1. Tune kaa la itre xaa trejin la angatr a cainöj kowe la itre atr hnei angatr hna thatre? (Wange ju fe la iatr.)

 AME së itre hlue i Iehova, easa cainöj, ke easa hnimi Nyidrë me ajane troa xatuane la itre atr troa atre Nyidrë. Alanyimu la itre trejin ka madrine troa cainöj. Ngo, ame itre xan, pëkö madrine i angatr. Pine nemen? Pine laka, itre ka lapa pe hi angatr, nge ame koi angatr, thatreine kö angatr hamë ini. Ame pena itre xan, hmahma angatr troa traqa thene la itre atr, nge tha hna hë angatre kö. Itre xan a xou wanga helë angatre jë. Ame pena itre xan, hnene la aqane hetru angatr, matre xou angatr troa hetre iwesitrë me ketre. Ngacama tru catre la ihnimi angatr koi Iehova, ngo tha ka hmaloi kö koi angatr troa cainöj kowe la itre atr hnei angatr hna thatre. Pine laka, atre hi angatr laka, ka nyipiewekë catre la huliwa cili, matre angatre palahi a cainöj. Tru catre la madrine i Iehova koi angatr!

2. Pine nemene matre tha tro kö sa dekurage e pëkö madrine së la easa cainöj?

² Jole kö koi eö troa cainöj, pine lo itre ewekë hne së hna ce wange e caha? Maine eje hi lai, the dekurage kö. Maine jë, ame la kepin matre eö a mekune ka hape, tha ijiji eö kö troa cainöj, ke ka ipië eö, nge xele eö troa pi mama me thele iwesitrë. Drei la atr ka madrine la kola helë angeic, nge kolo pe a hamë ixatua? Atre kö Iehova la jol ka traqa koi  eö, nge aja i Nyidrë troa xatua eö. (Isa. 41:13) Ame ngöne la tane mekun celë, tro sa ce wange la 5 lao nyine tro sa kuca matre elëhune la xou me madrine ngöne la hna cainöj.

NUE PI LA TUSI HMITRÖTR TROA AEGÖCATRENYI EÖ

3. Nemene la ka hamë trengecatre koi Ieremia troa cainöj?

³ Qane hë ekö, hna aegöcatrene palahi la itre hlue i Iehova, la Nyidrëti a ahnithe la ketre hnëqa ka tru koi angatr me upi angatr troa tro fë la maca i Nyidrë. Tro sa ce wange la tulu i Ieremia perofeta. Ame la kola upi angeic hnei Iehova troa cainöj, ke hnei angeic hna qaja ka hape, tha ijiji angeic kö. Öni angeic: “Tha ’teine kö ni troa ewekë, ke nekönate ni.” (Iere. 1:6) Nemene la ka xatua angeic? Hnene hi la maca hna qaja hnei Iehova, la ka hamë trengecatr koi angeic. Öni angeic: ‘Ej’ e kuhu hninge kösë eë ka mele hna thinge hnine la itre juneng; nge thatreine hë ni lapafë.’ (Iere. 20:​8, 9) Ngacama ala xalaithe hi la ka drei Ieremia, ngo kolo pe a thuecatre i angeic troa eatrëne la hnëqa, hnene la maca hnei Iehova hna upi angeic troa tro fë.

4. Nemene la thangan, e tro sa e me lapa mekun la Tusi Hmitrötr? (Kolose 1:​9, 10)

⁴ Itre keresiano a xomi trengecatr qa ngöne la maca ka ej e hnine la Tusi Hmitrötr. Ame ngöne la tusi Paulo kowe la angetre Kolose, öni angeic ka hape, tro la nyipi atrehmekun a uku angatr troa “tro hnyawa göi Iehova” me catre kuca la “itre huliwa ka loi.” (E jë la Kolose 1:​9, 10.) Ketre huliwa ka loi, la troa cainöjëne la maca ka loi. Matre ame la easa e me lapa mekune la Tusi Hmitrötr, kola acatrene la lapaune së, nge easa trotrohnine la enyipiewekëne troa cainöjëne la maca ne la Baselaia.

5. Nemene la aqane tro sa kepe thangane qa ngöne la hne së hna e me inine la Tusi Hmitrötr?

⁵ Maine aja së troa kepe thangane la hne së hna e Tusi Hmitrötr, tha tro kö sa e nyimenyimën, me inin, me lapa mekun. Nyipiewekë troa xomi ijin. Maine tha trotrohnine kö eö la ketre xötr, ke pane cile ju. Nge ithele jë ngöne la Index des publications des Témoins de Jéhovah maine ngöne la Nyine Thele Mekun Ne La Itretre Anyipici Iehova. Maine tro eö a xomi ijine hnyawa troa ini Tus, ke tro hë a xecie koi eö laka, ka nyipici la Tusi Hmitrötr. (1 Thes. 5:​21)  Ame e cili, tro hë eö a pi qaja koi itre xan la itre hnei eö hna inin.

HNËKE HNYAWA JË QËMEKENE TROA CAINÖJ

6. Pine nemene matre loi e tro sa hnëkë hnyawa qëmekene troa cainöj?

⁶ Maine tro eö a hnëkë hnyawa qëmekene troa cainöj, ke tro hë lai a hmaloi koi eö troa ithanata kowe la itre atr. Hnei Iesu hna hnëkën la itretre dreng, qëmekene troa upi angatr troa cainöj. (Luka 10:​1-​11) Pine laka, hnei angatr hna trongëne hnyawa la itre hna amekötin hnei Iesu, hnei angatr hna kuca la itre huliwa ka tru, me kepe madrin qa ngön.​—Luka 10:17.

7. Tune kaa la aqane tro sa hnëkë enehila kowe la huliwa ne cainöj? (Wange ju fe la iatr.)

⁷ Tune kaa la aqane tro sa hnëkë enehila kowe la huliwa ne cainöj? Loi e tro sa mekune la nyine tro sa qaja me aqane tro sa qaja. Loi e tro mina fe sa canga mekune la aqane tro la itre atr a ujë ngöne la teritoare me aqane troa sa koi angatr. Tro lai a xatua së troa atreine xomihni me loi thiina me hnyimahnyima kowe la itre atr hne së hna cainöje kow.

8. Pine nemene matre Paulo a aceitunëne la itre keresiano memine la itre trengen hna xupe hnei dro?

⁸ Hnei Paulo hna xome la itre ceitune matre troa qejepengöne la huliwa hne së hna kuca ngöne la hna cainöj. Öni angeic: “The huni la trengamo celë hnine la itre trengen hna xupe hnei dro.” (2 Kor. 4:7) Nemene la trengamo cili? Kola qaja la huliwa ne cainöjëne la maca ne Baselaia, ene la maca ne iamele. (2 Kor. 4:1) Nemene la itre trengen hna xupe hnei dro? Kola qaja la itre hlue i Akötresie ka cainöjëne la maca ka loi. Ame ngöne la hneijine i Paulo, itre ka salem a nyialiene la itre trengene dro hnene la itre ewekë ka tru thupen, tune la xen me waina me mani. Ketre tun, hnei Iehova hna ahnithe koi së la maca ka loi, ketre maca ka sisitria. Nyidrëti a hamë së la trengecatre ka ijij, matre catre tro fë la maca cili kowe la itre xan.

THITHI JË MATRE HETRE TRENGECATR

9. Tune kaa la aqane tro sa elëhune la xoue atr maine icilekeu? (Wange ju fe la iatr.)

⁹ Ame itre xaa ijine, easa xou tro la itre atre a helë easë maine icilekeu me easë ngöne la hna cainöj. Nemene la nyine tro  sa kuca? Pane mekune hmaca jë lo thithi ne la itre aposetolo thupene lo kola wathebo angatre troa cainöj. Tha cile hnö kö angatr, ngo hnei angatre pe hna sipo Nyidrë la trengecatr “troa catre cainöjëne la itre trengewekë i [nyidrë].” Nge hnei Iehova hna canga sa la thithi angatr. (It. Hu. 4:​18, 29, 31) Maine tro fe a traqa koi së la xoue atr, canga sipo ixatua jë koi Iehova. Sipo Nyidrëti jë troa acatrene la ihnimi së kowe la itre atr, matre apatrene la xou.

10. Nemene la aqane xatua së hnei Iehova matre anyipici Nyidrë? (Isaia 43:​10-​12)

¹⁰ Hnei Iehova hna ië së troa itretre anyipici Nyidrë, nge tro kö Nyidrëti a aegöcatrenyi së. (E jë la Isaia 43:​10-​12.) Tro sa ce wange la foa lao aqane aegöcatrenyi së hnei Nyidrë. Ame la hnapan, ce Iesu palahi me easë ngöne la hna cainöj. (Mat. 28:​18-​20) Ame la hnaaluen, hnei Iehova fe hna ahnithe kowe la itre angela troa xatua së. (Hna Am. 14:6) Ame la hnaakönin, Iehova a hamë së la uati hmitrötr, matre amekunë së la itre hne së hna inin. (Ioa. 14:​25, 26) Ame la hnaafoan, Nyidrëti a xatua së jëne la itre trejin. Jëne la ixatua i Iehova memine la itre trejin, easë palahi a catre cainöj.

THELE JË LA AJA NE LA ITRE ATR ME WAIEWEKË HNYAWA

11. Nemene la nyine tro eö a kuca matre öhne la itre atr? (Wange ju fe la iatr.)

¹¹ Ame la eö a cainöj trootro, eö kö a dekurage, ke pëkö atr hnei eö hna öhn? Maine eje hi, isa hnyinge jë ka hape: ‘Ekaa jë angatr?’ (It. Hu. 16:13) ‘Angatre kö a huliwa maine komisio?’ Maine eje hi, loi e tro eö a cainöj e cahu gojenyi matre öhne la itre xaa atr. Öni Joshua ketre trejin ka hape, “Eni a öhne la itre atr ngöne la itre magazë ka tru me ngöne la itre götrane gaa tru atr.” Ketre, angeic me Bridget föi angeic, a iöhny memine la itre atr ngöne la itre hnalapa i angatr la nyidroti a cainöj e hej maine e sabath hnaipajö.​—Efe. 5:​15, 16.

12. Nemene la aqane tro sa atre la hna mejiune kow maine hnehengazon hnene la itre atr?

¹² Maine tha nyipiewekëne kö la atre la Tusi Hmitrötr, thele jë la hnei angeic hna mejiune kow maine itre hnei angeic  hna hnehengazon. Jëne la hnyinge ka mama ngöne la itre tarak, Joshua me Bridget a nyiqane porotrik memine la itre atr. Ame la nyidroti a amamane la tarak Nemene La Hnei Epuni Hna Mekune Göi Tusi Hmitrötr?, nyidroti a qaja ka hape: “Itre atr a mekun ka hape, ame la Tusi Hmitrötr, ke itus qaathei Akötresie. Ngo tha mekuna i itre xane kö lai. Nemene fe la mekuna i epun?” Celë hi ka nyiqane la porotrik.

13. Pine nemene matre ka lolo palahi la huliwa së, ngacama pëkö atre ka drei së? (Itre Edromë 27:11)

¹³ Ngacama tha drei së kö hnene la itre atr, ngo tro kö sa catre cainöj. Pine nemen? Pine laka, huliwa lai hna upi së hnei Iehova me Iesu, ene la troa anyipici nyidro. (It. Hu. 10:42) Ngacama pëkö atre hne së hna iöhnyi memin, maine xele kö angatr ma wai së, ngo easa madrin, ke easa amadrinë Iehova.​—E jë la Itre Edromë 27:11.

14. Pine nemene matre easë asë hi a madrine la ketre trejin a öhne la ketre atr ka pi atre Iehova?

¹⁴ Loi e tro fe sa madrine la ketre trejin ne la ekalesia a öhne la ketre atr ka pi atre Iehova. Hnene la Ita Ne Thup hna aceitunëne la huliwa ne cainöj memine la kola thele la ketre nekönatre ka patr. Itre ka ithel a lep la itre götrane asë, matre thele nyën. Ame hë la kola öhnyi nyën, kola madrine asë la iatr. Ketre tun, loi e troa ce iwanakoimëne la huliwa ne cainöj. Hnëqa së asë hi troa cainöj ngöne asë la itre teritoar, matre madrine asë hi së la kola nyiqane sine la itre icasikeu hnene la ketre atr.

NYIPIEWEKË TROA HNIMI IEHOVA MEMINE LA ATR LAPA EASENYI SË

15. Nemene la aqane tro la tusi Mataio 22:​37-​39 a xatua së troa madrine ngöne la huliwa ne cainöj? (Wange ju fe la ka qa ngöne icetrön.)

¹⁵ Tro sa madrine troa kuca la huliwa ne cainöj, e ka sisitria koi së troa hnimi Iehova me itre ka lapa easenyi së. (E jë la Mataio 22:​37-​39.) Pane mekune jë la madrine Iehova la Nyidrëti a öhnyi së a kuca la huliwa hna ahnithe koi së. Nge, drei jë kö la madrin ne la itre atr la angatr ha nyiqane ini Tus! Ketre, the thëthëhmine kö laka, tro hmekuje hi la itre atr ka kapa la maca ka loi a mel.​—Ioa. 6:​40; 1 Tim. 4:​16.

16. Ame la easa umë ngöne la hnalapa së, nemene la aqane tro sa madrin ngöne la huliwa ne cainöj? Qaja jë la itre ceitun.

¹⁶ Nge tune kaa ngöne la ijine eö a umë?  Nemene nyine tro eö a kuca, matre amamane la ihnimi eö koi Iehova me kowe la atr lapa easenyi eö? Ame ngöne lo ijine COVID-19, hnei Samuel me Dania hna umë. Ame ngöne la ijine cili, hnei nyidroti hna cainöj jëne telefon me itus, me ini Tusi jëne Ëternet. Hnei Samuel fe hna cainöj kowe la itre atr hnei angeic hna iöhnyi memine e pital, ngöne la kola nyinyine la cancer i angeic. Öni angeic: “Itre itupath a ajolëne la mekuna së me ngönetrei së me imelekeu së me Iehova. Matre nyipiewekë tro sa thele la aqane tro sa madrine ngöne la huliwa i Nyidrë.” Ame pena Dania, hnei angeic hna kei matre köni treu ne tha mejë kö angeic qa ngöne ili. Nge e thupen, 6 lao treu ne lapa ikatr angeic. Öni angeic: “Hnenge hna isine troa kuca la hnenge hna atrein. Hnenge hna cainöj kowe la ketre infirmière ka traqa lapa ngöne la hnalapa me kowe la itre livreurs. Nge hnenge fe hna porotrikë Tusi Hmitrötr memine la ketre föe ka hë ni troa salemëne la itre matériel médical.” Tha ijiji Samuel hë me Dania troa huliwa atrun koi Iehova, ngo hnei nyidro hna kuca la hnei nyidroti hna atrein, matre tru la madrin hnei nyidroti hna kapa.

17. Tro sa kepe thangane tune kaa qa ngöne la itre eamo ne la tane mekun celë?

¹⁷ Tro sa kepe thangane qa ngöne la itre eamo ngöne la tane mekun celë, e tro sa trongëne asë itre ej. Ceitune hi la itre eamo e caha memine la itre ingrédients la easa kuci xen. Troa hnyapa la xen, e tro sa amë asë la itre ingrédients. Ketre tun, e tro sa trongëne asë la itre eamo celë, troa hmaloi koi së troa lepetrij la itre mekun ka ngazo, me madrine ngöne la huliwa ne cainöj.