1. Tune kaa la aqane huliwa la itre hlue i Iehova lo ijine itre pane keresiano?

 AME la Iehova a hamë huliwa kowe la itre hlue i Nyidrë, ke Nyidrëti fe a ajan tro angatr a kuca hnyawane la huliwa cili. (1 Kor. 14:33) Hnei Akötresie hna upi Iesu troa elemekene la huliwa ne cainöj, ke aja i Nyidrë troa cainöjëne la maca ka loi ngöne la fen asë. (Mat. 24:14) Nge Iesu a thupëne matre tro palahi a lolo la aqane kuca la huliwa. Ame lo ijine la itre pane keresiano, hna acile la itre ekalesia ngöne la itre götran, matre hna acile fe la itre qatre thup troa thupëne itre ej. (It. Hu. 14:23) Ame e Ierusalema, hetre lapa ne xomi meköt hna nyiatrene hnene la itre aposetolo me itre trejin ka macaj. Angatr la ka xome la itre mekun, nge tro pë hë la itre ekalesia a trongën. (It. Hu. 15:2; 16:4) Pine laka, itre ekalesia a trongëne hnyawane la itre hna amekötin, matre itre ej ‘pala hi a kökötre o drai me catre ngöne la lapaun.’ ​—It. Hu. 16:5.

2. Qane lo 1919, tune kaa la aqane iujine Iehova la itre hlue i Nyidrë me hamë xen?

² Enehila mina fe, Iehova a ajane tro la itre hlue i Nyidrë a kuca hnyawane la huliwa. Qane lo 1919, Iesu a amekötine la huliwa ne cainöj me hamëne la xen qaathei Iehova kowe la itretre dreng, jëne la neköi gurup ne la itre trejin trahmany hna iën. a (Luka 12:42) Kola mama hnyawa enehila laka, Iehova a amanathithine la huliwa ne la neköi gurup cili.​—Isa. 60:22; 65:​13, 14.

3-4. (a) Qaja jë la ketre ceitune ka amamane ka hape, hetre eloine la troa organize hnyawane la huliwa. (b) Nemene la hne së hna troa ce wange ngöne la tane mekun celë?

 ³ Maine tha hna organize hnyawane kö la huliwa, thatreine pi kö së eatrëne hnyawa la hnëqa së qaathei Iesu. (Mat. 28:​19, 20) Pane mekune jë laka, pëkö teritoar hna hamëne kowe la ekalesia, nge hna nue la itre trejin troa isa cainöj ngöne la itre götrane hnei angatr hna ajan. E cili, troa hetre götrane hna kuca lapan, nge itre xan tha hna ketre kö. Nemene la itre xaa eloine la hna organize hnyawan la huliwa së?

⁴ Ame enehila, Iesu a amekötine la huliwa së, tune lo aqane ce huliwa nyidrëti ekö me itretre dreng, lo nyidrëti e celë fen. Ame ngöne la tane mekune celë, tro sa ce wange la aqane kuca i nyidrëti ekö, me aqane nyitipu nyidrëti enehila hnene la organizasio. Tro fe sa ce wange la aqane tro sa amamane la mejiune së kowe la organizasio i Iehova.

ORGANIZASIO I IEHOVA A XÖTRETHENGE LA TULU I IESU

5. Nemene la ketre kepin ka amamane laka, organizasio i Iehova a xötrethenge la tulu i Iesu? (Ioane 8:​28)

⁵ Hnei Iesu hna qaja me kuca asë la hna ahnithe hnei Akötresie. Organizasio i Iehova a xötrethenge hnyawa la tulu i Iesu. Ej a huliwane la Tusi Hmitrötr matre ini së troa atrehmekune la loi me ngazo me eatrongë së. (E jë la Ioane 8:​28; 2 Tim. 3:​16, 17) Ej a amexeje lapane koi së la enyipiewekëne tro palahi a e Tusi Hmitrötr me trongën ej. Nemene la itre thangan e tro sa trongëne la eamo celë?

6. Nemene la ketre eloine hne së hna kapa qa ngöne la hne së hna inine la Tusi Hmitrötr?

⁶ Tru catre la itre thangane ka lolo hne së hna kapa, la easa ini Tusi Hmitrötr jëne la itre itusi së. Atreine hë së wange ka hape, ka ihmeku hi la itre hna amekötine hnene la organizasio memine la hna qaja hnei Tusi Hmitrötr. Ame hë la easa öhne laka, Tusi Hmitrötr la ka nyitrepene la itre hna amekötin, ke kola acatrene la mejiune së kowe la organizasio i Iehova.​—Roma 12:2.

7. Nemene la maca hnei Iesu hna cainöjën, nge organizasio i Iehova a xötrethenge tune kaa la tulu i Iesu?

⁷ Hnei Iesu hna cainöjëne la “maca ka lolo ne la Baselaia i Akötresie.” (Luka 4:​43, 44) Nge, hnei nyidrëti fe hna upe la itretre drei nyidrë troa cainöjëne la maca ne la Baselaia. (Luka 9:​1, 2; 10:​8, 9) Ame enehila, ame la itre ka sine la organizasio i Iehova, ke angatr asë hi a cainöjëne la maca cili, ngacama isa nöje i angatre kö me isa hnëqa e hnine la ekalesia.

8. Nemene la hnëqa hna hamëne koi së?

⁸ Easa wangatrune la hnëqa së, ene la troa cainöjëne la Baselaia i Akötresie koi itre xan! Tha nöjei atr kö la ka ijij troa xom la hnëqa cili. Ame lo Iesu e celë fen, tha hnei nyidrëti kö hna nue la itre dremoni troa qeje nyidrë. (Luka 4:​41) Ame enehila, hetre ewekë nyine troa pane kuca, hnene la atr ka hane pi cainöjëne la maca ka loi me itre Temoë Iehova. Easa amamane ka hape, ka tru koi së la huliwa ne cainöj, la easa isine troa cainöj kowe la nöjei atr hne së hna iöhnyi memin, me ngöne la nöjei götran. Tui Iesu, easa thel troa trane ngöne la hni ne la itre atr la itre itin ne nyipici, me fie lapan.​—Mat. 13:​3, 23; 1 Kor. 3:6.

9. Nemene la hna kuca hnene la organizasio i Iehova matre qaja amamane la ëje i Akötresie?

⁹ Hnei Iesu hna qaja amamane la ëje i Akötresie. Öni nyidrë kowe la Keme i  nyidrë ka hape: “Hnenge hna qaja amamane la ëje i nyipë koi angatr.” (Ioa. 17:26) Tui Iesu, organizasio i Iehova a kuca asë matre tro la itre atr a atre la ëje i Akötresie. Ame ngöne la Tusi Hmitrötr Fene Ka Hnyipixe Hna Ujën, hnene la organizasio hna amë hmaca la ëje i Akötresie ngöne la sipu göhnene ej. Ame enehila, ase hë ujëne apexejene maine sinëne la Tusi Hmitrötr cili ngöne la 270 lao qene hlapa. Ame ngöne la appendice A4 me A5 ka ej e kuhu hnin ke, kola qejepengöne la aqane amë hmaca la ëje i Akötresie e hnine la Tusi Hmitrötr. Nge ame ngöne la appendice C ka mama ngöne la Bible d’étude (Qene Wiwi), kola qaja la itre ka anyipicine laka, traqa koi 237 lao mama la ëje i Iehova ngöne la Itre Hna Cinyihane qene Geres.

10. Nemene la ini hne së hna xome qa ngöne la hna melën hnene la ketre föe qa Birmanie?

¹⁰ Tui Iesu, aja së troa qaja amamane la ëje i Akötresie kowe la nöjei atr. Hna treij hnene la ketre föe qa Birmanie, la eahlo a atre la ëje i Akötresie. Öni eahlo kowe la trejin ka ini Tus koi eahlo ka hape: “Eni petre hi lai a atre laka, ame la ëje i Akötresie ke Iehova. . . . Ketre ini lai, ka sisitria koi ni.” Tune la hna amamane hnene la hna melëne celë, ijije hi troa saze la mele ne la ketre atr, la angeic a atre la ëje i Akötresie.

AMAMANE JË LA MEJIUNE I EÖ KOWE LA ORGANIZASIO

11. Itre qatre thup a amamane tune kaa ka hape, ka mejiune angatr kowe la organizasio i Iehova? (Wange ju fe la iatr.)

¹¹ Itre qatre thup a amamane tune kaa ka hape, ka mejiune angatr kowe la organizasio i Iehova? Ngöne la angatr a e hnyawan me trongëne la itre hna amekötine koi angatr. Itre hna amekötine cili a amamane la aqane troa cile fë cainöj, me thith thatraqane la ekalesia me aqane troa thupëne la itre mamoe i Keriso. Ame la itre qatre thup a trongëne asë la itre hna amekötine qaathene la organizasio, drenge hi la itre trejin laka, Iehova a hnim me thupë angatr.

12. (a) Pine nemen matre nyipiewekë tro sa ce huliwa memine la itre ka elemeken? (Heberu 13:​7, 17) (b) Pine nemene matre loi e tro sa goeëne catrëne la itre thiina ne la itre ka elemeken?

¹² Ame la itre qatre thup a hamë së la itre hna amekötin, nyipiewekë tro sa idrengethenge. Easë hi lai a ahmaloeëne la huliwa i angatr. Tusi Hmitrötr a upi së troa drengethenge la itre ka elemeken me kapa madrine la musi angatr. (E jë la Heberu 13:​7, 17.) Ngo tha ka hmaloi kö e itre xaa ijin. Pine nemen? Pine laka, tha ka pexeje kö angatr. Ngo, e tro sa goeëne catrëne la tria ne la itre qatre thup, ke tro hë së lai a trothenge la aja ne la itre ithupëjia me easë. Ame la aja i angatr, ke tro sa pë mejiune kowe la organizasio i Akötresie. Nemene la nyine tro sa kuca, matre canga öhne me thipetrije la itre trengathoi ne la itre ithupëjia?

THE NUE KÖ LA KETRE ATR TROA THË LA MEJIUNE I EÖ

13. Tune kaa la aqane qaja angazon la organizasio hnene la itre ka icilekeu?

¹³ Itre ka icilekeu me Akötresie a qaja angazone la itre ewekë ka lolo ne la organizasio. Hane hi la ketre ceitun. Tusi Hmitrötr a amamane laka, aja i Iehova tro la itre hlue i Nyidrë a porop, me wië la itre mekuna i angatr, me hmi angatr koi Nyidrë. Ase hë Nyidrëti a amekötine ka hape, ame la atr ka kuca la ngazo, nge tha ka ietra kö, ke troa xometrije qa ngöne la ekalesia. (1 Kor. 5:​11-​13; 6:​9, 10) Ame easë, easa drengethenge la hna amekötine cili.  Matre itre ka icilekeu a qaja ka hape, itre atr ka pë ihnim easë, tha ka itrotrohni kö, nge ka nyi ka meköt.

14. Qaathei drei la itre trengathoi hna qaja göne la organizasio?

¹⁴ Qaathei drei la icilekeu memine la organizasio? Satana la ka silitrengathoine la organizasio. Angeice hi lo “keme ne la thoi.” (Ioa. 8:​44; Gen. 3:​1-5) Matre tro angeice lai a upe la itre sinexöle i angeic troa qaja angazone la organizasio i Iehova. Celë fe hi lo hnei angeic hna kuca ekö ngöne lo ijine ne la itre pane keresiano.

15. Tune kaa la aqane silitrengathoi Iesu me itretre dreng hnene la itre he ne hmi?

¹⁵ Ame ekö, hnene la itre sinexöle i Satana hna silitrengathoi Iesu, ngacama atr ka pexej nyidrë nge ka kuca la itre iamamanyikeu. Itre he ne hmi a qaja kowe la nöj ka hape, jëne la men ne la “tan ne la itre dremoni” matre Iesu a helëne la itre dremoni. (Mar. 3:​22) Nge ame la kola kootrë nyidrë, hnei angatr hna upezö nyidrë ka hape, nyidrëti a qaqa Akötresie, nge angatr a ukune jë la ka alanyimu troa humuthi nyidrë. (Mat. 27:20) Ame e thupen, ame la itretre drei Keriso a cainöjëne la maca ka loi, hnene la itre ithupëjia hna “amejëne la icilekeu, me ukune la itre atre” tro axösisi angatr. (It. Hu. 14:​2, 19) Önine la Ita Ne Thup ne 1 Diseba 1998, göi Itre Huliwa 14:2 ka hape: “Itre ka icilekeu thene la angetre Iudra a xelene la maca, ngo angatre fe a silitrengathoine la itre keresiano, matre tro la itre atrene fen a xele ma wai angatr.”

16. Nemene la nyine tro sa mekun la easa drenge la itre trengathoi hna qaja göne la organizasio?

¹⁶ Ekö hë Satana silitrengathoi së. Angeic palahi enehila a “amenune la fen asë.” (Hna Am. 12:9) E drenge jë  së la kola qaja angazone la organizasio me itre ka elemeken, mekune jë lo aqane silitrengathoi Iesu ekö me itretre dreng hnene la itre ithupëjia. Tune la hna qaja ngöne la Tusi Hmitrötr, troa axösisine me qaja angazone la itre hlue i Iehova enehila. (Mat. 5:​11, 12) Tha tro kö a athixötrë së hnene la itre trengathoi cili, e atre hë së laka, Satana la qaan, nge e tro fe sa canga hnëkë enehila. Nemene la aqane tro sa hnëkë?

17. Nemene la nyine tro sa kuca matre neëne la itre ithuemacany ka thoi? (2 Timoteo 1:​13) (Wange ju fe la hna eköhagen “ Itre Ithuemacany Ka Thoi: Nyine Troa Kuca.”)

¹⁷ Thipetrije pi la itre ithuemacany ka thoi. Ase hë Paulo aposetolo qaja la nyine tro sa kuca la easa drenge la itre trengathoi. Hnei Paulo hna upi Timoteo “troa eamo itre xan, matre tha tro kö angatr a . . . nyipiewekëne la itre ifejicatre” me ‘thipetrije la itre ifejicatre ka thoi.’ (1 Tim. 1:​3, 4; 4:7) Ame la itre nekönatr ka coco, angatr a hleme la itre ewekë ka dro me amë ngöne la që i nyudren. Ngo atre hi la atr ka tru laka, tha tro kö a kuca tun wanga tro angeic a wezipo. Easa canga thipetrij la itre ithuemacany ka thoi, ke atre hi së la qaan. Easë hmekuje hi a drenge la “itre trengewekë nyine loi” ne nyipici.​—E jë la 2 Timoteo 1:​13.

18. Tro sa amamane tune kaa la mejiune së kowe la organizasio i Iehova?

¹⁸ Hne së hi hna ce wang la köni götran, ka amamane la aqane nyitipu Iesu hnene la organizasio i Iehova. Ame la eö a ini Tusi cas, thele jë la itre xaa aqane nyitipu Iesu hnene la organizasio. Ithuecatre jë kowe la itre trejin ne la ekalesia troa acatrene la mejiune i angatr kowe la organizasio së. Nge catre jë nyihlue i Iehova me isigöline la organizasio, ke pëkö xaa organizasio hnei Iehova hna huliwan matre eatrëne la aja i Nyidrë. Aqane tro hi eö lai a amamane la mejiune i eö kowe la organizasio. (Sal. 37:28) Wangatrune jë la göhnë së ngöne la nöje i Iehova, ka ihnim me nyipici.