-Nord, me e Gaspésie. Ame hë enehila, ase hë sasaithe la lue sirkoskripsio ngöne la itre götrane cili, nge itre trejin a icasikeu ngöne la itre Uma Ne Baselaia ka mingöming.

Ame lo 1970, hna hë ni me Simone troa xome la huliwa ne thupëne la sirkoskripsio. Thupene lai, ngöne lo 1973, hna upi nyio troa thupëne la distrik. Ame ngöne la itre macatre cili, hna xatua ni catr hnene la itre trejin ka macaj, tui Laurier Saumur * me David Splane, * lue ka xom la huliwa ne iwai trootro. Thupene la nöjei asabele, eni me David a isa qaja la aqane tro nyio a cainöj. Mekune palahi ni lo David a qaja koi ni ka hape: “Léonce, lolo catr la cainöje tixenuë i nyipë. Ka lolo catr, ngo maine ju, troa thawa nyimutren la cainöj!” Tru catre palaha  la itre ithuemacany hnenge hna qaja ngöne la itre cainöjeng. Loi e tro ni a inine troa hamëne hi la itre ithuemacany ka nyipiewekë.

Hnëqa ne la itre ka thupëne la distrik, troa hamë ithuecatre kowe la itre atre thupëne la sirkoskripsio. Ngo, alanyimu la itre trejin e Québec ka atre ni hnyawa. Ame itre xaa ijin, angatr a ajane troa ce huliwa me eni ngöne la eni a iwai trootro. Eje hi laka, madrine catre ni troa ce cainöj me angatr, ngo pëhë ijine tro ni a ce tro memine la atre thupëne la sirkoskripsio. Ame la ketre ijin, önine la ketre atre thupë sirkoskripsio: “Ka lolo catr ke, nyipëti a xomi ijine troa ce tro memine la itre trejin, ngo the thëthëhmine kö laka, thatraqai ni la wiike celë. Nyipiewekë fe troa ithuecatr koi ni!” Celë hi ka xatua ni troa atreine tulu ewekë hnyawa.

Ngo ame lo 1976, hetre ewekë ka traqa. Hna tithi Simone hnene la ketre mec ka ngazo catr, matre meci pi angeic. Ka lolo catre la föeng ke, hnei angeic palahi hna catre huliwa i Akötresie, nge tru catre la ihnimi angeic koi Iehova. Hace catre ni ngöne la kola meci hnei Simone. Ngo ame la ka xatua ni, tre, hnenge hna catre cainöj. Eni a olene koi Iehova la ixatua i Nyidrëti ngöne la ijine akötr. Thupene lai, hnenge hna faipoipo me Carolyn Elliott, ketre pionie ka qene Papale nge ka fek a tro Québec troa ixatua. Ka thiina ka menyik Carolyn nge angeic a wangatrune la itre atr, tune la itre ka lapa pe hi me itre ka lapa caas. Hnei angeic hna xatua ni ngöne la huliwa ne iwai trootro.

Ame lo Januare 1978, hna sipo ni troa elemekene la pane Ini Koi Itre Pionie e Québec. Xoung catr ke, tha ase fe kö ni hane sine la ini cili maine e pena la itus ka nyitrepene ej. Eloine pe, alanyimu la itre pionie ka macaj ngöne la kalas. Eje hi laka, eni la ka elemekene la ini, ngo tru catr la itre ini hnenge hna kapa qaathene la itre ka sine la ini cili!

Thupene lai, ngöne lo macatre 1978, hna kuca la Asabele Koi Nyimu Nöj hna hape, “La foi victorieuse” ngöne la Stade Olympique de Montréal. Celë hi lo pane asabele katru  hna hane kuca e Québec ke, traqa koi 80 000 la itre ka sine la asabele. Hna sipo ni troa huliwa ngöne la service ka ithanata memine la itre nuvel. Hnenge hna ithanata kowe la itre journaliste, nge madrine catre ni ke, hnei angatr hna qaja aloinyi së ngöne nuvel. Hna sasaithe la 20 lao hawa ne amamane ngöne tele me radio la eahuni a sa la itre hnynge i angatr. Nge traqa koi itre hadredre la itre tane mekun hnei angatr hna cinyihan. Alanyimu hë la itre ka atrepengö hun!

Hetre ketre ewekë ka saze ngöne lo macatre 1996. Qaane lo eni a xomi bapataiso, hnenge hna sine la ekalesia qene Wiwi e Québec. Thupene lai, hna upi ni kowe la ketre ekalesia ka qene Papale e Toronto. Ame koi ni, tha ijijinge kö troa xome la hnëqa cili ke, thatreine kö ni qene Papale. Hnenge hna catre thithi me fe la hning koi Iehova.

Ame ekö, xoue catre ni troa xome la huliwa ne iwai trootro. Ngo ame hë enehila, eni a madrine la lue macatre ne eni a huliwa e Toronto. Hnei Carolyn hna xomihni ahoean me xatua ni matre tha tro hmaca kö ni a xou troa qene Papale. Ketre tune fe la itre trejin, hnei angatr hna xatua ni me ithuecatre koi ni. Itre sinee hë hun.

Tru catre la huliwa hun matre troa hnëkëne la asabele. Ketre, hnenge fe hna nue la caa hawa e heji ne Draikatru, matre troa cainöj ngöne la itre hnalapa trootro. Öni itre xan: ‘Hnauëne la nyipëti a cainöj, nge tru catr la itre nyine troa kuca thatraqane la asabele?’ Ngo kola ithuecatre koi ni la eni a porotrik memine la itre atr ngöne la hna cainöj. Ame fe enehila, eni a madrine ngöne la eni a bëek qa hna cainöj.

Ame lo 1998, hna sipo ni me Carolyn troa pionie hut e Montréal. Itre macatre ne xome hë ni la huliwa cili. Ame la hnëqang, tre, troa eköthe la huliwa ne cainöj ngöne la gaa tru atr, me ce huliwa memine la itre nuvel, me jelethoine la itre trengathoi hna sil kowe la itre Temoë Iehova. Madrine catre ni me Carolyn troa cainöj kowe la itre trenyiwa ka fek a tro Canada, itre ka ajane troa inine la Tusi Hmitrötr.

Hnenge hna catre huliwa koi Iehova, laka, 68 hë lao macatre enehila, nge thatreine kö ni qaja la madrineng. Ketre manathith ka tru la troa cainöj me xatuane la itre atr troa atre la nyipici. Hnei Lise me föi angeic hna hetrune la 4 lao nekö i nyidro. Thupene lai, hnei nyidroti hna xom la huliwa ne pionie lapa. Kola ketr la hning la eni a öhn laka, angeic a catre cainöj. Eni a olene kowe la itre trejin ke, jëne la itre tulu me itre eamo ka lolo i angatr, hnei angatr hna xatua ni troa acatrene la aqane imelekeung me Iehova, me catre huliwa i Nyidrë. Öhne hë ni laka, maine easa ajane troa xome hnyawa la hnëqa së ngöne la organizasio i Iehova me mele nyipici, loi e tro sa sipone la uati hmitrötre i Nyidrë. (Sal. 51:11) Eni palahi a olene koi Iehova ke, hnei Nyidrëti hna amanathithi ni, me aijijë ni troa atrune la ëje i Nyidrë!—Sal. 54:6.